Tuam Tsev Ntaub

Tus Tswv lub tsev, lub plawv ntawm Ixayees txoj kev teev tiam Vajtswv thaum lawv Khiav Dim Iyiv. Lub tuam tsev ntaub yog ib lub tuam tsev uas nqa tau thiab muab rhuav tau thiab rov qab muab tso ua ke tau. Cov neeg Ixayees siv lub tuam tsev ntaub mus txog thaum lawv ua tau Xalumoos lub tuam tsev (Q&K 124:38).

Vajtswv tau muab tus qauv ntawm lub tuam tsev ntaub tshwm sim rau Mauxes (Khd. 26–27), thiab cov neeg Ixayees tau ua kom muaj raws li tus qauv ntawd (Khd. 35–40). Thaum lawv ua lub tuam tsev ntaub tiav lawm, ib lub huab roos lub tsev ntaub, thiab tus Tswv lub yeeb koob tau puv lub tuam tsev ntaub (Khd. 40:33–34). Lub huab yog ib lub cim txog qhov uas Vajtswv nyob ntawd. Thaum tsaus ntuj, tau saib lub huab ntawd zoo li yog hluav taws. Thaum lub huab nyob saum lub tuam tsev ntaub, cov neeg Ixayees pw ntawd. Thaum lub huab tau txav mus, lawv tau mus nrog lub huab ntawd (Khd. 40:36–38; Tnp. 9:17–18). Cov neeg Ixayees tau nqa lub tuam tsev ntaub nrog lawv mus thaum lawv ua loj leeb hauv tiaj suab puam thiab thaum lawv kov yeej thaj av Kana-as. Tom qab lawv kov yeej thaj av ntawd, lawv muab lub tuam tsev pheeb sub tso hauv Silaus, uas yog qhov chaw uas tus Tswv tau xaiv (Yas. 18:1). Tom qab cov neeg Ixayees ua lub tuam tsev Xalumoos, ces lub tuam tsev ntaub twb ploj ntawm zaj keeb kwm mus lawm.

Tus Tswv thiab Yaxayas tau siv lub tuam tsev ntaub ua ib lub cim txog lub nroog Xi-oos thiab Yeluxalees thaum lub sij hawm uas tus Tswv txoj Kev Los Zaum Ob (Yay. 33:20; Mx. 7:62).