Phau Ntawv Oonis

1 Saib seb, tau muaj tias kuv txiv, Yaloos, tau txib kuv, Oonis, hais tias kuv yuav tsum sau qhov me ntsis rau saum cov phiaj no, kom ceev tau peb tej keeb kwm tseg—

2 Yog li ntawd, nyob rau hauv kuv lub neej, kuv xav kom nej paub tias kuv tau siv ntaj sib ntaus sib tua ntau zaus kom tsom kwm kuv cov neeg, cov Neeg Nifais, kom tsis txhob poob mus rau lawv cov yeeb ncuab tes, uas yog cov Neeg Lamas. Tiam sis saib seb, kuv tus kheej yog ib tug neeg phem, thiab kuv tsis tau coj tus Tswv tej kev cai thiab tej lus txib ib yam li tsim nyog rau kuv ua.

3 Thiab tau muaj tias ob puas thiab xya caum rau xyoo tau dhau mus, thiab peb muaj ntau lub caij uas muaj kev thaj yeeb; thiab peb muaj ntau lub caij uas muaj kev ua rog hnyav thiab nqaij ntuag ntshav nrog. Muaj tseeb tiag, lub ntsiab yog li no, ob puas yim caum ob xyoos tau dhau mus, thiab kuv tau ceev cov phiaj no raws li kuv tej yawg koob tej lus txib; thiab kuv muab cov phiaj rau kuv tus tub Amaloo. Thiab kuv xaus lus.

4 Thiab nim no kuv, Amaloo, sau txhua yam uas kuv sau, uas tsis ntau, rau hauv kuv txiv phau ntawv.

5 Saib seb, tau muaj tias peb puas thiab nees nkaum xyoo tau dhau mus, thiab feem phem zog ntawm cov Neeg Nifais tau raug puas tsuaj lawm.

6 Vim tus Tswv yuav tsis cia, tom qab nws tau coj lawv tawm ntawm thaj av Yeluxalees thiab ceev thiab tsom kwm lawv kom tsis txhob poob mus rau lawv cov yeeb ncuab tes, muaj tseeb tiag, nws tsis kam cia tej lus no yuav tsis muaj tseeb, tej uas nws tau hais rau peb tej yawg koob, hais tias: Npaum li uas nej tsis ua raws li kuv tej lus txib nej yuav tsis vam meej nyob hauv thaj av.

7 Yog li ntawd, tus Tswv tau los xyuas lawv nrog kev txiav txim hnyav, txawm li ntawd los, nws tau tseg cia cov neeg ncaj ncees xwv kom lawv tsis txhob piam sij, tiam sis tau coj lawv dim tawm ntawm lawv cov yeeb ncuab tes.

8 Thiab tau muaj tias kuv tau muab cov phiaj rau kuv tus kwv Khemis.

9 Nim no kuv, Khemis, sau tej yam me ntsis uas kuv sau, rau hauv tib phau ntawv nrog kuv tus tij laug; vim saib seb, kuv tau pom qhov kawg uas nws sau, pom tias nws sau nws qhov ntawd nrog nws txhais tes kiag; thiab nws sau qhov ntawd nyob rau hnub uas nws muab cov phiaj rau kuv. Thiab peb ceev cov ceev xwm txheej li no, vim ua li no yog raws li peb cov yawg koob tej lus txib. Thiab kuv xaus lus.

10 Saib seb, kuv, Apinadoos, yog Khemis tus tub. Saib seb, tau muaj tias kuv pom kev ua rog thiab kev sib cav sib ceg ntau ntawm kuv cov neeg, cov Neeg Nifais, thiab cov Neeg Lamas; thiab kuv, nrog kuv rab ntaj, tau muab cov Neeg Lamas ntau tus txoj sia txo thaum kuv tiv thaiv kuv cov kwv tij.

11 Thiab saib seb, tau muab phau ceev xwm txheej ntawm cov neeg no sau rau saum cov phiaj uas tej vaj ntxwv tau, raws li tej tiam vaj ntxwv; thiab kuv tsis muaj kev tshwm sim, thiab kev qhia tej yuav muaj los yav tom ntej, tsuas yog tej uas twb muab sau cia lawm xwb; yog li ntawd, tej uas tau muab sau yeej txaus lawm. Thiab kuv xaus lus.

