Henplais, Tsab Ntawv rau Neeg

Ib phau nyob hauv Phau Tshiab. Povlauj sau tsab ntawv no mus rau cov mej zeej ntawm lub Koom Txoos uas yog neeg Yudais kom thiaj qhia lawv hais tias tej yam tseem ceeb ntawm Mauxes txoj kev cai twb ua tiav lawm vim yog Khetos thiab Khetos txoj moo zoo txoj kev cai siab zog tau pauv Mauxes txoj kev cai lawm. Thaum Povlauj rov qab los rau Yeluxalees thaum nws mus ua tub txib zaum peb tag lawm (kwv yees li 60 xyoo tom qab Yexus yug los), nws pom tau hais tias cov mej zeej ntawm lub Koom Txoos uas yog neeg Yudais tseem ua raws li Mauxes txoj kev cai (Teh. 21:20). Lub sij hawm no twb yog kaum xyoo tom qab lub rooj sab laj ntawm lub Koom Txoos hauv Yeluxalees uas twb txiav txim siab hais tias yeej tseem cawm tau lwm haiv neeg Ntseeg Khetos txoj sia txawm tias lawv tsis coj raws li ib txhia kab ke ntawm Mauxes txoj kev cai lawm. Ces, tsis ntev tom qab ntawd Povlauj sau ntawv mus rau cov neeg Henplais tias raws li lawv tej vaj lug kub hais thiab raws li tej kev xav zoo zoo, lawv thiaj tsis tas coj li Mauxes txoj kev cai lawm.

Tshooj 1 thiab 2 piav hais tias Yexus muaj hwj chim dua cov tim tswv. Tshooj 3–7 muab Yexus piv rau Mauxes thiab piv rau Mauxes txoj kev cai thiab ua tim khawv hais tias Nws yeej muaj hwj chim loj dua Mauxes thiab kev cai huv tib si. Kuj qhia ntxiv hais tias lub Pov Thawj Hwj Mekhixedes yeej muaj hwj chim dua lub Pov Thawj Hwj Aloos. Tshooj 8–9 qhia tias tej kab ke Mauxes yog los npaj cov neeg rau Khetos txoj hauj lwm qhuab qhia thiab qhia tias Khetos yog tus neeg nruab nrab ntawm kev khi lus tshiab (Amas 37:38–45; Q&K 84:21–24). Tshooj 10 yog kev ntuas kom rau siab thiab muaj kev ntseeg. Tshooj 11 yog qhia txog kev ntseeg. Tshooj 12 qhia txog kev ntuas thiab kev hu neeg. Tshooj 13 hais txog lub sam xeeb ntawm kev sib yuav thiab qhov tseem ceeb ntawm kev mloog lus.