Yauhas txoj Kev Tshwm Sim

Phau kawg hauv Phau Tshiab, uas yog ib txoj kev tshwm sim muab rau tus Thwj Tim Yauhas. Tus Tswv tau cia nws pom lub ntiaj teb zaj keeb kwm, qhov tseem ceeb yog hnub nyoog kawg (Tsm. 1:1–2; 1 Nf. 14:18–27; Q&K 77). Yauhas txoj Kev Tshwm Sim kuj hu ua Apokalaxis.

Yauhas txais kev tshwm sim no thaum hnub uas yog tus Tswv hnub nyob hauv lub koog pov txwv Pamaus (Tsm. 1:9–10), nyob ntawm ntug dej Axias, tsis deb ntawm Efexus. Tsis paub tau txais kev tshwm sim no thaum twg tiag tiag.

Cov yawm sij kom qhib kev to taub phau ntawv no muaj nyob hauv 1 Nifais 14:18–27 thiab phau Lus Qhuab Qhia thiab Kev Khi Lus 77 (Ethaws 4:15–16).

Tshooj 1–3 yog tej zaj lus qhia txog phau ntawv no thiab tej tsab ntawv rau xya pawg ntseeg nyob hauv Axias. Yauhas sau tej tsab ntawv no pab Haiv Neeg Ntseeg kho tej teeb meem. Tshooj 4–5 sau tej kev ua yog toog uas Yauhas txais uas qhia lub yeeb haum thiab lub hwj chim ncaj ncees ntawm Vajtswv thiab Khetos. Nyob hauv tshooj 6–9, 11, Yauhas sau tias nws pom ib phau ntawv uas tau muab xya lub cim nias rau, txhua lub cim piv txog ib txhiab xyoo ntawm lub ntiaj teb zaj keeb kwm. Tej tshooj no hais ntau txog tej yam uas muaj nyob hauv lub cim xya (saib Tsm. 8–9; 11:1–15). Tshooj 10 piav txog ib phau ntawv uas Yauhas muab noj. Phau ntawv no piv txog ib txoj ntiag tug hauj lwm uas nws yuav ua thaum yav tom ntej. Tshooj 12 sau ib txoj kev ua yog toog tseg txog kev phem uas pib nyob saum ntuj thaum Dab Ntxwg Nyoog ntxeev siab thiab raug ntiab tawm. Npluav rog uas pib nyob saum ntuj los tseem ua nyob hauv lub ntiaj teb. Nyob hauv tshooj 13, 17–19, Yauhas piav txog tej nceeg vaj phem ntawm lub ntiaj teb uas Dab Ntxwg Nyoog kav thiab sau txog tej uas yuav tshwm sim rau tej nceeg vaj ntawd, thiab kuj sau txog tej kev puas tsuaj zaum kawg ntawm kev phem. Tshooj 14–16 piav txog Haiv Neeg Ntseeg tej kev ncaj ncees thaum muaj kev phem nyob puag ncig ua ntej kiag Khetos txoj Kev Los Zaum Ob. Tshooj 20–22 piav txog lub caij Milenias, lub nroog zoo nkauj uas yog Yeluxalees Tshiab, thiab tej yam uas yuav muaj thaum kawg ntawm lub ntiaj teb zaj keeb kwm.