12 Saib seb, kuv yog Amalej, Apinadoos tus tub. Saib seb, kuv yuav hais rau nej ntsig txog Mauxiyas, tus uas tau los ua vaj ntxwv saib xyuas thaj av Xalahelas; vim saib seb, tus Tswv tau ceeb toom kom nws khiav tawm ntawm thaj av Nifais mus, thiab tag nrho cov uas yuav mloog tus Tswv lub suab yuav tsum nrog nws khiav tawm ntawm thaj av, mus rau hauv hav zoov—

13 Thiab tau muaj tias nws tau ua raws li tus Tswv tau txib nws. Thiab lawv khiav tawm ntawm thaj av mus rau hauv hav zoov, tag nrho cov uas yuav mloog tus Tswv lub suab; thiab ntau txoj kev qhuab qhia thiab ntau txoj kev qhia tej yuav muaj los yav tom ntej tau coj lawv kev. Thiab Vajtswv txoj lus qhia lawv tsis tu ncua thiab lub hwj chim ntawm nws txhais npab coj lawv, mus dhau hauv hav zoov txog rau thaum lawv mus rau hauv thaj av uas hu ua thaj av Xalahelas.

14 Thiab lawv tau ntsib ib pab neeg, uas hu ua cov neeg Xalahelas. Nim no, muaj kev zoo siab heev nyob hauv cov neeg Xalahelas; thiab Xalahelas zoo siab kawg nkaus, vim yog tus Tswv tau xa Mauxiyas cov neeg nrog cov phiaj toog uas muaj cov Neeg Yudais phau ceev xwm txheej.

15 Saib seb, tau muaj tias Mauxiyas kawm tias cov neeg Xalahelas tau tawm tim Yeluxalees tuaj thaum lub caij uas Xedekiyas, uas yog Yudas tus vaj ntxwv, raug txhom cab mus rau hauv Npanpiloos.

16 Thiab lawv tau tsiv nyob hauv hav zoov, thiab tus Tswv txhais tes coj lawv hla cov dej loj, mus rau hauv thaj av uas Mauxiyas ntsib lawv; thiab lawv tau nyob ntawd txij li lub caij ntawd los.

17 Thiab nyob rau lub caij uas Mauxiyas ntsib lawv, lawv tau huaj vam coob kawg li. Txawm li ntawd los, lawv tau muaj tej kev ua rog ntau thiab tej kev sib cav sib ceg hnyav heev, thiab tau raug tua los ntawm ntaj riam tej lub sij hawm; thiab lawv tej lus tau sib txuam tsis zoo tas; thiab lawv nqa tsis tau tej ceev xwm txheej nrog lawv tuaj; thiab lawv tsis lees tias muaj tus uas Tsim lawv; thiab Mauxiyas, thiab Mauxiyas cov neeg, kuj tsis muaj peev xwm to taub lawv.

18 Tiam sis tau muaj tias Mauxiyas txib kom yuav tsum qhia nws yam lus rau lawv. Thiab tau muaj tias tom qab lawv kawm Mauxiyas yam lus, Xalahelas muab ib zaj qhia caj ceg txog nws cov yawg koob, raws li nws lub cim xeeb; thiab tau muab zaj qhia caj ceg ntawd sau cia, tiam sis tsis yog sau rau hauv cov phiaj no.

19 Thiab tau muaj tias cov neeg Xalahelas, thiab cov neeg Mauxiyas, tau sib sau ua ib ke; thiab tau tsa Mauxiyas los ua lawv tus vaj ntxwv.

20 Thiab tau muaj tias nyob rau hauv Mauxiyas lub caij, cov neeg Xalahelas coj ib lub pob zeb loj uas muaj cov ntawv kos rau saud los rau nws; thiab nws tau txhais cov ntawv kos ntawd los ntawm Vajtswv lub txiaj ntsim thiab lub hwj chim.

21 Thiab cov ntawv kos ntawd qhia txog ib tug neeg hu ua Khauli-athumaws, thiab txog nws cov neeg uas raug tua. Thiab cov neeg Xalahelas nrhiav tau Khauli-athumaws; thiab nws nrog lawv nyob tau cuaj lub hlis.

