Lihais, Nifais Txiv
Nyob hauv Phau Ntawv Maumoos, Neeg Henplais ib tug yaj saub uas coj nws tsev neeg thiab cov uas nrog nws tawm ntawm Yeluxalees mus rau ib thaj av uas tau cog lus tseg nyob rau sab hnub poob thaum kwv yees 600 xyoo ua ntej Yexus yug los. Lihais yog thawj tus yaj saub ntawm nws cov neeg nyob hauv Phau Ntawv Maumoos.
Lihais khiav ntawm Yeluxalees mus nrog nws tsev neeg thaum tus Tswv txib nws mus (1 Nf. 2:1–4). Nws yog Yauxej ib tug xeeb ntxwv, tus uas raug muag mus rau Iyiv teb (1 Nf. 5:14). Tus Tswv muab kev ua yog toog pom tsob ntoo uas cawm neeg txoj sia rau nws (1 Nf. 8:2–35). Lihais thiab nws cov tub ua ib lub nkoj thiab mus rau sab hnub poob (1 Nf. 17–18). Nws thiab nws cov xeeb leej xeeb ntxwv vam meej hauv ib lub teb chaws tshiab (1 Nf. 18:23–25). Ua ntej nws tas sim neej, Lihais foom koob hmoov rau nws cov tub thiab qhia lawv txog Khetos thiab qhov uas Phau Ntawv Maumoos yuav los muaj nyob hauv hnub nyoog kawg (2 Nf. 1:1–4:12).
Lihais phau ntawv
Joseph Smith pib ntawm Lihais phau ntawv thaum nws txhais Phau Ntawv Maumoos. Lihais phau ntawv no yog ib phau ceev xwm txheej uas Maumoos tau muab txiav ntawm Lihais cov phiaj los. Tom qab nws txhais tau 116 nplooj ntawv ntawm phau no lawm, Joseph muab cov nplooj ntawv no rau Martin Harris, uas tau ua tus teev ntawv rau Joseph ib nyuag ntus thaum txhais Phau Ntawv Maumoos. Tom qab ntawd cov nplooj ntawv no ploj lawm. Joseph tsis rov qab muab Lihais phau ntawv txhais dua los hloov cov nplooj ntawv uas ploj lawm tiam sis nws muab lwm zaj uas muaj ntsis zoo ib yam ntawm cov phiaj kub coj los txhais (saib zaj lus piav Q&K 3; 10). Tam sim no tej zaj no yog thawj rau phau ntawm Phau Ntawv Maumoos.