Vajtswv, Pawg Vajtswv

Feem ntau yog hais txog Leej Txiv, los sis Elauhis, uas peb hu ua Vajtswv. Peb hu nws ua Leej Txiv vim Nws yog leej txiv ntawm peb sab ntsuj plig (Tnp. 16:22; 27:16; Mal. 2:10; Mat. 6:9; Efe. 4:6; Hen. 12:9). Vajtswv Leej Txiv yog tus kav loj tshaj plaws hauv lub qab ntuj khwb no. Nws muaj hwj chim loj tshaj plaws (Chk. 18:14; Amas 26:35; Q&K 19:1–3), paub ib puas tsav yam (Mat. 6:8; 2 Nf. 2:24), thiab nyob txhua qhov txhia chaw los ntawm Nws tus Ntsuj Plig (Pnk. 139:7–12; Q&K 88:7–13, 41). Qhov uas tib neeg ntiaj teb muaj kev sib raug zoo nrog Vajtswv yog qhov tshwj xeeb dua ntais txhua yam uas Vajtswv tau tsim los: poj niam thiab txiv neej puav leej yog Vajtswv cov me nyuam ntsuj plig (Pnk. 82:6; 1 Yhs. 3:1–3; Q&K 20:17–18).

Nyob hauv vaj lug kub tsuas muaj ob peb zaug nkaus xwb uas hais txog Vajtswv Leej Txiv txoj kev tshwm sim rau tib neeg pom los yog hais lus rau tib neeg. Cov vaj lug kub hais tias Nws tau hais lus rau Adas thiab Evas (Mauxes 4:14–31) thiab Nws cev lus rau tib neeg txog Yexus Khetos ob peb zaug (Mat. 3:17; 17:5; Yhs. 12:28–29; 3 Nf. 11:3–7). Nws tshwm sim rau Xatefanaus (Teh. 7:55–56) thiab Joseph Smith pom (JS—K 1:17). Tom qab no Nws tshwm sim rau Joseph Smith thiab Sidney Rigdon nkawd ob leeg (Q&K 76:20, 23). Qee zaus Vajtswv tshwm sim rau cov uas hlub Nws thiab hloov lawv tus kheej ua neeg dawb huv rau Nws pom thiab ua rau lawv paub tseeb lawv tus kheej hais tias Nws yog Vajtswv (Mat. 5:8; 3 Nf. 12:8; Q&K 76:116–118; 93:1).

Tus Vajtswv uas peb hu ua Yehauvas yog Leej Tub, Yexus Khetos (Yay. 12:2; 43:11; 49:26; 1 Klt. 10:1–4; 1 Tim. 1:1; Tsm. 1:8; 2 Nf. 22:2). Yexus ua hauj lwm raws li Leej Txiv qhia thiab nrog Nws koom ib lub siab tag nrho. Tag nrho txhua tus neeg yog Nws cov kwv thiab cov muam yau, vim Nws yog tus hlob tshaj plaws ntawm Elauhis cov me nyuam ntsuj plig. Ob peb nqe vaj lug kub siv lo lus Vajtswv thaum hais txog Nws. Piv txwv hais tias, nqe vaj lub kub uas hais tias “Vajtswv tsim lub ntuj thiab lub ntiaj teb” (Chk. 1:1), tiam sis twb yog Yexus uas yog tus Tsim txhua yam raws li Vajtswv Leej Txiv qhia (Yhs. 1:1–3, 10, 14; Hen. 1:1–2).

Tus Vaj Ntsuj Plig Dawb Huv kuj yog ib tug Vajtswv thiab hu ua tus Ntsuj Plig Dawb Huv, tus Ntsuj Plig, thiab Vajtswv tus Ntsuj Plig, thiab lwm lub npe uas zoo li ntawd. Los ntawm tus Vaj Ntsuj Plig Dawb Huv txoj kev pab, ces tib neeg thiaj li paub tias Vajtswv Leej Txiv lub siab nyiam zoo li cas thiab paub tias Yexus yog tus Khetos (1 Klt. 12:3).