Petus

Nyob hauv Phau Tshiab, thaum xub thawj Petus hu ua Xime-oos los sis Ximoos (2 Pet. 1:1), nws yog ib tug neeg nuv ntses ntawm Npexaidas uas nyob hauv Kapena-us nrog nws tus poj niam. Yexus kho tau Petus tus poj niam niam zoo (Mak. 1:29–31). Yexus Khetos hu Petus thiab nws tus kwv Adales los ua Nws ob tug thwj tim (Mat. 4:18–22; Mak. 1:16–18; Luk. 5:1–11). Petus lub npe Kefas, uas nyob hauv cov lus Alame-us txhais hais tias “ib tug pom tau” los sis “pob zeb” yog tus Tswv muab rau nws (Yhs. 1:40–42; JST, Yhs. 1:42 [Cov Ntawv Ntxiv Tom Kawg]). Txawm hais tias Phau Tshiab hais txog Petus tej kev qaug zog ntawm sab nqaij daim tawv los, qhov no kuj qhia tias nws tau kov yeej tej ntawd thiab ua rau nws muaj zog tuaj los ntawm nws txoj kev ntseeg Yexus Khetos.

Petus lees hais tias Yexus yog tus Khetos thiab Vajtswv Leej Tub (Yhs. 6:68–69), thiab tus Tswv xaiv nws ua tus tuav cov yawm sij ntawm lub nceeg vaj hauv ntiaj teb (Mat. 16:13–19). Nyob saum lub Roob Hloov Hlo, Petus pom tus Cawm Seej uas tau hloov hlo, thiab Mauxes thiab Eli-as (Eliyas) (Mat. 17:1–9).

Petus yog tus thawj Thwj Tim hauv nws lub caij nyoog. Tom qab tus Cawm Seej tuag, sawv rov los, thiab nce mus saum ntuj, Petus hu cov neeg hauv lub Koom Txoos los ua ke thiab ua tus coj hu ib tug Thwj Tim los hloov Yudas Ixakali-us chaw (Teh. 1:15–26). Petus thiab Yauhas kho tau ib tug txiv neej uas ceg tawv txij thaum nws yug los zoo (Teh. 3:1–16) thiab dim lub tsev kaw los ntawm tej txuj ci tseem ceeb (Teh. 5:11–29; 12:1–19). Twb yog los ntawm Petus txoj kev ua hauj lwm qhuab qhia, txoj moo zoo thiaj xub qhib mus rau Lwm Haiv Neeg (Teh. 10–11). Nyob hauv hnub nyoog kawg, Petus, nrog rau Yakaunpaus thiab Yauhas, los saum ntuj los thiab muab lub Pov Thawj Hwj Mekhixedes thiab nws cov yawm sij rau Joseph Smith thiab Oliver Cowdery (Q&K 27:12–13; 128:20).

Petus thawj tsab ntawv

Tau sau thawj tsab ntawv los ntawm “Npanpiloos” (tej zaum yog Loos) thiab tau xa nws mus rau Haiv Neeg Ntseeg nyob qhov chaw tam sim no hu ua Asia Minor tsis ntev tom qab Niloos pib tsim txom cov Neeg Ntseeg Khetos.

Tshooj 1 hais txog Khetos txoj hauj lwm ua tus Txhiv Dim uas tau hais ua ntej ntuj tsim teb raug. Tshooj 2–3 piav tias Khetos yog tus ncej zeb tag tseem ceeb tshaj ntawm lub Koom Txoos, piav tias Haiv Neeg Ntseeg tuav ib lub pov thawj hwj los ntawm Vajtswv, thiab piav tias Khetos mus qhia Vajtswv txoj lus rau cov ntsuj plig uas raug kaw lawm. Tshooj 4–5 piav vim li cas yuav tau qhia txoj moo zoo rau cov neeg tuag thiab vim li cas cov txwj laug yuav tsum yug pab yaj.

Petus tsab ntawv thib ob

Tshooj 1 ntuas Haiv Neeg Ntseeg mob siab kom peb txoj kev hu thiab txoj kev xaiv tseg yuav muaj tseeb tiag muaj tseeb tiag. Tshooj 2 ceeb toom txog tej xib hwb cuav. Tshooj 3 hais txog hnub nyoog kawg thiab Khetos txoj Kev Los Zaum Ob.