Ib txoj kev sib tham nrog Vajtswv, yog thaum uas ib tug neeg hais ua tsaug thiab thov kom tau koob hmoov. Tej kev thov Vajtswv yog hais rau peb Leej Txiv Saum Ntuj Ceeb Tsheej los ntawm Yexus Khetos lub npe. Hais tau tej kev thov Vajtswv nrov nrov los sis ntsiag to. Ib tug neeg tej kev xav kuj yog ib txoj kev thov yog tias lawv yog hais rau Vajtswv. Ib zaj nkauj cov ncaj ncees hu kuj yog kev thov Vajtswv (Q&K 25:12).
Lub hom phiaj ntawm txoj kev thov Vajtswv tsis yog kom hloov Vajtswv lub siab nyiam, tiam sis yog kom peb tus kheej thiab luag tej thiaj li tau tej koob hmoov uas Vajtswv twb kam muab lawm, tiam sis peb yuav tsum thov kom peb tau.
Peb thov Leej Txiv los ntawm Khetos lub npe (Yhs. 14:13–14; 16:23–24). Peb muaj peev xwm thov los ntawm Khetos lub npe tiag tiag thaum peb lub siab xav yog Khetos lub siab xav (Yhs. 15:7; Q&K 46:30). Ces peb thiaj thov tau tej yam uas yog thiab li ntawd Vajtswv yuav muab tau (3 Nf. 18:20). Muaj tej kev thov Vajtswv uas nws tsis teb vim tej kev thov ntawd tsis yog raws li Khetos lub siab xav tiam sis yog los ntawm tus neeg txoj kev cuaj khaum (Yak. 4:3; Q&K 46:9). Tiag tiag, yog tias peb thov Vajtswv rau tej yam uas tsis ncaj ncees, ces yam ntawd yuav tig los mus ua peb txoj kev raug txim (Q&K 88:65).