1 Thiab tau muaj tias xyoo peb caug plaub tau dhau mus, thiab peb caug tsib kuj tib yam, thiab saib seb Yexus cov thwj tim tau tsa Khetos ib lub koom txoos nyob rau hauv tag nrho thaj av ib puag ncig. Thiab tag nrho cov uas los cuag lawv, thiab hloov siab lees txim tiag tiag rau lawv tej kev txhaum, tau ua kev cai raus dej los ntawm Yexus lub npe; thiab lawv kuj tau txais tus Vaj Ntsuj Plig Dawb Huv.

2 Thiab tau muaj tias nyob hauv xyoo peb caug rau, cov neeg tag nrho tau hloov siab los ntseeg tus Tswv, thoob plaws rau hauv thaj av, cov Neeg Nifais thiab cov Neeg Lamas, thiab twb tsis muaj kev sib cav thiab kev sib ceg nyob hauv lawv, thiab txhua tus neeg ib tug ua ncaj rau ib tug.

3 Thiab lawv muaj txhua yam zoo sib xws nyob hauv lawv; yog li ntawd tsis muaj cov muaj thiab cov pluag, cov ua qhev thiab cov ywj pheej, tiam sis lawv sawv daws yeej nyob ywj siab, thiab yog cov tau lub txiaj ntsim ceeb tsheej.

4 Thiab tau muaj tias xyoo peb caug xya kuj tau dhau mus, thiab kuj tseem muaj kev thaj yeeb tsis tu ncua nyob hauv thaj av.

5 Thiab Yexus cov thwj tim tau ua tej yam tseem ceeb thiab zoo kawg nkaus, lawv thiaj kho tau cov neeg mob zoo, thiab tsa cov neeg tuag sawv, thiab ua rau cov neeg ceg tawv mus taus kev, thiab cov neeg dig muag rov pom kev, thiab cov neeg lag ntseg hnov lus; thiab lawv ua txhua yam txuj ci tseem ceeb nyob hauv noob neej; thiab lawv twb ua tsis tau ib yam txuj ci dab tsi tsuas yog los ntawm Yexus lub npe xwb.

6 Thiab li no xyoo peb caug yim tau dhau mus, thiab peb caug cuaj los tib yam, thiab plaub caug ib, thiab plaub caug ob, muaj tseeb tiag, twb mus txog rau thaum plaub caug cuaj xyoos tau dhau mus, thiab tsib caug ib, thiab tsib caug ob los tib yam; muaj tseeb tiag, thiab twb mus txog rau thaum tsib caug cuaj xyoos tau dhau mus.

7 Thiab tus Tswv ua rau lawv vam meej heev nyob hauv thaj av; muaj tseeb tiag, npaum li uas lawv rov tsa tej nroog dua rau qhov chaw uas tej zos tau kub hnyiab lawm.

8 Muaj tseeb tiag, twb yog lub nroog loj Xalahelas ntawd los lawv kuj tau kom rov tsa dua.

9 Tiam sis tau muaj ntau lub nroog uas tau saus, thiab muaj dej tawm los nyob lawv tej chaw; yog li ntawd tej nroog no tsis muaj peev xwm ua tau dua tshiab.

10 Thiab nim no, saib seb, tau muaj tias Nifais cov neeg los muaj zog zuj zus tuaj, thiab huaj vam sai kawg li, thiab los ua cov neeg zoo nkauj zoo nraug thiab ntxim nyiam heev.

11 Thiab lawv sib yuav, thiab lawv niam lawv txiv muab lawv sib yuav, thiab lawv tau koob hmoov raws li tej kev cog lus ntau uas tus Tswv tau cog rau lawv.

12 Thiab lawv twb tsis coj raws li tej kev ua thiab tej kab ke ntawm Mauxes txoj kev cai ntxiv lawm; tiam sis lawv coj raws li tej lus txib uas lawv tau txais los ntawm lawv tus Tswv thiab lawv tus Vajtswv, yoo mov thiab thov Vajtswv tsis tu ncua, thiab yeej tuaj sib ntsib ua ke thov Vajtswv thiab tuaj mloog tus Tswv txoj lus.

13 Thiab tau muaj tias twb tsis muaj kev sib cav sib ceg nyob hauv tag nrho cov neeg, nyob hauv tag nrho thaj av; tiam sis tau ua tej txuj ci tseem ceeb loj nyob hauv Yexus cov thwj tim.

