Mga Tabang sa Pagtuon
Biblia


Biblia

Usa ka hinugpong sa Hebreo ug Kristyano nga mga sinulat nga naglakip sa balaan nga mga pagpadayag. Ang pulong biblia nagpasabut nga “mga basahon”. Ang biblia mao ang buhat sa daghan nga mga propeta ug dinasig nga mga tigsulat nga nagbuhat ubos sa impluwensya sa Balaang Espiritu (2 Ped. 1:21).

Ang Biblia sa Kristyano adunay duha ka mga bahin, sa kasagaran nailhan nga ang Daan ug ang Bag-ong Tugon. Ang Daang Tugon naglangkob sa mga basahon sa kasulatan nga gigamit sa mga Judeo sa Palestina sa panahon sa mortal nga pagpangalagad sa Ginoo. Ang Bag-ong Tugon naglakip sa mga sinulat nga nahisakop sa panahon sa mga Apostoles ug gitan-aw nga adunay sama nga pagkabalaan ug pagtugot ingon sa mga kasulatan sa mga Judeo. Ang mga basahon sa Daang Tugon gikuha sa usa ka nasudnon nga literatura nga milungtad sa daghan ka mga gatusan ug nahisulat hapit ang kinatibuk-an diha sa Hebreo, samtang ang mga basahon sa Bag-ong Tugon mao ang buhat sa usa ka kaliwatan ug nahisulat hapit tanan diha sa Gresyanhon.

Diha sa Daang Tugon ang pulong nga tugon nagtimaan og usa ka Hebreo nga pulong nga nagkahulugan og “pakigsaad”. Ang Daang Pakigsaad mao ang balaod nga gihatag ngadto kang Moises sa diha nga ang Israel misalikway sa kahingpitan sa ebanghelyo nga diha sa mga katawhan sa Dios gikan sa sinugdanan sa kinabuhi sa yuta. Ang Bag-ong Pakigsaad mao ang ebanghelyo ingon sa gitudlo ni Jesukristo.

Sa Hebreo nga Biblia (ang Daang Tugon) ang mga basahon gibahin ngadto sa tulo ka mga pundok: ang Balaod, ang mga Propeta, ug ang mga Sinulat. Ang Biblia nga gigamit sa kalibutan nga Kristyano nagbahin sa mga basahon sumala sa hilisgutan, ingon sama sa kasaysayan, balak, panagna.

Ang mga basahon sa Bag-ong Tugon sa kinatibuk-an anaa niini nga han-ay: ang upat ka mga Ebanghelyo ug mga Buhat; ang mga epistola ni Pablo; ang kinatibuk-an nga mga epistola ni Santiago, Pedro, Juan, ug Judas; ug ang Pinadayag ni Juan.

Ang Simbahan ni Jesukristo sa mga Santos sa Ulahing mga Adlaw nagtamud ug nagtahud sa Biblia ug nagpamatuod usab nga ang Ginoo nagpadayon sa paghatag og dugang pagpadayag pinaagi sa iyang mga propeta sa katapusan nga mga adlaw nga mipalig-on ug mitino sa biblianhon nga asoy sa mga pakigdait sa Dios uban sa katawhan.