Mga Tabang sa Pagtuon
Tabernakulo


Tabernakulo

Usa ka balay sa Ginoo, ang kinapusoran sa pagsimba sa Israel sa panahon sa exodo gikan sa Ehipto. Ang tabernakulo sa tinuod usa ka mahipos-hipos nga templo ug mahimo nga bungkagon ug ipahiuli pag-usab. Ang mga anak sa Israel migamit sa tabernakulo hangtud sila mitukod og templo ni Solomon (D&P 124:38).

Ang Dios mipadayag sa sumbanan sa tabernakulo ngadto kang Moises (Ex. 26–27), ug ang mga anak sa Israel mitukod niini sumala niana nga sumbanan (Ex. 35–40). Sa pagkahuman sa tabernakulo, usa ka panganod mitabon sa tolda, ug ang himaya sa Ginoo mipuno sa tabernakulo (Ex. 40:33–34). Ang panganod usa ka timailhan nga ang Dios anaa. Sa panahon sa kagabhion, kini adunay panagway sa usa ka kalayo. Kon ang panganod magpabilin ibabaw sa tolda, ang mga anak sa Israel magkampo. Kon kini molihok, sila usab mouban niini (Ex. 40:36–38; Num. 9:17–18). Ang mga anak sa Israel midala sa tabernakulo uban kanila sa panahon sa ilang mga paglibud-libod sa kamingawan ug diha sa ilang pagbuntog sa yuta Canaan. Human niana nga pagbuntog, ang tabernakulo gipahimutang sa Shiloh, ang dapit nga gipili sa Ginoo (Jos. 18:1). Human ang mga anak sa Israel mitukod sa templo ni Solomon, ang tabernakulo sa hingpit nawala gikan sa kasaysayan.

Ang Ginoo ug si Isaias migamit sa tabernakulo ingon nga usa ka simbolo sa mga dakbayan sa Zion ug Jerusalem sa panahon sa ikaduhang pag-anhi sa Ginoo (Isa. 33:20; Moises 7:62).