Mga Tabang sa Pagtuon
Basahon ni Mormon


Basahon ni Mormon

Usa sa upat ka mga pundok sa kasulatan nga gidawat sa Ang Simbahan ni Jesukristo sa mga Santos sa Ulahing mga Adlaw. Kini usa ka minubo pinaagi sa usa ka karaan nga propeta nga ginganlan og Mormon mahitungod sa mga talaan sa karaan nga mga lumulupyo sa America. Kini gisulat aron sa pagpamatuod nga si Jesus mao ang Kristo. Mahitungod niini nga talaan, ang propeta Joseph Smith, kinsa mihubad niini pinaagi sa gasa ug gahum sa Dios, nag-ingon: “Ako misulti sa mga kaigsoonan nga ang Basahon ni Mormon mao ang labing tukma sa bisan unsa nga basahon sa yuta, ug ang tukurang bato sa atong relihiyon, ug ang usa ka tawo mahiduol ngadto sa Dios pinaagi sa pagsunod sa iyang mga lagda, kay sa bisan unsa nga basahon” (Tan-awa ang pasiuna diha sa atubangan sa Basahon ni Mormon).

Ang Basahon ni Mormon mao ang usa ka relihiyoso nga talaan sa tulo ka mga pundok sa mga katawhan kinsa milangyaw gikan sa Daan nga Kalibutan ngadto sa mga kayutaan sa America. Kini nga mga pundok gipangulohan sa mga propeta kinsa mitala sa ilang relihiyoso ug kalibutanon nga mga kasaysayan diha sa mga palid nga metal. Ang Basahon ni Mormon nagtala sa pagduaw ni Jesukristo ngadto sa mga katawhan didto sa America human sa iyang pagkabanhaw. Usa ka duha ka gatusan ka mga tuig nga panahon sa kalinaw misunod niana nga pagduaw ni Kristo.

Si Moroni, ang katapusan nga propeta nga Nephite—nga tigsaysay, misilyo sa minubo nga mga talaan niini nga mga katawhan ug mitago kanila diha sa mga A.D. 421. Sa 1823, ang nabanhaw nga Moroni miduaw ni Joseph Smith ug unya mitugyan ngadto kaniya niining karaan ug sagrado nga mga talaan aron pagahubaron ug patunghaon ngadto sa kalibutan ingon nga lain nga tugon ni Jesukristo.