Maumoos cov Lus

1 Thiab nim no kuv, Maumoos, tab tom yuav muab phau ceev xwm txheej uas kuv tau sau tso rau kuv tus tub Maulaunais txhais tes, saib seb kuv tau pom yuav luag tag nrho tej kev puas tsuaj ntawm kuv cov neeg, cov Neeg Nifais.

2 Thiab twb tau ntau pua xyoo tom qab Khetos txoj kev los uas kuv muab cov ceev xwm txheej no rau hauv kuv tus tub txhais tes; thiab kuv xav tias nws yuav pom tag nrho txoj kev puas tsuaj ntawm kuv cov neeg. Tiam sis thov kom Vajtswv cia nws muaj sia nyob, xwv kom nws yuav sau me ntsis ntsig txog lawv, thiab me ntsis ntsig txog Khetos, xwv kom tej zaum muaj ib hnub tej uas nws sau ntawd yuav pab tau lawv.

3 Thiab nim no, kuv hais me ntsis ntsig txog tej uas kuv tau sau; vim tom qab kuv tau sau cov ntsiab lus tawm ntawm Nifais cov phiaj, los mus txog rau txoj kev kav teb kav chaw ntawm tus vaj ntxwv Npeyamis no, tus uas Amalej tau hais txog, kuv tau tshawb nyob hauv cov ceev xwm txheej uas Amaloos muab tso rau kuv txhais tes, thiab kuv nrhiav pom cov phiaj no, uas ntim cov yaj saub zaj lus no, txij li Yakhauj los mus txog rau txoj kev kav teb kav chaw ntawm tus vaj ntxwv Npeyamis no, thiab kuj ntim Nifais tej lus ntau thiab.

4 Thiab tej uas nyob rau hauv cov phiaj no ua rau kuv zoo siab, vim yog tej kev qhia tej yuav muaj los yav tom ntej txog Khetos txoj kev los; thiab kuv cov yawg koob twb paub tias tau muaj raws li tej no ntau lawm; muaj tseeb tiag, thiab kuv kuj paub tias tau muaj raws li txhua yam ntsig txog peb uas qhia tias yuav muaj los yav tom ntej los txog rau lub sij hawm no lawm thiab, thiab txhua yam uas yuav muaj dhau lub caij no mus lawm yav tom ntej yeej yuav muaj los tseeb tiag—

5 Yog li ntawd, kuv xaiv tej yam no, los siv kom sau kuv phau ceev xwm txheej tiav, kuv phau ceev xwm txheej uas tseem tshuav kuv yuav muab tawm ntawm Nifais cov phiaj los; thiab kuv tsis muaj peev xwm sau ib feem pua txog tej uas kuv cov neeg ua.

6 Tiam sis saib seb, kuv yuav coj cov phiaj no, uas ntim tej kev qhia tej yuav muaj los yav tom ntej thiab tej kev tshwm sim, thiab muab cov no cia nrog kuv phau ceev xwm txheej uas tseem tshuav, vim cov no yog cov uas muaj nuj nqis rau kuv; thiab kuv paub tias cov no yuav muaj nuj nqis rau kuv cov kwv tij.

7 Thiab kuv ua li no rau ib lub hom phiaj tseem ceeb; vim li no nws tau ntxhi rau kuv, raws li tej kev tshoov siab ntawm tus Tswv tus Ntsuj Plig uas nyob hauv kuv. Thiab nim no, kuv tsis paub txhua yam; tiam sis tus Tswv paub txhua yam uas yuav muaj los; yog li ntawd, nws tshoov kuv lub siab kom ua raws li nws lub siab xav.

8 Thiab kuv txoj kev thov Vajtswv yog ntsig txog kuv cov kwv tij, xwv kom lawv yuav rov qab los paub txog Vajtswv ib zaug ntxiv, muaj tseeb tiag, txog Khetos txoj kev txhiv dim; xwv kom lawv yuav rov qab ua ib co neeg ntxim nyiam ib zaug ntxiv.

