Zvakazarurwa zvemazuva ekupedzisira zvinotaura nezvegehena nepaviri. Chekutanga, inzvimbo inofanogarwa munyika yemweya neavo vakanga vasingateerere muupenyu hwenyama. Mupfungwa iyi, gehena rine magumo. Mweya iriko ichadzidziswa vhangeri, uye kwechinguva mushure mekutendeuka kwavo vanozomutswa kuvakafa vachiiswa pakubwinya uko kwavakakodzera. Avo vasingatendeuke, asi vasiri zvavo vana vekuraswa, vanosara mugehena muMereniamu yose. Mushure mechiuru ichi chekutambudzwa, vanozomutswa kuvakafa mukubwinya kweteresitiyaro (D&Z 76:81–86; 88:100–101).
Chechipiri, ndiyo nzvimbo zvachose yeavo vasina kununurwa nerudzikinuro rwaJesu Kristu. Mupfungwa iyi, gehena hariperi. Ndere avo vanowanikwa “vachiine tsvina” (D&Z 88:35, 102). Iyi ndiyo nzvimbo apo Satani, ngirozi dzake, uye vanakomana vekuraswa—avo vakaramba Mwanakomana mushure mekunge Baba vamuburitsa pachena—vachagara kokusingaperi (D&Z 76:43–46).
Magwaro matsvene dzimwe nguva anotaura nezvegehena serima rekunze.