1 Cuab pob ntseg, auj nej cov uas yog Lwm Haiv Neeg, thiab cia li mloog Yexus Khetos tej lus, Vajtswv tus uas muaj txoj sia nyob Leej Tub, tej uas nws tau txib kuv kom kuv hais txog nej, vim, saib seb nws tau txib kuv tias kom kuv yuav tsum sau, hais tias:

2 Tag nrho nej cov uas yog Lwm Haiv Neeg, cia li tig ntawm nej tej kev phem los; thiab hloov siab lees txim rau nej tej kev ua phem, ntawm nej tej kev dag thiab tej kev ntxias, thiab ntawm nej tej kev sib daj sib deev, thiab ntawm nej tej kev qias uas ntsiag to, thiab nej tej kev pe dab pe mlom, thiab ntawm nej tej kev tua neeg, thiab nej tej tswv yim xib hwb cuav, thiab nej tej kev xav tau luag tug, thiab nej tej kev sib cav sib ceg, thiab tig ntawm tag nrho nej tej kev phem thiab tej kev qias los, thiab cia li los cuag kuv, thiab ua kev cai raus dej los ntawm kuv lub npe, xwv kom nej yuav tau txais kev zam txim rau nej tej kev txhaum, thiab kom muaj tus Vaj Ntsuj Plig Dawb Huv puv npo, xwv kom yuav suav nej nrog kuv cov neeg uas yog tsev neeg Ixayees.