Nauvoo, Illinois (Amelikas)

Ib lub nroog uas Tsoom Haiv Neeg Ntseeg hauv Hnub Nyoog Kawg txhim tsa thaum xyoo 1839 nyob hauv lub xeev Illinois. Nws nyob ntawm ntug Dej Mississippi, yuav luag 200 mais (320 kilaumev) pem hauv dej ntawm St. Louis.

Vim Haiv Neeg Ntseeg raug tej kev tsim txom nyob hauv lub xeev Missouri, lawv tsiv 200 mais mus rau sab qaum teb hnub tuaj thiab hla tus Dej Mississippi, mus rau hauv Illinois, nyob rau ntawd lawv nrhiav tau ib qho chaw uas haj yam nyiam tshaj. Thaum kawg, Haiv Neeg Ntseeg yuav av nyob ze lub zos uas tsis tau ua tiav hu ua Commerce. Thaj av no feem ntau yog hav iav thiab tsuas muaj ob peb lub tsev dog dig xwb. Haiv Neeg Ntseeg tso dej tawm ntawm thaj av thiab ua lawv cov tsev. Joseph Smith coj nws tsev neeg los nyob hauv ib lub tsev me me uas xuas tog ntoo ua. Tau muab lub nroog Commerce hloov npe mus ua Nauvoo, raws li lo lus Henplais uas txhais tias “zoo nkauj.”

Tau sau ob peb tshooj ntawm phau Lus Qhuab Qhia thiab Kev Khi Lus nyob hauv Nauvoo (Q&K 124–129; 132; 135). Tus Tswv qhia Haiv Neeg Ntseeg kom lawv ua ib lub tuam tsev nyob hauv Nauvoo (Q&K 124:26–27). Lawv ua lub tuam tsev thiab tsim Xi-oos tej ceg txheem ntseeg ua ntej lawv raug ntiab tawm ntawm lawv tej tsev thaum xyoo 1846. Vim lawv raug tsim txom li no, Haiv Neeg Ntseeg ncaim cheeb tsam ntawd thiab mus rau sab hnub poob.