14 Thiab tau muaj tias xyoo xya caum ib tau dhau mus, thiab xyoo xya caum ob los ib yam, muaj tseeb tiag, thiab li ntawd, mus txog thaum xyoo xya caum cuaj tau dhau mus; muaj tseeb tiag, thiab lub ntsiab yog li no, ib puas xyoo twb dhau mus, thiab Yexus cov thwj tim, uas nws tau xaiv, txhua tus twb tau mus rau hauv Vajtswv lub yeeb tsheej, tsuas yog tshuav peb tug uas nyob xwb; thiab twb tau tsa lwm tus thwj tim los pauv lawv qhov chaw; thiab muaj coob leej ntawm tiam neeg ntawd tau tuag tas.

15 Thiab tau muaj tias twb tsis muaj kev sib cav sib ceg nyob hauv thaj av, vim yog Vajtswv txoj kev hlub uas nyob hauv cov neeg lub siab.

16 Thiab twb tsis muaj tej kev xav tau luag tug, los sis tej kev sib cav sib ceg, los sis tej kev sib thab, los sis tej kev sib daj sib deev, los sis tej kev dag, los sis tej kev tua neeg, los sis ib yam kev xav tau daj tau deev li; thiab tseeb tiag ntshe twb tsis tau muaj ib co neeg uas yuav zoo siab tshaj nyob hauv tag nrho cov neeg uas Vajtswv txhais tes tau tsim los.

17 Twb tsis muaj tub sab, los sis neeg tua neeg, thiab twb tsis muaj qhov hais tias yog cov Neeg Lamas, los sis yog lwm yam neeg twg hlo li; tiam sis lawv tsuas ua ib pab, uas yog Khetos cov me nyuam, thiab cov uas tau Vajtswv lub nceeg vaj ua lawv tug.

18 Thiab lawv tau koob hmoov ntau heev! Vim tus Tswv tau foom koob hmoov rau lawv nyob rau tag nrho tej uas lawv ua; muaj tseeb tiag, lawv twb tau koob hmoov thiab vam meej mus txog rau thaum ib puas kaum xyoo tau dhau mus; thiab thawj tiam neeg txij li Khetos los tau dhau mus, thiab tsis tau muaj kev sib cav sib ceg nyob hauv tag nrho thaj av.

19 Thiab tau muaj tias Nifais, tus uas ceev phau ceev xwm txheej kawg no, (thiab nws tau ceev tej ntawd rau saum Nifais cov phiaj) tau tuag, thiab nws tus tub Amaus pauv nws qhov chaw los ceev tej ntawd; thiab nws los kuj ceev tej ntawd rau saum Nifais cov phiaj thiab.

20 Thiab nws ceev tej ntawd tau yim caum plaub xyoos, thiab tseem muaj kev thaj yeeb nyob hauv thaj av, tsuas yog tshuav ib feem me me ntawm cov neeg uas tau ntxeev siab khiav ntawm lub koom txoos mus thiab ris lub npe hais tias lawv yog Neeg Lamas; yog li ntawd thiaj pib muaj Neeg Lamas dua nyob hauv thaj av.

21 Thiab tau muaj tias Amaus kuj tau tuag lawm thiab, (thiab tau muaj ib puas cuaj caum plaub xyoos txij li Khetos los) thiab nws tus tub Amaus pauv nws qhov chaw los ceev phau ceev xwm txheej; thiab nws kuj ceev tej ntawd rau ntawm Nifais cov phiaj thiab; thiab kuj muab tej ntawd sau rau hauv phau ntawv Nifais, uas yog phau no.

22 Thiab tau muaj tias ob puas xyoo tau dhau mus; thiab tiam neeg thib ob tau tuag tag tsuas yog tshuav ob peb tug xwb.

23 Thiab nim no kuv, Maumoos, xav kom nej paub tias cov neeg tau huaj vam, npaum li uas lawv ri mus rau txhua txhia qhov nyob rau hauv thaj av, thiab lawv nplua nuj heev, vim yog lawv txoj kev vam meej los ntawm Khetos.

24 Thiab nim no, nyob hauv xyoo ob puas ib no tau pib muaj ib txhia nyob hauv lawv uas muab hlob, xws li hnav tej ris tsho kim kim, thiab txhua yam hlaws zoo nkauj, thiab tej yam zoo ntawm lub ntiaj teb.

