Exalas
Ib tug pov thawj thiab tus kws sau kev cai hauv Phau Qub uas coj ib co neeg Yudais ntawm txoj kev poob cev qhev hauv Npanpiloos rov qab los rau Yeluxalees (Exa. 7–10; Neh. 8; 12). Thaum xyoo 458 ua ntej Yexus yug los nws tau kev tso cai los ntawm Ataxawxes, uas yog vaj ntxwv rau Pawxias, kom coj cov neeg Yudais uas xav rov qab mus rau Yeluxalees (Exa. 7:12–26).
Ua ntej Exalas lub caij, cov pov thawj tau kav nkaus txoj kev nyeem cov vaj lug kub uas hu ua txoj “kev cai.” Exalas pab muab cov vaj lug kub rau txhua tus neeg Yudais. Txoj kev pub tib neeg nyeem “phau qhia kev cai” li no los ua lub hauv paus rau cov neeg Yudais lub neej. Tej zaum Exalas txoj lus qhia tseem ceeb tshaj plaws yog qhov uas nws ua yam ntxwv txog txoj kev npaj nws lub siab los nrhiav tus Tswv txoj kev cai, ua raws li txoj kev cai, thiab qhia kom lwm tus neeg ua li ntawd thiab (Exa. 7:10).
Exalas phau ntawv
Tshooj 1–6 piav txog tej xwm ua muaj los rau caum mus txog yim caum xyoo ua ntej Exalas tuaj txog lub nroog Yeluxalees—Xailas txoj lus tshaj tawm thaum xyoo 537 ua ntej Yexus yug los thiab qhov uas cov neeg Yudais rov qab los nyob es Xelunpanpees ua tus coj kav. Tshooj 7–10 piav seb Exalas ua li cas thiaj txog Yeluxalees. Nws, thiab nws cov neeg, tau yoo mov thiab thov Vajtswv pab pov hwm lawv. Nyob hauv Yeluxalees lawv nrhiav tau coob tus neeg Yudais uas tau khiav mus nyob hauv Yeluxalees thaum Xelunpanpees coj kav thiab tau yuav ib tug poj niam sab nraum txoj kev sib khi lus ces yog li ntawd lawv thiaj tsis huv lawm. Exalas thov Vajtswv rau lawv thiab hais kom lawv cog lus tias lawv yuav maub cov poj niam ntawd nrauj. Exalas zaj keeb kwm thaum kawg yeej nyob rau hauv Nehemis phau ntawv.