22 Cov ntawv ntawd kuj qhia me ntsis txog nws cov yawg koob. Thiab nws thawj nkawm niam txiv tau tawm tim tus pej thuam tuaj, thaum lub sij hawm tus Tswv ua rau cov neeg nyias tsis nkag siab nyias yam lus; thiab tus Tswv txoj kev txiav txim hnyav tau raug lawv raws li nws tej kev txiav txim, uas ncaj ncees; thiab lawv tej pob txha tso ua sab ua sua nyob rau hauv thaj av sab qaum teb.

23 Saib seb, kuv, Amalej, tau yug los nyob rau hauv Mauxiyas lub caij; thiab kuv tau nyob pom nws tuag; thiab Npeyamis, nws tus tub, tau pauv nws qhov chaw los kav.

24 Thiab saib seb, kuv tau pom, nyob rau hauv vaj ntxwv Npeyamis lub caij, ib txoj kev ua rog hnyav heev thiab muaj nqaij ntuag ntshav nrog ntau heev ntawm cov Neeg Nifais thiab cov Neeg Lamas. Tiam sis saib seb, cov Neeg Nifais tau tawm tsam yeej lawv; muaj tseeb tiag, vaj ntxwv Npeyamis ntiab lawv tawm ntawm thaj av Xalahelas mus.

25 Thiab tau muaj tias kuv pib laus; thiab, vim tias kuv tsis muaj ib tug tub ki li, thiab vim kuv paub tias vaj ntxwv Npeyamis yog ib tug neeg ncaj ncees rau tus Tswv, yog li ntawd, kuv yuav muab cov phiaj no rau nws, ntuas kom neeg txhua tus los cuag Vajtswv, Ixayees tus Dawb Huv, thiab ntseeg tej kev qhia tej yuav muaj los yav tom ntej, thiab ntseeg tej kev tshwm sim, thiab ntseeg cov tim tswv txoj kev los txhawb pab, thiab ntseeg lub txiaj ntsim ntawm txoj kev hais lwm yam lus, thiab ntseeg lub txiaj ntsim ntawm txoj kev txawj txhais lus, thiab ntseeg txhua txhia yam uas zoo; vim tsis muaj ib yam dab tsi zoo li tsuas yog yam uas los ntawm tus Tswv los xwb; thiab yam uas phem yog los ntawm tus dab phem los.

26 Thiab nim no, kuv cov kwv tij uas kuv hlub es, kuv xav kom nej cia li los cuag Khetos, tus uas yog Ixayees tus Dawb Huv, thiab los txais nws txoj kev cawm seej, thiab lub hwj chim ntawm nws txoj kev txhiv dim. Muaj tseeb tiag, cia li los cuag nws, thiab muab tag nrho nej lub siab lub ntsws ua kev tiam pub rau nws, thiab ua kev yoo mov thiab thov Vajtswv tsis tu ncua, thiab nyiaj mus kom txog thaum kawg; thiab ib yam li tus Tswv muaj txoj sia nyob yeej yuav cawm nej dim.

27 Thiab nim no kuv yuav hais me ntsis txog cov uas tau mus rau pem hav zoov rov qab mus rau thaj av Nifais; vim tau muaj ib co neeg coob heev uas xav tau thaj av uas yog lawv qub txeeg qub teg.

28 Yog li ntawd, lawv tau mus rau pem hav zoov. Thiab vim lawv tus thawj yog ib tug neeg muaj zog thiab muaj hwj chim, thiab ib tug neeg tawv ncauj, yog li ntawd nws ua kom muaj kev sib cav sib ceg nyob hauv lawv; thiab lawv raug tua tuag tag, tsuas yog tshuav tsib caug leej, nyob hauv hav zoov, thiab lawv rov qab los rau hauv thaj av Xalahelas.

29 Thiab tau muaj tias lawv kuj coj lwm tus neeg coob, thiab lawv rov mus dua rau hauv hav zoov.

30 Thiab kuv, Amalej, muaj ib tug kwv, uas nrog lawv mus thiab; thiab txij li ntawd los kuv tsis paub txog lawv li lawm. Thiab kuv twb yuav mus pw rau hauv kuv lub qhov ntxa; thiab cov phiaj no twb puv lawm. Thiab kuv xaus kuv cov lus hais.