25 Thiab txij li lub sij hawm ntawd mus lawv tej khoom thiab lawv tej khoom siv nyob hauv lawv twb tsis sib npaug ntxiv li lawm.

26 Thiab lawv pib sib faib mus ua tej cwb co; thiab lawv pib tsim tej koom txoos rau lawv tus kheej kom muaj nyiaj nplua nuj, thiab pib xyeej Khetos lub koom txoos tseeb.

27 Thiab tau muaj tias thaum ob puas kaum xyoo tau dhau mus lawm muaj ntau lub koom txoos nyob hauv thaj av; muaj tseeb tiag, muaj ntau lub koom txoos uas hais tias lawv paub tus Khetos, tiam sis lawv xyeej feem ntau ntawm nws txoj moo zoo, lawv thiaj tau txais txhua yam kev phem, thiab muab qhov uas dawb ceev rau tus uas twb raug txwv vim yog nws tsis tsim nyog.

28 Thiab lub koom txoos no tau huaj vam vim yog kev ua phem, thiab vim yog lub hwj chim ntawm Dab Ntxwg Nyoog, tus uas tuav tau lawv lub siab.

29 Thiab ntxiv, muaj dua ib lub koom txoos uas xyeej tus Khetos; thiab lawv tsim txom Khetos lub koom txoos tseeb, vim yog cov ntseeg txoj kev txo hwj chim thiab lawv txoj kev ntseeg Khetos; thiab lawv saib tsis taus cov ntseeg vim yog ntau yam txuj ci tseem ceeb uas tau muaj nyob hauv lawv.

30 Yog li ntawd lawv siv hwj chim thiab txoj cai los kav Yexus cov thwj tim uas nyob nrog lawv, thiab lawv muab lawv tso rau hauv lub tsev kaw; tiam sis los ntawm lub hwj chim ntawm Vajtswv txoj lus, uas yog nyob hauv lawv, tej tsev kaw tawg ua ob sab, thiab lawv tawm mus ua tej txuj ci tseem ceeb loj heev nyob hauv lawv.

31 Txawm li ntawd, thiab txawm tias tau muaj txhua yam txuj ci tseem ceeb no los, cov neeg tseem ua lawv lub siab tawv qhawv, thiab nrhiav kev muab lawv tua, ib yam li cov Neeg Yudais nyob hauv Yeluxalees uas tau nrhiav muab Yexus tua, raws li nws txoj lus.

32 Thiab cov neeg muab lawv pov rau hauv tej cub tawg uas muaj hluav taws, thiab lawv tawm los tsis raug mob dab tsi.

33 Thiab lawv kuj muab lawv pov rau hauv tej qhov uas muaj tej tsiaj qus, thiab lawv ua si nrog tej tsiaj qus ib yam li ib tug me nyuam yaus ua si nrog ib tug me nyuam yaj; thiab lawv tawm ntawm tej tsiaj ntawd los, tsis raug mob dab tsi.

34 Txawm li ntawd los, cov neeg tseem ua lawv lub siab tawv qhawv, vim muaj cov pov thawj thiab yaj saub cuav coob leej coj kom lawv txhim tsa ntau lub koom txoos, thiab ua txhua yam kev phem. Thiab lawv muab Yexus cov neeg ntaus; tiam sis Yexus cov neeg tsis ntaus rov qab. Thiab yog li ntawd lawv tau tso txoj kev ntseeg tseg thiab ua kev phem zuj zus, ib xyoos dhau ib xyoos, mus txog rau thaum ob puas peb caug xyoo tau dhau mus.

35 Thiab nim no tau muaj tias nyob hauv xyoo no, muaj tseeb tiag, nyob hauv xyoo ob puas peb caug ib, tau muaj kev sib faib loj heev nyob hauv cov neeg.

36 Thiab tau muaj tias nyob hauv xyoo no tau muaj ib pab neeg uas hu ua cov Neeg Nifais, thiab lawv yog cov ntseeg Khetos tseeb; thiab nyob hauv lawv muaj cov uas cov Neeg Lamas muab hu ua—cov Neeg Yakhauj, thiab cov neeg Yauxej, thiab cov Neeg Xaulas;

37 Yog li ntawd cov uas ntseeg Khetos tiag tiag, thiab cov uas teev tiam Khetos tiag tiag, (Yexus peb tug thwj tim uas nyob los kuj nyob hauv cov no) hu ua cov Neeg Nifais, thiab cov Neeg Yakhauj, thiab cov neeg Yauxej, thiab cov Neeg Xaulas.

