1 Saib seb, nim no tau muaj tias thaum Yexus tau hais tej lus no tas lawm nws rov ntsia ib puag ncig ntawm cov neeg coob coob, thiab nws hais rau lawv tias: Saib seb, twb txog kuv lub sij hawm lawm.

2 Kuv pom tias nej qaug zog, pom tias nej tsis muaj peev xwm to taub tag nrho kuv tej lus uas Leej Txiv txib kom kuv hais rau nej nyob rau lub sij hawm no.

3 Yog li ntawd, nej cia li mus rau tom nej lub vaj lub tsev, thiab ua tib zoo xav txog tej yam uas kuv tau hais, thiab thov Leej Txiv, los ntawm kuv lub npe, xwv kom nej yuav to taub, thiab npaj nej lub siab rau tag kis, thiab kuv yuav rov los cuag nej dua.

4 Tiam sis nim no kuv yuav mus cuag Leej Txiv, thiab kuj yuav mus ua kuv tus kheej rau tej xeem neeg Ixayees uas ploj lawm pom, vim rau Leej Txiv lawv twb tsis ploj, vim nws yeej paub qhov chaw uas nws tau coj lawv mus.

5 Thiab tau muaj tias thaum Yexus hais li no tas lawm, nws rov tsa nws lub qhov muag ntsia ib puag ncig ntawm cov neeg coob coob, thiab pom tias lawv los kua muag, thiab ntsia ntsoov nws zoo li lawv xav thov kom nws nrog lawv nyob ib nyuag ntev me ntsis.

6 Thiab nws hais rau lawv tias: Saib seb, kuv lub siab muaj kev khuv leej puv npo rau nej.

7 Nej puas muaj neeg mob nyob hauv nej? Coj lawv los ntawm no. Nej puas muaj neeg ceg tawv, los sis dig muag, los sis neeg khoov duav, los sis neeg tu ceg tu npab, los sis neeg mob ruas, los sis cov uas qhuav tes qhuav taw, los sis cov uas lag ntseg, los sis cov uas raug txom nyem ib yam dab tsi? Coj lawv los ntawm no thiab kuv yuav kho kom lawv zoo, vim kuv muaj kev khuv leej rau nej; kuv lub siab muaj kev hlub tshua puv npo.

8 Vim kuv pom tias nej xav kom kuv ua rau nej pom tej yam uas kuv tau ua rau nej cov kwv tij nyob tim Yeluxalees, vim kuv pom tias nej txoj kev ntseeg twb muaj txaus rau kuv kho kom nej zoo.

9 Thiab tau muaj tias thaum nws hais li no tas lawm, tag nrho cov neeg coob coob, ua ib ke, coj lawv tej neeg muaj mob mus thiab lawv tej neeg uas raug txom nyem, thiab lawv tej neeg ceg tawv, thiab nrog rau lawv tej neeg dig muag, thiab nrog rau lawv tej neeg hais tsis tau lus, thiab nrog rau tag nrho lawv tej neeg uas raug txom nyem txhua yam; thiab nws kho tau lawv txhua tus zoo thaum lawv coj cov neeg no mus rau nws.

10 Thiab lawv txhua tus, tsis hais cov uas nws kho tau zoo thiab cov uas tsis muaj mob, cia li qhau cev rau ntawm nws ko taw, thiab teev tiam nws; thiab txawm hais tias muaj cov neeg coob coob los tag nrho cov uas muaj peev xwm txav los ze tau nwj nws txhais ko taw, lawv tej kua muag thiaj tau los ntxuav nws txhais ko taw.

11 Thiab tau muaj tias nws txib kom lawv coj lawv cov me nyuam yaus los.

12 Yog li ntawd lawv thiaj coj lawv cov me nyuam yaus los thiab cia lawv zaum hauv av ib puag ncig nws, thiab Yexus sawv ntsug hauv nruab nrab; thiab cov neeg coob coob txav kev txog rau thaum uas tau coj tag nrho cov me nyuam yaus los rau nws.

13 Thiab tau muaj tias thaum uas tau coj lawv tag nrho los lawm, thiab Yexus sawv ntsug hauv nruab nrab, nws txib kom cov neeg coob coob cia li txhos caug rau hauv av.

14 Thiab tau muaj tias thaum lawv txhos caug rau hauv av lawm, Yexus ntsaj nyob hauv nws nruab siab, thiab hais tias: Leej Txiv, kuv nyuaj siab vim yog cov neeg ntawm tsev neeg Ixayees txoj kev phem.

15 Thiab thaum nws hais cov lus no tas, nws kuj txhos caug rau hauv av thiab; thiab saib seb nws thov Leej Txiv, thiab sau tsis tau tej lus uas nws siv los thov, thiab cov neeg coob coob cov uas hnov nws tau ua tim khawv.

16 Thiab lawv ua tim khawv raws li no hais tias: Yav tas los, lub qhov muag yeej ib txwm tsis tau pom, thiab lub pob ntseg los ib txwm tsis tau hnov, tej yam tseem ceeb thiab zoo kawg nkaus ib yam li peb pom thiab hnov Yexus hais rau Leej Txiv;

17 Thiab twb tsis muaj ib tug nplaig uas txawj hais, thiab twb tsis muaj ib tug neeg uas txawj sau, thiab neeg lub siab twb tsis muaj peev xwm to taub txog tej yam tseem ceeb thiab zoo kawg nkaus ib yam li peb pom thiab hnov Yexus hais; thiab twb tsis muaj leej twg to taub txog txoj kev xyiv fab uas muaj puv npo rau peb tus ntsuj plig nyob rau lub sij hawm uas peb tau hnov nws thov Leej Txiv rau peb.

18 Thiab tau muaj tias thaum Yexus thov Leej Txiv tas lawm, nws sawv; tiam sis cov neeg coob coob txoj kev xyiv fab loj kawg nkaus ua rau lawv tsis muaj zog sawv.

19 Thiab tau muaj tias Yexus hais rau lawv, thiab hais kom lawv sawv.

20 Thiab lawv sawv hauv av los, thiab nws hais rau lawv tias: Nej tau koob hmoov vim yog nej txoj kev ntseeg. Thiab nim no saib seb, kuv txoj kev xyiv fab twb puv npo.

21 Thiab thaum nws tau hais cov lus no tas, nws quaj, thiab cov neeg coob coob ua tim khawv txog qhov no, thiab nws foom koob hmoov rau lawv cov me nyuam yaus, ib tug dhau ib tug, thiab thov Leej Txiv rau lawv.

22 Thiab thaum nws ua li no tas lawm nws rov quaj dua;

23 Thiab nws hais rau cov neeg coob coob, thiab hais rau lawv tias: Saib seb nej cov me nyuam yaus.

24 Thiab thaum lawv ntsia kom saib lawv tsa lawv qhov muag mus rau saum ntuj, thiab lawv pom rooj ntug qhib, thiab lawv pom cov tim tswv nqis saum ntuj ceeb tsheej los zoo li lawv nyob hauv plawv hluav taws; thiab lawv nqis los thiab vij ib puag ncig ntawm cov me nyuam ntawd, thiab lawv raug hluav taws vij ib puag ncig; thiab cov tim tswv txhawb pab lawv.

25 Thiab cov neeg coob coob tau pom thiab hnov thiab ua tim khawv; thiab lawv paub tias lawv tej lus tim khawv yeej muaj tseeb vim lawv txhua tus tau pom thiab hnov, txhua tus nyias pom rau nyias tus kheej; thiab lawv muaj kwv yees li ob txhiab thiab tsib puas leej; thiab lawv muaj txiv neej, poj niam, thiab me nyuam yaus.