Tej Kev Pab Kawm
Eliyas

Eliyas

Ib tug yaj saub hauv Phau Qub uas tau rov qab los hauv hnub nyoog kawg los muab cov yawm sij ntawm lub hwj chim kev cai sib khi rau Joseph Smith thiab Oliver Cowdery. Nyob rau hauv nws lub caij, Eliyas qhuab qhia tib neeg nyob rau sab Qaum Teb hauv Ixayees lub Nceeg Vaj (1 Vnt. 17–22; 2 Vnt. 1–2). Nws tso siab ntseeg tus Tswv thiab neeg paub nws vim nws ua ntau yam txuj ci tseem ceeb heev. Raws li nws thov, Vajtswv tiv thaiv tsis pub lub ntuj los nag tau 3½ xyoo. Nws tsa tau ib tug tub hluas uas tuag lawm sawv rov los thiab hu tau hluav taws los saum ntuj ceeb tsheej los (1 Vnt. 17–18). Cov neeg Yudais tseem tos Eliyas rov qab los, raws li Malakis qhia tej uas yuav muaj los yav tom ntej Eliyas yeej yuav rov qab los (Mal. 4:5). Thaum cov neeg Yudais ua Rooj Mov rau Kev Cai Hla Dhau lawv tseem qhib qhov rooj lug thiab tseg ib lub rooj zaum tos txais nws.

Tus Yaj Saub Joseph Smith hais tias Eliyas yog tus tuav lub hwj chim kev cai sib khi ntawm lub Pov Thawj Hwj Mekhixedes thiab yog tus yaj saub kawg nkaus uas tuav lub hwj chim ntawd ua ntej lub caij thaum Yexus Khetos yug los. Nws thiab Mauxes nkawd tshwm sim los nyob rau saum lub Roob Hloov Hlo thiab muab cov yawm sij ntawm lub pov thawj hwj rau Petus, Yakaunpaus thiab Yauhas (Mat. 17:3). Nws rov qab tshwm sim los, nrog rau Mauxes thiab lwm cov yaj saub, thaum lub Plaub Hlis Ntuj hnub tim 3, xyoo 1836, nyob hauv lub Tuam Tsev Kirtland Ohio thiab muab tib cov yawm sij ntawd rau Joseph Smith thiab Oliver Cowdery (Q&K 110:13–16). Txhua yam tsav no yog kom npaj tos tus Tswv txoj Kev Los Zaum Ob, raws li sau tseg hauv phau Malakis 4:5–6.

Eliyas lub hwj chim no yog lub hwj chim pov thawj hwj muab khi ua ke uas yog thaum yus muab tej yam khi los sis daws hauv ntiaj teb no ces yus kuj muab tej ntawd khi los sis daws saum ntuj ceeb tsheej thiab (Q&K 128:8–18). Tus Tswv cov tub qhe uas niaj hnub nyob hauv ntiaj teb no muaj lub hwj chim muab khi ua ke no thiab ua tej kab ke cawm neeg txoj sia ntawm txoj moo zoo rau cov neeg uas tseem ciaj thiab cov uas twb tuag lawm (Q&K 128:8).