Yaxayas
Ib tug yaj saub hauv Phau Qub uas qhia txog tej uas yuav muaj los yav tom ntej txij thaum xyoo 740 mus txog 701 ua ntej Yexus yug los. Thaum nws yog Vaj Ntxwv Hexekiyas tus thawj qhia tswv yim pab, Yaxayas muaj peev xwm loj hais kom tib neeg mloog nws tej lus txog kev teev ntuj thiab kev kav teb chaws.
Yexus hais Yaxayas tej lus ntau tshaj Nws hais lwm tus yaj saub tej lus. Petus, Yauhas, thiab Povlauj kuj hais Yaxayas tej lus ntau zaus nyob hauv Phau Tshiab thiab. Phau Ntawv Maumoos thiab phau Lus Qhuab Qhia thiab Kev Khi Lus muaj Yaxayas tej lus ntau tshaj lwm tus yaj saub tej lus thiab pab txhais Yaxayas tej lus ntau heev. Nifais qhia nws cov neeg los ntawm Yaxayas tej lus sau (2 Nf. 12–24; Yay. 2–14). Tus Tswv qhia cov Neeg Nifais hais tias “Yaxayas tej lus tseem ceeb heev” thiab hais tias txhua yam yuav muaj raws li Yaxayas tau qhia tej uas yuav muaj los yav tom ntej (3 Nf. 23:1–3).
Yaxayas phau ntawv
Ib phau nyob hauv Phau Qub. Ntau yam uas Yaxayas qhia yuav muaj los yav tom ntej yog hais txog tus Txhiv Dim txoj kev yug los, txog Nws txoj kev ua hauj lwm qhuab qhia hauv ntiaj teb (Yay. 9:6) thiab thaum Nws yog tus Vaj Ntxwv Loj thaum txog hnub kawg tib si (Yay. 63). Nws kuj qhia ntau txog tej uas yuav muaj los yav tom ntej txog Ixayees lub neej thiab.
Tshooj 1 qhia ntsiab lus ntawm phau ntawv no. Yaxayas 7:14; 9:6–7; 11:1–5; 53; thiab 61:1–3 qhia ua ntej txog tus Cawm Seej ntiag tug hauj lwm. Tshooj 2, 11, 12, thiab 35 hais txog tej yam uas yuav muaj hauv hnub nyoog kawg, thaum muab txoj moo zoo txum tim rov qab los, yuav muab Ixayees sau los ua ke, thiab thaj av qhuav yuav tawg paj li lub paj ntshua nplaim. Tshooj 29 hais txog qhov uas yuav muaj Phau Ntawv Maumoos los thaum yav tom ntej (2 Nf. 27). Tshooj 40–46 tshaj tawm tias Yehauvas, uas yog tus Vajtswv tseeb, muaj hwj chim tshaj cov mlom vaj tswv uas cov tsis ntseeg Vajtswv teev tiam. Tej tshooj seem tshuav, 47–66, hais txog tej yam uas yuav muaj thaum muab Ixayees txum tim rov qab los zaum kawg thiab txhim tsa Xi-oos, uas tus Tswv yuav nyob haud nrog Nws cov neeg.