Yeluxalees

Ib lub nroog nyob hauv Ixayees niaj hnub no. Yog lub nroog tseem ceeb tshaj hauv phau Npaivnpaum zaj keeb kwm. Ib txhia chaw uas dawb ceev tshaj rau cov Neeg Ntseeg Khetos, Neeg Yudais, thiab Neeg Ntseeg Ilas nyob rau hauv lub nroog no thiab muaj coob tus neeg uas rau siab ntseeg uas ib sij tuaj xyuas tej chaw no. Ntau zaus lub nroog no hu ua lub nroog dawb huv.

Dhau los lawm nws hu ua Xalees (Chk. 14:18; Pnk. 76:2), Yeluxalees yog cov Neeg Yenpus ib lub nroog mus txog thaum Daviv txeeb tau (Yas. 10:1; 15:8; 2 Xam. 5:6–7), muab ua nws lub tuam nroog. Mus txog thaum ntawd feem ntau lub nroog yog ib lub chaw saum roob uas muaj phab ntsa nyob ib puas ncig xwv kom tiv thaiv yeeb ncuab, kwv yees li 2600 fij (800 mev) siab tshaj dej hiav txwv. Muaj tej vos hav tob tob uas nyob ib puas ncig ntawm nws txhua sab tsuas yog sab qaum teb xwb.

Thaum lub caij ntawm Vaj Ntxwv Daviv txoj kev kav hauv Yeluxalees, nws nyob hauv ib lub tsev ntoo. Tiam sis, thaum lub caij ntawm Xalumoos txoj kev kav, cov neeg ua ntau yam kom ua lub nroog zoo nkauj, tsis hais ua tus vaj ntxwv lub tsev thiab lub tuam tsev.

Tom qab Ixayees thiab Yudas ob lub nceeg vaj sib faib, Yeluxalees tseem yog Yudas lub tuam nroog. Ntau zaus tej tub rog tuaj tawm tsam txeeb Yeluxalees (1 Vnt. 14:25; 2 Vnt. 14:13; 16:5; 18–19; 24:10; 25). Thaum Hexekiyas kav, Yeluxalees yog lub hauv paus ntawm kev teev tiam teev ntuj tiam sis Yeluxalees raug puas tsuaj me ntsis 320 xyoo ua ntej Yexus yug los, 168 xyoo ua ntej Yexus yug los, thiab 65 xyoos ua ntej Yexus yug los. Helauj rov qab ua cov ntsa loog thiab lub tuam tsev, tiam sis 70 xyoo tom qab Yexus yug los cov Neeg Loos ua rau Yeluxalees puas tsuaj tag nrho.