Enauj

Ib tug yaj saub uas coj cov neeg hauv lub nroog Xi-oos. Tau qhia txog nws txoj hauj lwm qhuab qhia tib neeg nyob hauv Phau Qub thiab phau Lub Hlaws uas Muaj Nqis Heev tib si. Nws yog tus yawg suab thib xya tom qab Adas. Nws yog Yales tus tub thiab yog Methuxelas leej txiv (Chk. 5:18–24; Luk. 3:37).

Enauj yog ib tug neeg zoo thiab nws txoj hauj lwm qhuab qhia tib neeg yeej tseem ceeb dua zaj lus luv luv nyob hauv phau Npaivnpaum. Phau Npaivnpaum qhia hais tias tus Tswv muab nws plhis coj mus saum ntuj (Hen. 11:5) tiam sis yeej tsis piav txog nws txoj hauj lwm qhuab qhia. Yudas 1:14 muaj ib co lus thaum nws qhia kev txog tej uas yuav muaj los yav tom ntej. Tej kev tshwm sim hauv lub caij nyoog kawg piav ntau ntxiv txog Enauj, kuj qhia txog nws txoj kev tshaj tawm txoj moo zoo, nws lub nroog hu ua Xi-oos, nws tej kev ua yog toog, thiab nws tej kev qhia tej uas yuav muaj los yav tom ntej (Q&K 107:48–57; Mauxes 6–7). Tus Tswv tau coj Xi-oos mus saum ntuj vim hais tias cov neeg uas nyob hauv ua ncaj ncees (Mauxes 7:69).