Phau Ntawv Yaloos

1 Nim no saib seb, kuv, Yaloos, sau ob peb lo lus raws li kuv txiv, Enos, txoj lus txib, xwv kom yuav ceev tau peb tej caj ceg tseg.

2 Thiab vim yog cov phiaj no me me, thiab vim yog tau muab tej yam no sau cia xwv kom yuav pab tau peb cov kwv tij, cov Neeg Lamas, yog li ntawd, tsim nyog uas kuv yuav tsum sau ib qho me me; tiam sis kuv yuav tsis sau txog kuv tej kev qhia tej yuav muaj los yav tom ntej los sis txog kuv tej kev tshwm sim. Puas tshuav dab tsi ntxiv uas kuv yuav sau tau tshaj tej uas kuv cov yawg koob twb sau lawm? Puas yog lawv twb qhia txog txoj hau kev cawm seej? Kuv hais rau nej tias, yog; thiab qhov no txaus kuv siab lawm.

3 Saib seb, tsim nyog kom ua ntau yam nyob hauv cov neeg no, vim yog lawv lub siab tawv, thiab lawv lag ntseg, thiab lawv tsis thoob tsib to nrog, thiab lawv caj dab tawv; txawm li ntawd los, Vajtswv tseem hlub tshua lawv kawg li, thiab tseem tsis tau muab lawv tshoob tawm ntawm thaj av mus.

4 Thiab muaj ntau tus nyob hauv peb uas tau txais kev tshwm sim ntau, vim tsis yog lawv txhua tus tawv ncauj. Thiab tag nrho cov uas tsis tawv ncauj thiab muaj kev ntseeg, lawv yuav muaj kev sib raug zoo nrog tus Ntsuj Plig Dawb Huv, uas ua tshwm sim rau noob neej, raws li lawv txoj kev ntseeg.

5 Thiab nim no, saib seb, ob puas xyoo tau dhau mus, thiab Nifais cov neeg tau peem tsheej muaj zog nyob hauv thaj av. Lawv ua tib zoo ua raws li Mauxes txoj kev cai thiab hwm hnub caiv kom dawb huv rau tus Tswv. Thiab lawv tsis hais lus phem thiab tsis ua phem; thiab lawv tsis hais lus saib tsis taus Vajtswv. Thiab tej kev cai ntawm thaj av nruj heev kawg li.

6 Thiab lawv tawg khiav ri niab mus nyob rau ntau qhov chaw hauv thaj av, thiab cov Neeg Lamas thiab. Thiab lawv tau muaj coob tshaj dua li lawv cov uas yog Neeg Nifais; thiab lawv nyiam tua neeg thiab nyiam haus ntshav tsiaj.

7 Thiab tau muaj tias lawv tau tuaj tawm tsam peb, uas yog Neeg Nifais ntau zaus, kom sib ntaus sib tua. Tiam sis peb cov vaj ntxwv thiab peb cov thawj coj yog ib co neeg muaj hwj chim los ntawm lawv txoj kev ntseeg tus Tswv; thiab lawv tau qhia tus Tswv tej kev rau cov neeg; yog li ntawd, peb tau kov yeej cov Neeg Lamas thiab tshoob lawv tawm ntawm peb tej thaj av mus, thiab tau pib ua kom peb tej nroog muaj zog ntxiv tuaj, los sis txhua qhov chaw uas yog peb qub txeeg qub teg.

8 Thiab peb tau huaj vam heev, thiab ri mus rau hauv thaj av, thiab muaj kub, thiab muaj nyiaj, thiab muaj tej khoom muaj nuj nqis, thiab muaj tej khoom zoo nkauj uas muab ntoo ua, muaj vaj tse, thiab muaj khoom tshuab, thiab kuj muaj hlau thiab tooj liab, thiab tooj dag thiab kab, ua txhua txhia yam twj tes los ncaws teb, thiab cuab yeej ua rog—muaj tseeb tiag, tej xub muaj hau ntse, thiab raj ntim xub, thiab xub nkaug, thiab hmuv nkaug, thiab ua txhua yam uas npaj rau kev ua rog.

9 Thiab yog li ntawd vim peb tau npaj tos cov Neeg Lamas, lawv tsis tau kov yeej peb. Tiam sis tau pom tias tus Tswv txoj lus yeej muaj tseeb, uas nws hais rau peb cov yawg koob, hais tias: Npaum li uas nej yuav ua raws li kuv tej lus txib nej yuav vam meej nyob hauv thaj av.

10 Thiab tau muaj tias tus Tswv cov yaj saub tau ceeb toom Nifais cov neeg, raws li Vajtswv txoj lus tias, yog lawv tsis ua raws li tej lus txib, thiab poob mus rau kev ua txhaum, lawv yuav raug puas tsuaj tawm ntawm thaj av mus.

11 Yog li ntawd, cov yaj saub, thiab cov pov thawj, thiab cov xib hwb, tau rau siab ntso ua hauj lwm, ua tag nrho siab ntev txhawb ntuas kom cov neeg rau siab ntso; qhia Mauxes txoj kev cai, thiab lub ntsiab uas tau muab txoj kev cai ntawd los; yaum kom lawv tos ntsoov tus Mexiyas, thiab ntseeg tias nws yuav los kom zoo li nws twb los lawm. Thiab lawv tau qhia li no rau cov neeg.

12 Thiab tau muaj tias los ntawm kev ua li no lawv tau cheem cov neeg kom txhob raug puas tsuaj nyob rau hauv thaj av; vim lawv tau muab txoj lus chob cov neeg lub siab, txhaub cov neeg tsis tu ncua kom hloov siab lees txim.

13 Thiab tau muaj tias ob puas thiab peb caug yim xyoo tau dhau mus—hauv lub caij muaj tej kev ua rog, thiab kev sib cav sib ceg, thiab kev tsis sib haum xeeb, tau muaj ntev loo hauv lub caij nyoog ntawd.

14 Thiab kuv, Yaloos, tsis sau ntxiv lawm, vim cov phiaj me me. Tiam sis saib seb, kuv cov kwv tij, nej nyeem tau Nifais lwm cov phiaj; vim saib seb, tau muab tej xwm txheej ntawm peb tej kev ua rog sau rau saum cov phiaj ntawd, raws li cov vaj ntxwv tej kev sau, los sis tej uas lawv kom sau.

15 Thiab kuv muab cov phiaj no rau kuv tus tub Oonis txhais tes, xwv kom yuav ceev tau cov phiaj raws li kuv cov yawg koob tej lus txib.