Hloov Hlo
Hais txog cov neeg uas lawv tus yam ntxwv thiab tus yeeb yam hloov hlo—txhais hais tias, lawv txais kev txhawb nqa mus rau ib theem ntawm sab ntsuj plig uas siab dua—kom lawv thiaj tiv tau cov neeg saum ntuj lub yeeb koob.
Khetos txoj Kev Hloov Hlo
Petus, Yakaunpaus, thiab Yauhas pom tus Tswv txais yeeb koob thiab hloov hlo. Tus Cawm Seej tau cog lus ua ntej hais tias Petus yuav txais tej yawm sij ntawm lub nceeg vaj ceeb tsheej (Mat. 16:13–19; 17:1–9; Mak. 9:2–10; Luk. 9:28–36; 2 Pet. 1:16–18). Thaum lub sij hawm tseem ceeb no, tus Cawm Seej, Mauxes, thiab Eli-as (Eliyas) muab cov yawm sij ntawm lub pov thawj hwj uas tau cog lus tseg lawm rau Petus, Yakaunpaus, thiab Yauhas. Nrog cov yawm sij pov thawj hwj no, cov Thwj Tim muaj hwj chim ua tej hauj lwm ntawm lub nceeg vaj tom qab Yexus txoj Kev Nce Mus Saum Ntuj Ceeb Tsheej.
Joseph Smith qhia hais tias nyob saum lub Roob Hloov Hlo, Petus, Yakaunpaus, thiab Yauhas kuj tau hloov hlo. Lawv ua yog toog pom lub ntiaj teb yuav zoo li cas yav tom ntej thaum lub ntiaj teb tau yeeb koob (Q&K 63:20–21). Lawv pom Mauxes thiab Eliyas, ob tug neeg uas tau muab plhis lawm, thiab tau hnov Leej Txiv lub suab. Leej Txiv hais tias, “Nov yog kuv tus Tub uas kuv hlub, kuv txaus siab rau nws; cia li mloog nws lus” (Mat. 17:5).