Khiav Dim

Ib phau ntawv uas Mauxes sau hauv Phau Qub uas piav txog qhov uas cov neeg Ixayees khiav ntawm teb chaws Iyiv. Cov neeg Ixayees zaj keeb kwm thaum ntxov raws li sau tseg hauv phau Khiav Dim muaj peb feem: (1) cov neeg txoj kev ua qhev rau Iyiv, (2) Mauxes txoj kev coj lawv khiav ntawm Iyiv mus, thiab (3) lawv txoj kev rau siab ntso ua hauj lwm rau Vajtswv hais txog lawv txoj kev teev ntuj thiab txoj kev kav teb kav chaw.

Feem thib ib, Khiav Dim 1:1–15:21, piav txog qhov uas Iyiv quab yuam haiv neeg Ixayees; zaj keeb kwm thaum ntxov thiab txoj kev hu Mauxes; txoj kev Khiav Dim thiab thaum lawv pib ua txoj Kev Cai Hla Dhau; thiab qhov uas lawv taug kev mus rau tus Dej Hiav Txwv Liab, qhov ua rau Falaus pab tub rog puas tsuaj tas, thiab Mauxes zaj nkauj txog kev kov yeej.

Feem thib ob, Khiav Dim 15:22–18:27, piav txog haiv neeg Ixayees txoj kev txhiv dim thiab tej yam uas lawv ntsib thaum lawv taug kev ntawm tus Dej Hiav Txwv Liab mus rau lub roob Xinais; cov dej iab hauv Malas, txoj kev txais cov noog nquab thiab manas, txoj kev hwm Hnub Caiv, lub txiaj ntsim loj heev thaum lawv tau dej haus nyob tom Lefidees, thiab npluav rog nyob ntawd nrog cov neeg Amalej; Yethoos tuaj txog lawv lub yeej thiab nws cov lus ntuas hais txog tsoom fwv tswj hwm cov pej xeem.

Feem thib peb, tshooj 19–40, qhia txog txoj kev muab haiv neeg Ixayees fij tseg ua hauj lwm rau Vajtswv thaum lawv nyob hauv Xinais. Tus Tswv muab lawv tsa ua ib pab neeg uas muaj cov pov thawj thiab ib haiv neeg uas dawb huv; Nws muab Kaum Nqe Lus Txib rau lawv; thiab Nws qhia txog lub tsev ntaub, tej rooj tog, thiab kev teev tiam nyob rau haud. Ces tom qab ntawd muaj zaj uas piav txog cov neeg pe hawm tus mlom nyuj uas lawv siv kub coj los puab, thiab thaum kawg piav txog txoj kev ua lub tsev ntaub thiab tej hauj lwm nyob rau haud.