1 Thiab nim no, saib seb, kuv hais rau nej tias, nej yuav tsum tshawb xyuas tej yam no. Muaj tseeb tiag, kuv muab ib lo lus txib rau nej tias nej yuav tsum rau siab ntso tshawb xyuas tej yam no; vim Yaxayas tej lus tseem ceeb heev.

2 Vim nws yeej hais tseeb qhia txhua yam ntsig txog kuv cov neeg uas yog tsev neeg Ixayees; yog li ntawd twb tsim nyog uas nws yuav tsum hais rau Lwm Haiv Neeg thiab.

3 Thiab txhua yam uas nws tau hais twb muaj lawm thiab tseem yuav muaj los, twb yog raws li tej lus uas nws tau hais.

4 Yog li ntawd cia li mloog kuv tej lus; sau cia tej uas kuv tau hais rau nej; thiab raws li Leej Txiv lub sij hawm thiab lub siab nyiam tej ntawd yeej yuav tawm mus rau Lwm Haiv Neeg.

5 Thiab tus uas yuav mloog kuv tej lus thiab hloov siab lees txim thiab ua kev cai raus dej, ces yuav cawm tus ntawd dim. Tshawb xyuas cov yaj saub tej lus, vim muaj coob leej uas ua tim khawv txog tej yam no.

6 Thiab nim no tau muaj tias thaum Yexus hais tej lus no tas nws hais rau lawv dua, tom qab nws tau piav ntxaws tag nrho cov vaj lug kub rau lawv tej uas lawv tau txais, nws hais rau lawv tias: Saib seb, kuv xav kom nej sau lwm cov vaj lug kub, tej uas nej tsis tau sau.

7 Thiab tau muaj tias nws hais rau Nifais tias: Cia li muab phau ceev xwm txheej uas koj tau ceev los.

8 Thiab thaum Nifais muab cov ceev xwm txheej tawm los, thiab muab tso rau ntawm nws xub ntiag, nws tsa qhov muag ntsia cov ceev xwm txheej thiab hais tias:

9 Kuv hais tseeb rau nej tias, kuv tau txib kuv tus tub qhe Xamuyees, uas yog tus Neeg Lamas, kom nws ua tim khawv rau cov neeg no tias, nyob rau hnub uas Leej Txiv yuav tau yeeb koob rau nws lub npe los ntawm kuv nyob rau hnub ntawd yuav muaj coob leej ntawm cov ntseeg uas yuav sawv hauv qhov tuag los, thiab yuav tshwm sim los rau coob leej pom, thiab yuav txhawb pab lawv. Thiab nws hais rau lawv tias: Puas tau muaj li ntawd?

10 Thiab nws cov thwj tim teb nws tias: Muaj li ntawd, tus Tswv, Xamuyees twb qhia tej yuav muaj los yav tom ntej raws li koj tej lus, thiab twb muaj raws li tej ntawd txhua nrho.

11 Thiab Yexus hais rau lawv tias: Vim li cas nej ho tsis tau muab tej yam no sau cia, hais tias muaj coob leej ntawm cov ntseeg tau sawv los thiab tau tshwm sim los rau coob leej pom thiab tau txhawb pab lawv?

12 Thiab tau muaj tias Nifais nco qab tias tsis tau muab tej yam no sau cia.

13 Thiab tau muaj tias Yexus txib kom muab tej yam ntawd sau cia; yog li ntawd thiaj tau muab tej ntawd sau cia raws li nws txib.

14 Thiab nim no tau muaj tias thaum Yexus ua tib zaug piav ntxaws tag nrho cov vaj lug kub, tej uas lawv muab sau cia, nws txib lawv kom lawv yuav tsum qhia tej uas nws tau piav rau lawv lawm.