Peetekos

Raws li Mauxes txoj kev cai, Rooj Noj Rooj Haus ntawm Peetekos los sis Qoob Loo Thawj Tom yog noj thaum tsib caug hnub tom qab ua Rooj Noj Rooj Haus ntawm Kev Cai Hla Dhau (Lek. 23:16). Peetekos yog ua kev zoo siab rau lub caij sau qoob loo, thiab nyob hauv Phau Qub hu ua Rooj Noj Rooj Haus ntawm lub Caij Sau Qoob Loo los sis Rooj Noj Rooj Haus ntawm Ntau lub Lim Tiam. Twb yog thaum tab tom ua rooj noj rooj haus no uas cov Thwj Tim nyob hauv Yeluxalees muaj tus Vaj Ntsuj Plig Dawb Huv puv npo thiab hais tau ntau yam lus (Teh. 2; Q&K 109:36–37).