9 Thiab nim no kuv, Maumoos, tseem ua kom kuv phau ceev xwm txheej tiav, uas kuv muab ntawm Nifais cov phiaj los; thiab kuv ua kuv phau raws li txoj kev txawj ntse thiab txoj kev to taub uas Vajtswv tau muab rau kuv.

10 Yog li ntawd, tau muaj tias tom qab Amalej tau muab cov phiaj no rau vaj ntxwv Npeyamis txhais tes, nws coj lawv thiab muab lawv cia nrog lwm cov phiaj, uas muaj tej ceev xwm txheej uas cov vaj ntxwv tau muab cev los, ntawm ib tiam neeg mus rau ib tiam los txog rau vaj ntxwv Npeyamis lub caij.

11 Thiab vaj ntxwv Npeyamis tau muab tej ceev xwm txheej cev los, ntawm ib tiam neeg mus rau ib tiam los txog rau thaum tej no tau los rau hauv kuv txhais tes. Thiab kuv, Maumoos, thov Vajtswv kom yuav muab tej no tshwj tseg cia txij lub sij hawm no mus lawm yav tom ntej. Thiab kuv paub tias tus Tswv yuav ceev tej no tseg; vim muaj tej yam tseem ceeb heev uas tau muab sau rau saud, uas los ntawm tej yam no kuv cov neeg thiab lawv cov kwv tij yuav raug txiav txim nyob rau hnub tseem ceeb thiab hnub kawg, raws li Vajtswv txoj lus uas tau sau tseg.

12 Thiab nim no, hais txog tus vaj ntxwv Npeyamis no—nws tau muaj me ntsis kev sib cav sib ceg nyob hauv nws cov neeg.

13 Thiab tau muaj tias cov Neeg Lamas tej tub rog kuj tau tawm pem thaj av Nifais tuaj, ua rog tawm tsam nws cov neeg. Tiam sis saib seb, vaj ntxwv Npeyamis tau sau nws cov tub rog los ua ke, thiab nws tau sawv tawm tsam lawv; thiab nws tau tiv thaiv nrog lub dag zog ntawm nws tus kheej txhais caj npab, nrog Lanpas rab ntaj.

14 Thiab nrog tus Tswv lub zog lawv tau sib ntaus sib tua tawm tsam lawv cov yeeb ncuab, txog rau thaum lawv tua tau cov Neeg Lamas ntau txhiab leej. Thiab tau muaj tias lawv tau sib ntaus sib tua tawm tsam cov Neeg Lamas txog rau thaum lawv tau raws lawv tawm ntawm txhua thaj av uas yog lawv qub txeeg qub teg.

15 Thiab tau muaj tias tom qab tau muaj ntau tus Khetos cuav, thiab lawv qhov ncauj tau raug kaw, thiab lawv raug txim raws li lawv tej kev txhaum kev cai;

16 Thiab tom qab tau muaj cov yaj saub cuav, thiab cov neeg qhuab qhia cuav thiab cov xib hwb cuav nyob hauv cov neeg, thiab tag nrho cov no tau raug txim raws li lawv tej kev txhaum kev cai; thiab tom qab tau muaj kev sib cav sib ceg ntau thiab coob leej tau khiav mus nyob nrog cov Neeg Lamas, saib seb, tau muaj tias vaj ntxwv Npeyamis, nrog rau cov yaj saub dawb huv, uas nyob nrog nws cov neeg, txoj kev pab—

17 Vim saib seb, vaj ntxwv Npeyamis yog ib tug neeg dawb huv, thiab nws kav nws cov neeg raws li kev ncaj ncees; thiab muaj ntau tus neeg dawb huv nyob hauv thaj av, thiab lawv tau hais Vajtswv txoj lus nrog hwj chim thiab nrog txoj cai; thiab lawv tau hais lus hnyav ntau vim yog cov neeg txoj kev tawv ncauj—

18 Yog li ntawd, nrog rau cov yaj saub txoj kev pab, vaj ntxwv Npeyamis, vim nws ua hauj lwm nrog tag nrho lub dag zog ntawm nws lub cev thiab tej peev xwm ntawm tag nrho nws lub siab, thiab ntawm cov yaj saub thiab, nws tau tsim kev thaj yeeb nyob hauv thaj av ib zaug ntxiv.