Txwj Laug

Lo lus txwj laug nyob hauv phau Npaivnpaum muaj ob peb lub ntsiab. Feem ntau hauv Phau Qub lo lus no qhia txog cov neeg laus hauv ib xeem neeg, uas feem ntau tau los ua cov thawj coj rau kev kav teb kav chaw (Chk. 50:7; Yas. 20:4; Luv 4:2; Mat. 15:2). Vim lawv laus thiab tau ua neej nyob ntev lawv thiaj paub qhuab ntuas zoo. Lawv txoj hauj lwm ntawd tej zaum tsis yog ib txoj hauj lwm hauv lub pov thawj hwj.

Nyob hauv Phau Qub kuj muaj cov txwj laug uas tuav lub Pov Thawj Hwj Mekhixedes uas tau muab tsa los (Khd. 24:9–11). Phau Tshiab kuj qhia tias kev ua txwj laug yog ib lub luag hauj lwm hauv lub pov thawj hwj hauv lub Koom Txoos (Yak. 5:14–15). Nyob hauv cov Neeg Nifais kuj muaj cov txwj laug uas tau muab tsa los tuav lub pov thawj hwj (Amas 4:7, 16; Mln. 3:1). Nyob hauv lub caij nyoog tso txoj cai no, Joseph Smith thiab Oliver Cowdery yog thawj ob tug txwj laug uas tau muab tsa los (Q&K 20:2–3).

Txwj Laug yog lub npe uas niaj hnub no muab rau txhua tus uas tuav lub Pov Thawj Hwj Mekhixedes. Piv xam hais tias, cov tub txib uas yog txiv neej hu ua cov txwj laug. Thiab, ib tug Thwj Tim kuj yog ib tug txwj laug, thiab tsim nyog peb hu cov neeg hauv Pawg Kaum Ob tug Thwj Tim los sis Pawg Xya Caum ua txwj laug no (Q&K 20:38; 1 Pet. 5:1). Nyob hauv tej kev tshwm sim hauv hnub nyoog kawg twb qhia seb niaj hnub no cov txwj laug hauv lub Koom Txoos muaj tej hauj lwm dab tsi (Q&K 20:38–45; 42:44; 46:2; 107:12).