1 Thiab tau muaj tias xyoo cuaj caum tsib kuj tau dhau mus li no, thiab cov neeg pib hnov qab txog tej cim thiab tej txuj ci uas xav tsis thoob ntawd uas lawv tau hnov, thiab pib muab tej cim los sis tej kev xav tsis thoob uas los saum ntuj los saib tsis tshua muaj nuj nqis zuj zus, lawv thiaj pib ua lawv lub siab tawv, thiab lawv tsis thoob tsib to nrog, thiab pib tsis ntseeg tag nrho tej uas lawv tau hnov thiab tau pom—

2 Lam tau lam xav tej yam tsis muaj qab hau nyob hauv lawv lub siab, hais tias tej ntawd twb yog neeg ua thiab yog los ntawm tus dab phem lub hwj chim, los coj thiab ntxias kom tau cov neeg lub siab; thiab li no Dab Ntxwg Nyoog thiaj rov qab kav tau cov neeg lub siab dua, nws thiaj ua rau lawv qhov muag dig thiab coj lawv mus ntseeg tias Khetos txoj lus qhuab qhia yog ib yam uas ruam thiab tsis muaj qab hau.

3 Thiab tau muaj tias cov neeg tej kev phem thiab tej kev qias pib muaj zog zuj zus tuaj; thiab lawv tsis ntseeg tias yuav muaj tej cim los sis tej txuj ci uas xav tsis thoob ntxiv; thiab Dab Ntxwg Nyoog tau ncig mus, coj cov neeg lub siab mus, thiab haub ntxias lawv thiab ua rau lawv kom lawv ua kev phem loj heev nyob hauv thaj av.

4 Thiab xyoo cuaj caum rau tau dhau mus li no; thiab xyoo cuaj caum xya los tib yam; thiab xyoo cuaj caum yim los tib yam; thiab xyoo cuaj caum cuaj los tib yam;

5 Thiab ib puas xyoo twb tau dhau mus txij thaum lub caij nyoog ntawm Mauxiyas, tus uas yog vaj ntxwv kav cov Neeg Nifais.

6 Thiab rau puas thiab cuaj xyoo tau dhau mus txij thaum Lihais tau ncaim Yeluxalees.

7 Thiab cuaj xyoos tau dhau mus txij thaum lub caij uas tau muaj lub cim, uas cov yaj saub tau hais tseg tias, Khetos yuav los rau hauv lub ntiaj teb.

8 Nim no cov Neeg Nifais pib suav lawv lub sij hawm txij thaum lub caij no uas tus Tswv tau muab lub cim los, los sis txij thaum Khetos yuav los; yog li ntawd, cuaj xyoos tau dhau mus lawm.

9 Thiab Nifais, tus uas yog Nifais txiv, tus uas yog tus saib xyuas cov ceev xwm txheej, twb tsis rov qab los rau hauv thaj av Xalahelas, thiab nrhiav tsis tau nws nyob tag nrho hauv thaj av.

10 Thiab tau muaj tias cov neeg tseem nyob ua kev phem, txawm tias muaj kev qhuab qhia ntau thiab kev qhia tej yuav muaj los yav tom ntej uas tau xa mus rau hauv lawv; thiab xyoo kaum kuj tau dhau mus li no; thiab xyoo kaum ib kuj tau dhau mus nrog kev ua phem.

11 Thiab tau muaj tias nyob hauv xyoo kaum peb pib muaj tej kev ua rog thiab kev sib cav sib ceg thoob plaws hauv thaj av; vim cov tub sab Nkadi-atoos tau muaj coob heev, thiab tau tua cov neeg coob leej heev, thiab tau tso kev puas tsuaj rau ntau lub nroog heev, thiab tau ua rau neeg tuag thiab ntshav nrog ntau thoob plaws hauv thaj av, thiaj li tsim nyog rau tag nrho cov neeg, tsis hais cov Neeg Nifais los sis cov Neeg Lamas, yuav tsum nqa cuab yeej ua rog tawm tsam lawv.

12 Yog li ntawd, tag nrho cov Neeg Lamas uas tau hloov siab los ntseeg tus Tswv tau los koom ua ke nrog lawv cov kwv tij, uas yog cov Neeg Nifais, thiab raug yuam, kom lawv txoj sia thiab lawv cov poj niam thiab lawv cov me nyuam muaj kev nyab xeeb, kom nqa tej cuab yeej ua rog tawm tsam cov tub sab Nkadi-atoos ntawd, muaj tseeb tiag, thiab kom tswj tuav tau lawv tej kev muaj cai, thiab tej kev muaj cai ntawm lawv lub koom txoos thiab ntawm lawv txoj kev teev tiam, thiab lawv txoj kev ywj pheej thiab lawv txoj kev ywj siab.

13 Thiab tau muaj tias ua ntej thaum xyoo kaum peb no dhau mus txoj kev puas tsuaj huv tib si mus tau hawv cov Neeg Nifais vim yog npluav rog no, uas tau pib muaj kev nyuaj siab ntxhov plawv heev.

14 Thiab tau muaj tias tau muab cov Neeg Lamas uas los koom nrog cov Neeg Nifais suav nrog cov Neeg Nifais;

15 Thiab tus Tswv tau tshem tawm lawv txoj kev foom tsis zoo, thiab lawv tej tawv nqaij tau hloov los dawb zoo li cov Neeg Nifais;

16 Thiab lawv cov tub hluas thiab lawv cov ntxhais tau hloov los ua zoo nkauj zoo nraug heev, thiab cov Neeg Nifais suav lawv nrog cov Neeg Nifais, thiab hu lawv ua cov Neeg Nifais. Thiab xyoo kaum peb tau xaus li no.

17 Thiab tau muaj tias nyob rau thaum pib ntawm xyoo kaum plaub, npluav rog ntawm cov tub sab thiab Nifais cov neeg tau muaj ntxiv mus thiab los pib muaj kev nyuaj siab ntxhov plawv heev; txawm li ntawd los, Nifais cov neeg tau kov yeej cov tub sab ntau zaus, lawv thiaj raws tau cov tub sab tawm ntawm lawv tej av mus rau pem roob thiab rau pem lawv tej chaw tsis muaj neeg paub.

18 Thiab xyoo kaum plaub tau xaus li no. Thiab nyob hauv xyoo kaum tsib cov tub sab tau tawm los tawm tsam Nifais cov neeg; thiab vim yog txoj kev phem ntawm Nifais cov neeg, thiab lawv tej kev sib cav sib ceg thiab tej kev ntxeev siab, cov tub sab Nkadi-atoos tau kov yeej lawv ntau zaus.

19 Thiab xyoo kaum tsib tau xaus li no, thiab li no cov neeg tau nyob hauv qhov uas muaj kev txom nyem ntau; thiab rab ntaj ntawm kev puas tsuaj dai rawv ntawm lawv sab saud, ua rau lawv twb yuav luag raug rab ntaj ntawd muab txiav, thiab li no los twb vim yog lawv txoj kev ua phem.