Vaj Ntxwv

Tshooj 1 piav txog tej hnub kawg ntawm tus Vaj Ntxwv Daviv lub neej. Tshooj 2–11 ceev xwm txheej txog Xalumoos lub neej. Tshooj 12–16 qhia txog ob tug uas kav tom qab Xalumoos, Lehaunpau-as thiab Yelaunpau-as. Yelaunpau-as ua rau lub nceeg vaj Ixayees raug muab ua sib faib. Muaj lus qhia txog lwm tus vaj ntxwv thiab. Tshooj 17–21 ceev xwm txheej txog Eliyas txoj hauj lwm qhuab qhia thaum nws ntuas Ahaj, Ixayees tus vaj ntxwv. Tshooj 22 ceev xwm txheej txog kev ua rog tawm tsam Xilias uas Ahaj thiab Yehausafas, Yudas tus vaj ntxwv, nkawd cov tub rog koom ua ke. Tus yaj saub Mikayas qhia tej uas yuav muaj los yav tom ntej tawm tsam ob tug vaj ntxwv.

Tshooj 1:1–2:11 hais ntxiv txog Eliyas lub neej, thiab hais txog Eliyas txoj kev nce mus saum ntuj ceeb tsheej nyob hauv ib lub tsheb hluav taws cig. Tshooj 2–9 hais txog Elisas txoj kev ua hauj lwm qhuab qhia nrog kev ntseeg thiab lub hwj chim loj. Tshooj 10 qhia txog Yehus, uas yog tus vaj ntxwv, thiab qhia txog qhov uas nws ua rau Ahaj tsev neeg thiab cov pov thawj ntawm Npa-as raug puas tsuaj. Tshooj 11–13 ceev xwm txheej txog Yau-ases txoj kev kav uas ncaj ncees thiab Elisas txoj kev tuag. Tshooj 14–17 qhia txog tej tug vaj ntxwv uas kav nyob hauv Ixayees thiab Yudas, feem coob kav raws li kev phem. Tshooj 15 ceev xwm txheej txog qhov uas cov Neeg Axilias tua yeej kaum xeem neeg Ixayees. Tshooj 18–20 ceev xwm txheej txog Hexekiyas, uas yog Yudas tus vaj ntxwv, lub neej ncaj ncees, thiab tus yaj saub Yaxayas. Tshooj 21–23 qhia txog ob tug vaj ntxwv Manaxes thiab Yauxiyas. Raws li tej uas tau ua dhau los, Manaxes yog tus lav ris qhov uas Yaxayas raug tua. Yauxiyas yog ib tug vaj ntxwv ncaj ncees uas rov qab txhim tsa txoj kev cai nyob hauv cov Neeg Yudais. Tshooj 24–25 ceev xwm txheej txog kev poob cev qhev nyob hauv Npanpiloos teb.