Phau Ntawv Enos

1 Saib seb, tau muaj tias kuv, Enos, paub tias kuv txiv nws yog ib tug neeg ncaj—rau qhov nws qhia kuv txog nws yam lus, thiab qhia kuv raws li tus Tswv tej kev cob qhia thiab kev qhuab ntuas—thiab cia li qhuas kuv tus Vajtswv lub npe vim yog tej yam ntawd—

2 Thiab kuv yuav qhia nej txog txoj kev sib zog rau Vajtswv, ua ntej kuv tau txais txoj kev zam txim rau kuv tej kev txhaum.

3 Saib seb, kuv tau mus tua tsiaj qus nyob rau hauv hav zoov; thiab tej lus uas ntau lub sij hawm kuv tau hnov kuv txiv hais txog txoj sia nyob mus ib txhis, thiab txoj kev xyiv fab ntawm cov ntseeg, nkag mus tob rau hauv kuv lub siab.

4 Thiab kuv tus ntsuj plig ntshaw; thiab kuv txhos caug ntawm tus uas Tsim kuv lub xub ntiag, thiab kuv thov nws thov tas zog thiab thov pab rau kuv tus kheej tus ntsuj plig; thiab kuv thov nws tas hnub; muaj tseeb tiag, thiab thaum uas twb tsaus ntuj lawm los kuv tseem tsa kuv lub suab siab kom mus txog ntua puag saum ntuj.

5 Thiab muaj ib lub suab los rau kuv, hais tias: Enos, twb zam txim rau koj tej kev txhaum lawm, thiab koj yuav tau koob hmoov.

6 Thiab kuv, Enos, paub tias Vajtswv yeej dag tsis taus; yog li ntawd, kuv txoj kev muaj txim ploj huv tib si.

7 Thiab kuv hais tias: Tus Tswv, ua li cas thiaj ua tau li ntawd?

8 Thiab nws hais rau kuv tias: Vim yog koj txoj kev ntseeg Khetos, tus uas yav tas los koj ib txwm tsis tau hnov los sis pom dua li. Thiab ntau xyoo yuav dhau mus ua ntej nws yuav ua nws tus kheej tshwm los ntawm cev nqaij daim tawv; yog li ntawd, cia li mus, koj txoj kev ntseeg tau ua rau koj huv.

9 Nim no, tau muaj tias thaum kuv hnov tej lus no kuv pib muaj kev xav kom kuv cov kwv tij noj qab nyob zoo, uas yog cov Neeg Nifais; yog li ntawd, kuv tau thov Vajtswv kawg siab kawg ntsws kom pab lawv.

10 Thiab thaum kuv tseem sib zog ntawm sab ntsuj plig li no, saib seb, tus Tswv lub suab rov qab los rau hauv kuv lub siab dua, hais tias: Kuv yuav mus xyuas koj cov kwv tij raws li lawv tej kev rau siab ntso coj kuv tej lus txib. Kuv tau muab thaj av no rau lawv, thiab thaj av no yog ib thaj av uas dawb huv; thiab tsis yog kuv foom tsis zoo rau thaj av tsuas yog foom tsis zoo vim yog kev ua phem xwb; yog li ntawd, kuv yuav mus xyuas koj cov kwv tij raws li kuv tau hais; thiab kuv yuav rhuav lawv tej kev ua txhaum nrog kev tu siab los rau saum lawv lub taub hau.

11 Thiab tom qab kuv, Enos, tau hnov tej lus no, kuv txoj kev ntseeg tus Tswv pib ruaj khov kho; thiab kuv sib zog thov nws ntev ntev txog kuv cov kwv tij, cov Neeg Lamas.

12 Thiab tau muaj tias tom qab kuv tau thov thiab rau siab ntso siv zog tag nrho, tus Tswv hais rau kuv tias: Kuv yuav muab rau koj raws li tej uas koj xav tau, vim yog koj txoj kev ntseeg.

13 Thiab nim no saib seb, qhov no yog qhov uas kuv xav tau ntawm nws—hais tias yog yuav muaj tias, kuv cov neeg, cov Neeg Nifais, yuav poob mus rau kev ua txhaum, thiab yuav raug puas tsuaj los ntawm tej yam dab tsi, thiab cov Neeg Lamas ho tsis raug puas tsuaj, xav kom tus Tswv uas yog Vajtswv tshwj ib phau ceev xwm txheej txog kuv cov neeg, cov Neeg Nifais; txawm hais tias yuav yog los ntawm lub hwj chim ntawm nws txhais ncaj npab dawb huv, xwv kom ib hnub yav tom ntej no yuav coj tau phau ceev xwm txheej no los rau cov Neeg Lamas, kom, tej zaum, yuav coj tau lawv los rau txoj kev cawm seej—

14 Vim tam sim no peb tej kev siv zog kom txum tim lawv rov qab los rau txoj kev ntseeg tseeb twb tsis muaj qab hau dab tsi. Thiab lawv npau taws cog lus tias, yog hais tias ua tau, lawv yuav ua kom peb thiab peb tej ceev xwm txheej puas tsuaj mus, thiab kom tag nrho peb cov yawg koob tej kab lis kev cai puas tsuaj mus thiab.

15 Yog li ntawd, vim kuv paub tias tus Tswv uas yog Vajtswv yeej muaj peev xwm tshwj peb tej ceev xwm txheej tseg cia, kuv thiaj thov nws tsis tu ncua, vim nws tau hais rau kuv tias: Txhua yam uas koj thov nrog kev ntseeg, ntseeg tias koj yuav tau txais los ntawm Khetos lub npe, koj yeej yuav tau txais.

