Ntsuj Plig

Yog feem ntawm ib tug uas muaj txoj sia ua ntej yug los rau hauv lub ntiaj teb, muaj txoj sia nyob hauv lub cev nqaij daim tawv hauv lub neej ntiaj teb uas txawj tuag no, thiab muaj txoj sia tom qab kev tuag, sib cais ntawm cev nqaij daim tawv mus txog thaum txoj Kev Sawv Rov Los. Txhua yam uas muaj sia—tib neeg, tsiaj txhu, thiab nroj tsuag—yog ntsuj plig ua ntej muaj lub neej nyob hauv lub ntiaj teb no (Chk. 2:4–5; Mauxes 3:4–7). Lub cev ntsuj plig yeej zoo li lub cev nqaij daim tawv (1 Nf. 11:11; Ethaws 3:15–16; Q&K 77:2; 129). Ntsuj plig yeej yog yam ntawm sab cev nqaij, tiam sis tej yam ntawm sab ntsuj plig mos tshaj thiab dawb huv tshaj tej yam ntawm sab cev nqaij daim tawv (Q&K 131:7).

Txhua tus neeg yeej yog Vajtswv ib tug tub los sis tus ntxhais kiag, vim lawv muaj Leej Niam Leej Txiv Saum Ntuj Ceeb Tsheej uas yug lawv ua ntej lawv yug los rau lawv niam lawv txiv hauv lub ntiaj teb no (Hen. 12:9). Txhua tus neeg nyob hauv lub ntiaj teb muaj ib lub cev ntsuj plig uas tsis txawj tuag nrog rau lawv lub cev nqaij daim tawv. Ib tug ntsuj plig tseem ciaj thaum tsis muaj lub cev nqaij daim tawv, tiam sis lub cev nqaij daim tawv tsis ciaj yog tsis muaj tus ntsuj plig (Yak. 2:26). Kev tuag ntawm sab nqaij daim tawv yog qhov uas tus ntsuj plig ncaim lub cev mus. Thaum muaj txoj Kev Sawv Rov Los, tus ntsuj plig yuav rov qab los koom tib lub cev nqaij daim tawv uas muaj hauv lub ntiaj teb, tsuas yog muaj ob qho uas txawv: tus ntsuj plig yeej yuav tsis ncaim yus lub cev ntxiv mus, thiab yus lub cev nqaij daim tawv yuav tsis txawj tuag thiab yuav zoo tag nrho (Amas 11:45; Q&K 138:16–17).