Mga Tabang sa Pagtuon
Alma, Anak nga Lalaki ni Alma


Alma, Anak nga Lalaki ni Alma

Diha sa Basahon ni Mormon, ang unang labaw nga maghuhukom ug propeta diha sa nasud sa Nephite. Sa iyang kabatan-on siya mitinguha sa paglaglag sa Simbahan (Mosiah 27:8–10). Bisan pa niana, usa ka anghel ang mipakita ngadto kaniya ug siya nakabig ngadto sa ebanghelyo (Mosiah 27:8–24; Alma 36:6–27). Sa wala madugay siya mibiya sa iyang katungdanan ingon nga labaw nga maghuhukom aron motudlo sa mga katawhan (Alma 4:11–20).

Ang basahon ni Alma

Usa ka gilain nga basahon diha sa Basahon ni Mormon, nga naglangkob og usa ka minubo nga mga talaan ni propeta Alma, anak nga lalaki ni Alma, ug sa iyang anak nga lalaki nga si Helaman. Ang mga hitabo nga gihulagway diha sa basahon nahitabo kapin kon kulang gikan sa 91 hangtud sa 52 B.C. Ang basahon naglakip og 63 ka mga kapitulo. Mga kapitulo 1–4 naghulagway sa pagsukol sa mga sumusunod ni Nehor ug ni Amlici batok sa mga Nephite. Ang sangputanan sa mga gubat mao ang labing nakadaot niana nga yugto sa kasaysayan sa mga Nephite. Mga kapitulo 5–16 naglakip sa asoy sa kang Alma nga sayo nga misyonaryo nga mga panaw, lakip sa iyang wali sa Maayo nga Magbalantay (Alma 5) ug ang iyang pagsangyaw uban ni Amulek diha sa dakbayan sa Ammonihah. Mga kapitulo 17–27 naglakip sa talaan sa anak nga mga lalaki ni Mosiah ug sa ilang pangalagad diha sa mga Lamanite. Mga kapitulo 28–44 naglakip sa pipila sa labing mahinungdanon nga mga wali ni Alma. Diha sa kapitulo 32 si Alma mitandi sa pulong ngadto sa usa ka binhi; sa kapitulo 36 siya mibalik pag-asoy sa iyang sugilanon mahitungod sa iyang pagkakabig ngadto sa iyang anak nga lalaki nga si Helaman. Mga kapitulo 39–42 nagtala sa kang Alma nga pagtambag ngadto sa iyang anak nga lalaki nga si Corianton, kinsa nalambigit sa kalapasan sa kadungganan; kini nga mahinungdanon nga wali nagpatin-aw sa kaangayan, kalooy, pagkabanhaw, ug sa Pag-ula. Mga kapitulo 45–63 naghulagway sa mga gubat sa Nephite niana nga panahon ug ang paglangyaw ubos ni Hagoth. Ang ingon nga gamhanan nga mga pangulo sama ni Kapitan Moroni, Teancum ug Lehi mitabang sa pagpanalipod sa mga Nephite pinaagi sa ilang maisug ug untop sa panahon nga mga lihok.