16 Thiab kuv muaj kev ntseeg, thiab kuv tau thov Vajtswv kom nws tshwj cov ceev xwm txheej tseg cia; thiab nws khi lus rau kuv tias nws yuav coj cov no tawm mus rau cov Neeg Lamas thaum txog lub sij hawm uas nws pom zoo.

17 Thiab kuv, Enos, paub tias yuav muaj raws li kev khi lus uas nws tau khi tseg; yog li ntawd kuv tus ntsuj plig thiaj tau so.

18 Thiab tus Tswv hais rau kuv tias: Koj cov yawg koob los kuj tau thov kuv kom muaj li no thiab; thiab yuav muaj li no rau lawv raws li lawv txoj kev ntseeg; vim lawv txoj kev ntseeg zoo tib yam li koj li thiab.

19 Thiab nim no tau muaj tias kuv, Enos, tau mus ncig rau hauv Nifais cov neeg, qhia txog tej xwm uas yuav muaj los yav tom ntej, thiab ua tim khawv txog tej yam uas kuv tau hnov thiab tau pom.

20 Thiab kuv ua tim khawv tias cov Neeg Nifais tau rau siab ntso nrhiav kev coj cov Neeg Lamas rov qab los txum tim rau txoj kev ntseeg Vajtswv uas muaj tseeb. Tiam sis peb tej hauj lwm twb tsis muaj qab hau dab tsi; lawv tej kev ntxub ntxaug nyob khov kho, thiab lawv cia lawv lub siab phem coj lawv ua rau lawv hloov los ua neeg qus, thiab tsiv tsaim, thiab ib co neeg nyiam ua kom muaj nqaij ntuag ntshav nrog, pe dab pe mlom heev thiab muaj kev vuab tsuab puv npo; noj nqaij tsiaj qus; nyob tsev pheeb suab ntaub, thiab ua loj leeb ncig hauv tej hav zoov es hnav tawv tsiaj luv luv npog lawv tej puab tais thiab lawv tej taub hau chais do dus; thiab lawv tej txuj ci uas lawv txawj yog tua hneev nti, thiab siv liag, thiab siv taus. Thiab lawv muaj coob leej yeej tsis noj dab tsi li tsuas yog noj nqaij nyoos xwb; thiab lawv tau nrhiav tsis tu ncua ua kom peb puas tsuaj.

21 Thiab tau muaj tias Nifais cov neeg tau ua liaj ua teb, thiab cog txhua yam qoob loo, thiab txiv hmab txiv ntoo, thiab yug tej pab tsiaj txhu, thiab tej niag pab ntawm txhua yam tsiaj tuaj kub, thiab tshis, thiab sai, thiab kuj muaj nees coob tus thiab.

22 Thiab muaj coob tus yaj saub nyob nrog peb. Thiab cov neeg yog ib co neeg tawv ncauj, uas to taub nyuaj heev.

23 Thiab tsis muaj dab tsi li tsuas yog cov lus hnyav heev xwb, qhuab qhia thiab qhia txog tej yuav muaj los yav tom ntej txog tej kev ua rog, thiab kev sib cav sib ceg, thiab kev puas tsuaj puas ntsoog, thiab ceeb toom lawv tsis tu ncua txog kev tuag, thiab qhov ncua ntev ntawm kev nyob mus ib txhis, thiab tej kev txiav txim thiab lub hwj chim ntawm Vajtswv, thiab tag nrho txhua yam no—txhaub lawv tsis tu ncua ua kom lawv hwm tus Tswv. Tsuas yog tag nrho tej no tsis tshuav ib yam dab tsi, thiab kev hais lus meej meej heev, thiaj yuav ua kom lawv tsis txhob tau nqis nrawm nroos mus rau txoj kev puas tsuaj. Thiab kuv sau txog lawv zoo li no.

24 Thiab kuv pom tej kev ua rog ntawm cov Neeg Nifais thiab cov Neeg Lamas nyob rau hauv kuv lub neej.

25 Thiab tau muaj tias kuv pib laus, thiab ib puas xya caum cuaj xyoos tau dhau mus txij thaum lub caij uas peb txiv Lihais tau ncaim Yeluxalees mus.

26 Thiab kuv tau pom tias tsis ntev kuv yeej yuav nqis mus rau hauv kuv lub qhov ntxa, Vajtswv lub hwj chim tau ua kom kuv qhuab qhia thiab hais tej yuav muaj los yav tom ntej rau cov neeg no, thiab tshaj tawm txoj lus raws li Khetos txoj kev tseeb. Thiab kuv tau tshaj tawm txoj lus nyob tag nrho hauv kuv lub neej, thiab tau zoo siab rau txoj lus tshaj tej uas nyob hauv lub ntiaj teb.

27 Thiab tsis ntev kuv yuav mus rau kuv qhov chaw so, uas yog nrog kuv tus Txhiv Dim; vim kuv paub tias kuv yuav tau so los ntawm nws. Thiab kuv yuav zoo siab nyob rau hnub uas kuv lub cev uas txawj tuag yuav hloov los ua lub cev tsis txawj tuag, thiab yuav sawv ntawm nws xub ntiag; ces kuv yuav pom nws lub ntsej muag nrog kev zoo siab, thiab nws yuav hais rau kuv tias: Los ntawm kuv no, koj tus uas tau koob hmoov, muaj ib qho chaw tau npaj tseg cia rau koj nyob hauv kuv Txiv tej chaw nyob. Amees.