Timautes, Tsab Ntawv rau

Povlauj sau thawj tsab ntawv tom qab thawj zaug nws raug kaw. Nws twb tseg Timautes nyob hauv Efexus, vim nws xav tias nws yuav rov qab los (1 Tim. 3:14). Tiam sis, Povlauj xav tias tej zaum nws yuav raug tab kaum, nws thiaj li sau ntawv rau Timautes, tej zaum nyob hauv Makedaunias (1 Tim. 1:3), kom muab lus ntuas thiab lus txhawb nqa rau nws ua nws tej dej num.

Tshooj 1 muaj Povlauj cov lus txais tos thiab nws tej lus qhia txog tej kev xav ruam uas pib ntxias cov neeg nyob hauv lub Koom Txoos Tshooj 2–3 qhia txog kev teev tiam ua ke thiab txog qhov uas cov xib hwb yuav tsum coj cwj pwm thiab coj yeeb yam li cas. Tshooj 4–5 piav txog kev tso qhov tseeb tseg nyob hauv hnub nyoog kawg thiab hais lus qhia rau Timautes paub txhawb pab cov uas nws coj. Tshooj 6 yog kev ntuas kom rau siab ntseeg thiab tsis txhob khaws nyiaj txiag ntawm lub ntiaj teb.

Povlauj sau tsab ntawv ob no thaum nws raug kaw zaum ob, tsis ntev ua ntej nws raug tua tuag. Tsab ntawv no muaj tus Thwj Tim cov lus kawg thiab qhia txog nws txoj kev ua siab loj thiab kev tso siab uas nws muaj thaum nws yuav tuag.

Tshooj 1 muaj Povlauj cov lus txais tos thiab kev txib rau Timautes. Tshooj 2–3 muab lus ceeb toom thiab kev qhia, nrog ib txoj kev hais kom nws paub txog tej kev plhom sij rau yav tom ntej. Tshooj 4 yog ib zaj lus rau Povlauj cov phooj ywg, uas muaj lus ntuas paub ua li cas rau cov neeg uas tso qhov tseeb tseg.