Mga Tabang sa Pagtuon
Isaias


Isaias

Usa ka propeta sa Daang Tugon kinsa nanagna gikan sa 740–701 B.C. Ingon nga labaw nga magtatambag ni Hari Ezechias, si Isaias adunay dako nga relihiyoso ug politikanhon nga impluwensya.

Si Jesus mikutlo kang Isaias labaw pa sa iyang pagkutlo ni bisan kinsa nga propeta. Si Isaias gikutlo usab kanunay ni Pedro, ni Juan ug ni Pablo diha sa Bag-ong Tugon. Ang Basahon ni Mormon ug ang Doktrina ug mga Pakigsaad adunay daghan nga pagkutlo gikan kang Isaias kay gikan ni bisan kinsa nga propeta ug naghatag og dako nga pagtabang sa paghubad ni Isaias. Si Nephi mitudlo sa iyang mga katawhan gikan sa mga sinulat ni Isaias (2 Ne. 12–24; Isa. 2–14). Ang Ginoo misulti sa mga Nephite nga “mahinungdanon ang mga pulong ni Isaias” ug nga ang tanan nga mga butang nga gipanagna ni Isaias matuman (3 Ne. 23:1–3).

Ang basahon ni Isaias

Usa ka basahon sa Daang Tugon. Daghan sa mga panagna ni Isaias naghisgot sa pag-abut sa Manunubos, lakip sa iyang yutan-on nga pagpangalagad (Isa. 9:6) ug ingon nga usa ka Halangdon nga Hari sa katapusan nga adlaw (Isa. 63). Siya usab mitagna og daghan mahitungod sa umaabut sa Israel.

Kapitulo 1 mao ang usa ka pasiuna sa tibuok basahon. Isa. 7:14; 9:6–7; 11:1–5; 53:1–12; ug 61:1–3 nagtagna daan sa misyon sa Manluluwas. Mga kapitulo 2, 11, 12, ug 35 naghisgot sa mga hitabo diha sa ulahing mga adlaw, sa panahon nga ang ebanghelyo ipahiuli, ang Israel pagapundukon, ug ang giuhaw nga yuta mamulak ingon sa usa ka rosas. Kapitulo 29 nagdala og usa ka panagna sa pagtungha sa Basahon ni Mormon (2 Ne. 27). Mga kapitulo 40–46 nagpahibalo sa kagamhanan ni Jehova ingon nga tinuod nga Dios ibabaw sa mga dios-dios sa pagano nga mga tigsimba. Ang nahibilin nga mga kapitulo, 47–66, naghisgot sa mga hitabo diha sa katapusan nga pagpahiuli sa Israel ug ang katukuran sa Zion, uban sa pagpuyo sa Ginoo sa iyang mga katawhan.