Tub Hlob, tus

Thaum lub caij uas cov yawg suab thaum ub ua neej nyob, tus tub hlob yog tus uas tau txais txoj cai ua tus hlob (Chk. 43:33) thiab vim yog li ntawd nws pauv nws txiv qhov chaw los coj tsev neeg thaum nws txiv tas sim neej. Tus tub hlob yuav tsum tsim nyog nws thiaj txais tau txoj kev lav ris no (1 Xvn. 5:1–2) thiab nws poob tau nws lub meej mom ua tus tub hlob yog tias nws coj tsis ncaj ncees.

Raws li Mauxes txoj kev cai, neeg xav tias tus tub hlob yog tshwj tseg cia rau Vajtswv ua Vajtswv tug. Tus tub hlob txais ob npaug ntawm nws txiv tej qub txeeg qub teg (2 Kev. 21:17). Tom qab nws txiv tas sim neej, nws yog tus uas lav ris qhov uas saib xyuas thiab tu nws niam thiab nws cov muam.

Tsiaj txhu thawj tug me nyuam uas yog tus txiv kuj yog Vajtswv tug thiab. Cov tsiaj txhu huv yog siv rau tej kev cai txi, ho cov tsiaj txhu tsis huv lawv muab txhiv, los yog muag, los yog tua tuag (Khd. 13:2, 11–13; 34:19–20; Lek. 27:11–13, 26–27).

Tus tub hlob yog piv txog Yexus Khetos thiab Nws tej hauj lwm qhuab qhia hauv lub ntiaj teb, thiab pab qhia rau cov neeg kom nco qab hais tias tus Mexiyas yuav los (Mauxes 5:4–8; 6:63).

Yexus yog tus tub hlob ntawm peb Leej Txiv Saum Ntuj Ceeb Tsheej cov me nyuam ntsuj plig, yog Leej Txiv Tib Leeg Tub ntawm cev nqaij daim tawv, thiab yog thawj tus uas tau sawv hauv qhov tuag rov qab los nyob hauv txoj Kev Sawv Rov Los (Klx. 1:13–18). Haiv Neeg Ntseeg uas rau siab ntseeg yuav ua cov mej zeej ntawm tus Tub Hlob lub Koom Txoos thaum lub neej nyob mus ib txhis (Q&K 93:21–22).