Doktrina ug mga Pakigsaad

Usa ka hinugpong nga balaan nga mga pagpadayag sa ulahing mga adlaw ug mga dinasig nga pahayag. Ang Ginoo mihatag niini ngadto kang Joseph Smith ug sa pipila sa iyang mga sumusunod alang sa katukuran ug panggamhanan sa gingharian sa Dios dinhi sa yuta sa katapusan nga mga adlaw. Ang Doktrina ug mga Pakigsaad mao ang usa sa mga sumbanan nga mga basahon sa kasulatan diha sa Ang Simbahan ni Jesukristo sa mga Santos sa Ulahing mga Adlaw, uban sa Biblia, sa Basahon ni Mormon, ug sa Perlas nga Labing Bililhon. Ang Doktrina ug mga Pakigsaad talagsaon, bisan pa niana, tungod kay kini dili hinubad sa karaan nga mga dokumento; ang Ginoo mihatag niini nga mga pagpadayag ngadto sa iyang pinili nga mga propeta niining atong panahon aron sa pagpahiuli sa iyang gingharian. Diha sa mga pagpadayag ang usa makabati sa malumo apan malig-on nga tingog sa Ginoong Jesukristo (D&P 18:35–36).

Ang Propeta Joseph Smith miingon nga ang Doktrina ug mga Pakigsaad mao ang katukuran sa Simbahan sa katapusan nga mga adlaw ug usa ka kaayohan ngadto sa kalibutan (D&P 70:ulohan). Ang mga pagpadayag diha niini nagsugod sa buhat sa pag-andam sa agianan alang sa ikaduhang pag-anhi sa Ginoo, agi og katumanan sa tanan nga mga pulong nga gikasulti sa mga propeta sukad sa sinugdanan sa kalibutan.