Tej lus ntawm Vajtswv los rau Nws cov me nyuam hauv lub ntiab teb. Kev tshwm sim puav leej los tau ntawm Khetos txoj Kev Kaj thiab kev tshoov siab ntawm tus Vaj Ntsuj Plig Dawb Huv, kev ua yog toog, kev ua npau suav, los yog cov tim tswv txoj kev los xyuas. Kev tshwm sim muab kev qhia uas muaj peev xwm coj tau cov neeg uas rau siab ntseeg kom mus txog kev cawm seej uas nyob mus ib txhis hauv lub nceeg vaj xilethi-aus.
Tus Tswv muab Nws txoj hauj lwm ua tshwm sim rau Nws cov yaj saub thiab qhia rau cov ntseeg tias tej kev tshwm sim rau cov yaj saub ntawd muaj tseeb (Amaus 3:7). Los ntawm kev tshwm sim, tus Tswv muab kev qhia rau txhua tus neeg uas tshawb nrhiav thiab muaj kev ntseeg, hloov siab lees txim, thiab ua raws li Yexus Khetos txoj moo zoo. Joseph Smith hais tias “Tus Vaj Ntsuj Plig Dawb Huv yog ib tug ua kev tshwm sim” thiab “tsis muaj ib tug neeg uas tau txais tus Vaj Ntsuj Plig Dawb Huv es tsis tau txais kev tshwm sim.”
Nyob hauv tus Tswv lub Koom Txoos, Thawj Pawg Thawj Tswj Hwm thiab Pawg Kaum Ob tug Thwj Tim yog cov yaj saub, cov pom tau, thiab cov txais kev tshwm sim rau lub Koom Txoos thiab lub ntiaj teb. Tus Thawj Tswj Hwm ntawm lub Koom Txoos yog tib tug uas tus Tswv tso cai txais kev tshwm sim rau lub Koom Txoos (Q&K 28:2–7). Txhua tus neeg txais tau kev tshwm sim pab tau nws tus kheej.