1 Thiab nim no saib seb, tau muaj tias tag nrho cov neeg ntawm thaj av hnov, thiab ua tim khawv txog tej lus hais no. Thiab tom qab tau hais lus no tas lawm txhua yam ntsiag to nyob hauv thaj av ncua tau ntau teev;

2 Vim cov neeg txoj kev xav tsis thoob loj heev ua rau lawv cia li tsum tsis quaj nyiav thiab quaj nrov rau lawv tej neeg txheeb ze uas tau tuag; yog li ntawd txhua yam ntsiag to nyob hauv tag nrho thaj av ncua tau ntau teev.

3 Thiab tau muaj tias rov muaj ib lub suab los hais rau cov neeg dua, thiab tag nrho cov neeg hnov, thiab ua tim khawv txog lub suab ntawd, uas hais tias:

4 Auj nej cov neeg ntawm tej nroog loj no uas tau vau, cov uas yog Yakhauj tej xeeb leej xeeb ntxwv, muaj tseeb tiag, cov uas yog tsev neeg Ixayees, ntau zaus kuv twb sau nej los ib yam li ib tug poj qaib sau nws cov me nyuam los rau hauv nws qab tis, thiab tau tu nej.

5 Thiab ntxiv, ntau zaus kuv twb xav sau nej los ib yam li ib tug poj qaib sau nws cov me nyuam los rau hauv nws qab tis, muaj tseeb tiag, auj nej cov neeg ntawm tsev neeg Ixayees, cov uas tau vau; muaj tseeb tiag, auj nej cov neeg ntawm tsev neeg Ixayees, nej cov uas nyob rau tom Yeluxalees, thiab nej cov uas tau vau; muaj tseeb tiag, ntau zaus kuv twb xav sau nej los ib yam li ib tug poj qaib sau nws cov me nyuam, thiab nej tsis kam.

6 Auj nej uas yog tsev neeg Ixayees uas kuv tseg cia, ntau zaus kuv yuav sau nej los ib yam li ib tug poj qaib sau nws cov me nyuam los rau hauv nws qab tis, yog tias nej yuav hloov siab lees txim thiab tig rov qab los cuag kuv kawg siab kawg ntsws.

7 Tiam sis yog tsis li ntawd, auj tsev neeg Ixayees es, nej tej chaw nyob yuav hloov los ua tej chaw tsis muaj neeg nyob kom txog thaum lub sij hawm uas yuav muaj raws li nej cov yawg koob tej kev khi lus.

8 Thiab nim no tau muaj tias tom qab cov neeg hnov tej lus no tas lawm, saib seb, lawv rov pib quaj nyiav thiab quaj nrov vim lawv cov neeg txheeb ze thiab cov phooj ywg xiam tas.

9 Thiab tau muaj tias peb hnub tau dhau mus li no. Thiab twb yog thaum sawv ntxov, thiab qhov tsaus ntuj tau ploj ntawm thaj av mus, thiab lub ntiaj teb tau tsum tsis tshee, thiab tej pob zeb tau tsum tsis tawg, thiab txoj kev nroo txaus ntshai heev tau tsum, thiab tag nrho tej suab nrov ua tsuj ua tsaug tau tsum.

10 Thiab lub ntiaj teb rov los sib npuab ua ke dua, lub ntiaj teb thiaj li nyob ruaj khov; thiab txoj kev quaj ntsuag, thiab txoj kev nyiav, thiab txoj kev qw nrov ntawm cov neeg uas Khetos tseg kom muaj sia tau tsum; thiab lawv txoj kev quaj ntsuag tau hloov los ua kev xyiv fab, thiab lawv txoj kev quaj nyiav tau hloov los ua kev qhuas thiab kev ua tsaug rau tus Tswv Yexus Khetos, lawv tus Txhiv Dim.

11 Thiab tau muaj raws li cov vaj lug kub uas cov yaj saub hais tiav los txog txij no.

12 Thiab cov neeg uas dim twb yog feem uas ncaj ncees dua, thiab twb yog lawv cov uas txais tos cov yaj saub thiab tsis xuas pob zeb ntaus lawv; thiab cov uas Khetos tseg cia twb yog lawv cov uas tsis ua rau cov ntseeg ntshav nrog—

13 Thiab Khetos tau tseg lawv cia thiab tsis ua rau lawv saus thiab raug faus rau hauv av; thiab tsis ua rau lawv poob dej tuag rau hauv qab thu dej hiav txwv; thiab tsis xuas hluav taws hlawv lawv, thiab tsis tau cia dab tsi poob los rau lawv muab lawv tsuam kom tuag; thiab tsis cia lawv raug tej khaub zig cua ntsawj mus; thiab tsis cia kom tej pa taws thiab tej huab ntawm kev tsaus ntuj kov yeej lawv.

14 Thiab nim no, tus uas nyeem, cia tus ntawd to taub; tus uas tau tej vaj lug kub, cia nws tshawb xyuas tej ntawd, thiab kom pom thiab ntsia saib tag nrho tej kev tuag no thiab tej kev puas tsuaj los ntawm hluav taws, thiab los ntawm pa taws, thiab los ntawm tej cua daj cua dub, thiab los ntawm tej khaub zig cua, thiab los ntawm tej av qhib txais lawv, thiab seb tag nrho tej yam no puas yog muaj raws li cov yaj saub dawb huv coob leej tej kev qhia tej yuav muaj los yav tom ntej.

15 Saib seb, kuv hais rau nej tias, Muaj tseeb tiag, muaj coob leej tau ua tim khawv txog tej yam no thaum Khetos los, thiab raug tua vim yog lawv ua tim khawv txog tej yam no.

16 Muaj tseeb tiag, tus yaj saub Xenos tau ua tim khawv txog tej yam no, thiab Xenoj kuj hais txog tej yam no thiab, vim nkawd ua tim khawv txog peb, cov uas yog cov seem tshuav ntawm lawv cov tub ki.

17 Saib seb, peb tus yawg koob Yakhauj kuj ua tim khawv txog ib co seem tshuav ntawm Yauxej cov tub ki. Thiab saib seb, peb puas yog ib co uas seem tshuav ntawm Yauxej cov tub ki? Thiab tej yam no uas ua tim khawv txog peb, puas yog tau muab tej ntawd sau rau saum cov phiaj toog uas peb tus yawg koob Lihais nqa tawm ntawm Yeluxalees tuaj?

18 Thiab tau muaj tias nyob rau thaum kawg ntawm xyoo peb caug plaub, saib seb, kuv yuav qhia rau nej paub txog Nifais cov neeg uas Khetos tseg cia, thiab cov uas muab hu ua cov Neeg Lamas, cov uas Khetos tseg cia, hais tias Khetos tau muab ntau yam zoo heev rau lawv, thiab foom tej koob hmoov tseem ceeb heev rau saum lawv tej taub hau, tsis ntev tom qab Khetos tau nce mus rau saum ntuj ceeb tsheej lawm nws thiaj ua nws tus kheej tshwm sim los rau lawv pom tiag tiag—

19 Cia rau lawv pom nws lub cev, thiab qhuab qhia rau lawv; thiab txij no mus yuav sau txog ib zaj ntawm nws txoj kev qhuab qhia. Yog li ntawd rau lub sij hawm no kuv xaus kuv tej lus hais.