Cia kom txhua haiv neeg, txhua xeem neeg, txhua yam lus, thiab txhua yam neeg sawv daws paub, rau cov uas phau ntawv no yuav los hais tias: Los ntawm Vajtswv Leej Txiv txoj kev tshav ntuj, thiab los ntawm peb tus Tswv Yexus Khetos, peb tau pom cov phiaj uas muaj phau ceev xwm txheej no, uas yog ib phau ceev xwm txheej txog Nifais cov neeg, thiab txog cov Neeg Lamas, uas yog lawv cov kwv tij, thiab txog Yales cov neeg, cov uas tau tuaj tim tus pej thuam uas tau hais lawm tuaj. Thiab peb kuj paub tias tau muab cov phiaj no txhais los ntawm Vajtswv lub txiaj ntsim thiab lub hwj chim, vim nws lub suab tau hais li rau peb; Yog li ntawd peb thiaj paub tseeb tseeb tias tej no muaj tseeb tiag. Thiab peb kuj ua tim khawv tias peb tau pom cov lus uas tau sau rau saum cov phiaj; thiab tau muab tej no ua rau peb pom los ntawm Vajtswv lub hwj chim, thiab tsis yog los ntawm tib neeg. Thiab peb siv tej lus tiag tiag tshaj tawm hais tias, Vajtswv ib tug tim tswv tau nqis saum ntuj los, thiab nws tau nqa los tso ntawm peb lub qhov muag, xwv kom peb saib thiab pom cov phiaj, thiab cov ntawv uas sau rau hauv; thiab peb paub tias yog los ntawm Vajtswv Leej Txiv txoj kev tshav ntuj, thiab los ntawm peb tus Tswv Yexus Khetos, peb thiaj tau pom thiab ua tim khawv tias tej yam no muaj tseeb tiag. Thiab yog ib qho zoo kawg nkaus rau peb qhov muag pom. Txawm li ntawd los, tus Tswv lub suab tau txib kom peb ua tim khawv txog tej no; yog li ntawd, kom ua raws li Vajtswv cov lus txib, peb thiaj ua tim khawv txog tej yam no. Thiab peb paub tias yog peb rau siab ntseeg Khetos, peb yuav ntxuav tau txhua tus neeg tej ntshav tawm ntawm peb tej tsoos tsho, thiab yuav suav tias peb tsis muaj qhov phem nyob ntawm Khetos lub rooj txiav txim, thiab yuav tau nrog nws nyob saum ntuj ceeb tsheej mus ib txhis li. Thiab lub sam xeeb yog rau Leej Txiv, thiab rau Leej Tub, thiab rau tus Vaj Ntsuj Plig Dawb Huv, uas yog ib tug Vajtswv. Amees.