38 Thiab tau muaj tias cov uas xyeej txoj moo zoo hu ua cov Neeg Lamas, thiab cov Neeg Lemu-ees, thiab cov Neeg Ixama-ees; thiab tsis yog lawv tau tso txoj kev ntseeg tseg zuj zus, tiam sis yog lawv txhob txwm ntxeev siab tawm tsam Khetos txoj moo zoo; thiab lawv qhia lawv cov me nyuam kom lawv tsis txhob ntseeg, ib yam li lawv cov yawg koob, txij li thaum chiv keeb los, uas tau tso txoj kev ntseeg tseg zuj zus.

39 Thiab twb vim yog lawv cov yawg koob txoj kev phem thiab txoj kev qias, ib yam li nyob puag thaum chiv keeb. Thiab lawv tej txiv qhia lawv kom ntxub Vajtswv cov me nyuam, ib yam li cov Neeg Lamas tej txiv tau qhia lawv kom ntxub Nifais cov me nyuam txij li thaum chiv thawj los.

40 Thiab tau muaj tias ob puas plaub caug plaub xyoos tau dhau mus, thiab li no yog tej kev ua neej ntawm cov neeg. Thiab feem uas phem zog ntawm cov neeg tau muaj zog zuj zus tuaj, thiab tau muaj coob tshaj Vajtswv cov neeg.

41 Thiab lawv kuj tseem txhim tsa tej koom txoos rau lawv tus kheej, thiab muab tej khoom muaj nuj nqis los tso rau kom zoo nkauj. Thiab li no ob puas tsib caug xyoo tau dhau mus, thiab ob puas rau caum xyoo kuj tau dhau mus.

42 Thiab tau muaj tias feem uas phem ntawm cov neeg tau rov pib txhim tsa tej kev cog lus uas ntsiag to thiab tej kev tuav hauv ntawm Nkadi-atoos.

43 Thiab cov neeg uas hu ua Nifais cov neeg pib muab hlob nyob hauv lawv lub siab, vim yog lawv tej kev nplua nuj heev, thiab hloov los muaj plhus zoo li lawv cov kwv tij, cov Neeg Lamas.

44 Thiab txij lub sij hawm no mus cov thwj tim pib tu siab rau neeg ntiaj teb tej kev txhaum.

45 Thiab tau muaj tias thaum peb puas xyoo tau dhau mus, cov Neeg Nifais thiab cov Neeg Lamas tau hloov los ua cov neeg phem heev ib tug xws ib tug.

46 Thiab tau muaj tias cov neeg tub sab ntawm Nkadi-atoos ri mus thoob plaws rau hauv thaj av; thiab twb tsis muaj ib tug uas ncaj ncees li tsuas yog Yexus cov thwj tim xwb. Thiab lawv khaws tej kub thiab tej nyiaj dawb cia tau ntau heev, thiab ua txhua yam kev ua lag ua luam.

47 Thiab tau muaj tias tom qab peb puas tsib xyoos tau dhau mus, (thiab cov neeg tseem ua kev phem) Amaus tau tuag; thiab nws tus kwv, Amaloos, pauv nws qhov chaw los ceev phau ceev xwm txheej.

48 Thiab tau muaj tias thaum peb puas nees nkaum xyoo tau dhau mus, Amaloos, vim tus Vaj Ntsuj Plig Dawb Huv txhib nws, thiaj muab tej ceev xwm txheej uas dawb ceev zais cia—muaj tseeb tiag, twb yog tag nrho tej ceev xwm txheej dawb ceev uas tau muab cev ntawm ib tiam neeg mus rau ib tiam—los txog rau thaum peb puas nees nkaum xyoo txij li thaum Khetos los.

49 Thiab nws muab tej ceev xwm txheej coj mus zais rau tus Tswv, xwv kom lawv yuav rov qab los dua rau cov seem tshuav ntawm tsev neeg Yakhauj, raws li tus Tswv tej kev qhia tej yuav muaj los yav tom ntej thiab tej kev cog lus. Thiab li no yog qhov kawg ntawm Amaloos phau ceev xwm txheej.