Kev tshwm sim nyob hauv hnub nyoog kawg qhia tias ntuj txiag teb tsaus yog ob qho chaw. Qhov thib ib, yog lub chaw nyob ib ntus hauv lub ntuj ntsuj plig rau cov uas tsis mloog lus thaum lawv ua neej hauv lub ntiaj teb uas txawj tuag no. Hais li no ces, ntuj txiag teb tsaus muaj hnub kawg. Cov ntsuj plig nyob ntawd yuav kawm txog txoj moo zoo, thiab ib hnub tom qab lawv hloov siab lees txim lawv yuav sawv rov los rau theem yeeb koob uas lawv tsim nyog nyob. Cov uas tsis kam hloov siab lees txim, tiam sis tsis yog cov tub ntawm txoj kev puas tsuaj, lawv yuav nyob hauv ntuj txiag teb tsaus mus tas lub Milenias. Tom qab ib txhiab xyoo uas muaj kev tsim txom no, lawv yuav sawv rov los rau lub yeeb koob thilethi-aus (Q&K 76:81–86; 88:100–101).
Qhov thib ob, yog lub chaw nyob mus ib txhis rau cov uas tsis txais kev txhiv dim los ntawm Yexus Khetos txoj Kev Theej Txhoj. Hais li no ces, cov no yuav nyob hauv ntuj txiag teb tsaus mus ib txhis. Yog ib lub chaw rau cov uas “vuab tsuab li qub” (Q&K 88:35, 102). Qhov no yog qhov chaw uas Dab Ntxwg Nyoog, nws cov tim tswv, thiab kev puas tsuaj cov tub—cov uas tsis kam lees Leej Tub tom qab Leej Txiv tau ua Nws tshwm sim los—yuav nyob mus ib txhis (Q&K 76:43–46).
Tej thaum cov vaj lug kub hu ntuj txiag teb tsaus ua qhov chaw tsaus ntuj nti.