1 Thiab nim no tau muaj tias thaum Yexus hais tej yam no tas lawm nws muab tej no piav ntxaws rau pab neeg coob coob; thiab nws muab txhua yam piav ntxaws rau lawv, tsis hais tej uas tseem ceeb tej uas tsis tshua tseem ceeb.

2 Thiab nws hais tias: Tej vaj lug kub no, uas nej tsis tau muaj, Leej Txiv txib kom kuv muab rau nej; vim twb yog nws lub tswv yim kom yuav tsum muab tej no rau tiam neeg yav tom ntej.

3 Thiab nws muab txhua yam piav ntxaws, twb yog pib puag thaum chiv keeb mus txog rau lub sij hawm thaum nws yuav los nrog nws lub yeeb koob—muaj tseeb tiag, twb yog txhua yam uas yuav los thoob plaws lub ntiaj teb, twb yog mus txog thaum uas txhua yam yuav yaj nrog tej kua leej faj kub, thiab lub ntiaj teb yuav raug muab kauv zoo li ib daim ntawv kauv, thiab lub ntuj thiab lub ntiaj teb yuav dhau mus;

4 Thiab twb yog mus rau hnub tseem ceeb thiab hnub kawg ntawd, thaum cov neeg txhua tus, thiab neeg txhua xeem, thiab txhua haiv neeg thiab txhua yam lus yuav sawv ntawm Vajtswv lub xub ntiag, raug txiav txim rau tej yam lawv tau ua, seb lawv ua zoo los sis lawv ua phem—

5 Yog tias lawv ua zoo, ces mus rau txoj kev sawv rov los ntawm txoj sia uas kav ib txhis; thiab yog tias lawv ua phem, ces mus rau txoj kev sawv rov los ntawm txoj kev raug txim; vim ob txog kev mus ib seem, ib txoj nyob rau ib sab tes thiab lwm txoj nyob rau lwm sab tes, raws li txoj kev hlub tshua, thiab txoj kev txim lij, thiab txoj kev dawb huv uas yog Khetos muaj, tus uas muaj nyob ua ntej lub ntiaj teb chiv los.

6 Thiab nim no twb tsis muaj peev xwm sau tau rau hauv phau ntawv no ib nyuag feem pua ntawm tej uas Yexus yeej tau qhia rau cov neeg;

7 Tiam sis saib seb Nifais cov phiaj thiaj li ntim feem ntau ntawm tej uas nws tau qhia rau cov neeg.

8 Thiab kuv muab tej yam no sau tseg, uas yog ib feem tsawg dua ntawm tej uas nws tau qhia rau cov neeg; thiab kuv sau tej yam no nrog lub hom phiaj tias yuav rov coj tau tej no, los ntawm Lwm Haiv Neeg, los rau cov neeg no dua, raws li tej lus uas Yexus tau hais.

9 Thiab thaum lawv tau txais tej no, tej uas lawv yuav tsum xub muaj, los sim lawv txoj kev ntseeg, thiab yog tias lawv yuav ntseeg tej yam no ces yuav muab tej yam uas tseem ceeb dua no ua tshwm sim los rau lawv.

10 Thiab yog tias lawv yuav tsis ntseeg tej yam no, ces yuav muab tej yam uas tseem ceeb dua no tuav tseg tsis pub rau lawv, ua rau lawv raug txim.

11 Saib seb, kuv twb yuav luag sau tag nrho tej uas tseem ceeb dua ntawd, tej uas tau muab sau tag nrho rau hauv Nifais cov phiaj, tiam sis tus Tswv tsis pub, hais tias: Kuv yuav sim kuv cov neeg txoj kev ntseeg.

12 Yog li ntawd kuv, Maumoos, tsuas sau tej uas tus Tswv tau txib kuv. Thiab nim no kuv, Maumoos, yuav xaus kuv tej lus hais, thiab yuav mus sau tej uas tau txib kom kuv sau.

13 Yog li ntawd, kuv xav kom nej pom tias tus Tswv yeej tau qhia cov neeg tiag tiag, tau ncua li peb hnub; thiab tom qab ntawd nws tau ua nws tus kheej rau lawv pom ntau zaus, thiab tau ntais tej mov mog ntau zaus, thiab foom koob hmoov rau, thiab muab rau lawv noj.

14 Thiab tau muaj tias nws tau qhia thiab txhawb pab cov neeg coob coob cov me nyuam uas tau hais lawm, thiab nws tau ua rau lawv tej nplaig muag, thiab lawv tau hais lus rau lawv txiv txog tej yam tseem ceeb thiab zoo kawg nkaus, twb tseem ceeb dua tej uas nws tau ua rau cov neeg paub; thiab nws ua rau lawv tej nplaig muag xwv kom lawv yuav hais tau lus.

15 Thiab tau muaj tias tom qab nws nce mus rau saum ntuj ceeb tsheej lawm—zaum ob uas nws ua nws tus kheej rau lawv pom, thiab tau mus cuag Leej Txiv, tom qab tau kho tag nrho lawv cov neeg muaj mob, thiab lawv cov neeg ceg tawv, thiab qhib lawv cov neeg dig muag lub qhov muag thiab kho cov neeg lag ntseg hnov lus, thiab twb tau ua txhua yam kev kho mob nyob hauv lawv, thiab tsa tau ib tug neeg sawv hauv qhov tuag los, thiab tau ua nws lub hwj chim rau lawv pom, thiab tau nce mus cuag Leej Txiv—

16 Saib seb, tau muaj tias nyob rau tag kis pab neeg coob coob sib sau lawv tus kheej tuaj ua ke, thiab lawv pom thiab hnov cov me nyuam yaus no; muaj tseeb tiag, cov me nyuam mos liab los kuj tau qhib lawv lub qhov ncauj thiab hais tej yam zoo kawg nkaus; thiab tau txwv tsis pub ib tug neeg twg muab tej uas lawv hais ntawd sau cia.

17 Thiab tau muaj tias txij lub sij hawm ntawd mus cov thwj tim uas Yexus xaiv pib muab neeg ua kev cai raus dej thiab qhia tag nrho cov neeg uas los cuag lawv; thiab tag nrho cov uas ua kev cai raus dej los ntawm Yexus lub npe tau muaj tus Vaj Ntsuj Plig Dawb Huv puv npo.

18 Thiab lawv coob leej pom thiab hnov tej uas hais tsis tau tawm, tej uas tsis muaj cai kom muab sau cia.

19 Thiab lawv ib leeg qhia thiab txhawb pab ib leeg; thiab lawv muaj txhua yam zoo sib xws nyob hauv lawv, txhua tus neeg ib tug ua ncaj rau ib tug.

20 Thiab tau muaj tias lawv ua txhua yam ib yam li Yexus txib lawv.

21 Thiab lawv cov uas tau ua kev cai raus dej los ntawm Yexus lub npe hu ua Khetos lub koom txoos.