1 Kuv tus tub qhe Joseph Smith, tus Tswv hais tseeb li no rau koj tias, kuv txaus siab heev rau tej koj tiam thiab lees paub, uas koj tau ua; vim yog rau qhov no kuv tau yug koj hlob, kom kuv yuav qhia tawm tau kuv lub tswv yim los ntawm cov uas tsis muaj zog ntawm lub ntiaj teb.

2 Kuv pom tias koj tej lus thov yeej zoo; thiab kuv hais teb rau koj tias, kuv hu koj tam sim no kiag mus ua tib zoo tshaj tawm kuv txoj moo zoo, thiab tshaj tawm txog ceg txheem ntseeg no uas kuv tau tsim los ua tus ncej zeb tag ntawm Xi-oos, uas yuav muab txhuam kom ci zoo nkauj xws li muaj yam ntxwv zoo li ib lub tsev vaj ntxwv.

3 Yuav tsum xa zaj lus tshaj tawm no mus rau txhua tus vaj ntxwv nyob hauv lub ntiaj teb, mus rau plaub ceg kaum ntuj, mus rau tus thawj tswj hwm muaj meej mom uas nyuam qhuav xaiv tau, thiab cov tswv xeev tsim txiaj ntawm lub teb chaws uas koj nyob, thiab rau txhua haiv neeg ntawm lub ntiaj teb uas tawg khiav ri niab thoob plaws.

4 Cia li muab tej ntawd sau cia los ntawm txoj kev siab mos siab muag thiab los ntawm tus Vaj Ntsuj Plig Dawb Huv lub hwj chim, uas yuav nyob hauv koj thaum lub sij hawm sau tej ntawd;

5 Vim tus Vaj Ntsuj Plig Dawb Huv yuav ua rau koj kom paub kuv lub siab nyiam ntsig txog tej vaj ntxwv thiab tej nom tswv ntawd, rau tej uas yuav los raug lawv rau ib lub sij hawm yuav los.

6 Vim, saib seb, kuv tab tom yuav hu lawv kom coj raws li txoj kev kaj thiab yeeb koob ntawm Xi-oos, vim twb los txog lub sij hawm teem tseg kom txhawb nqa nws lawm.

7 Yog li ntawd, koj cia li hu lawv nrog kev tshaj tawm nrov, thiab nrog koj txoj lus tim khawv, tsis txhob ntshai lawv, vim lawv zoo li tej nyom, thiab tag nrho lawv lub yeeb koob zoo li lub paj uas tsis ntev yuav poob mus, xwv kom lawv kuj yuav tsis muaj lus hais—

8 Thiab kom kuv yuav los xyuas lawv nyob rau hnub los rau txim, thaum uas kuv yuav qhib daim npog kuv lub ntsej muag, los muab nqi zog ntawm tus neeg quab yuam mus nyob xyaw tej neeg siab dag, qhov uas muaj kev tom hniav qees, yog hais tias lawv xyeej kuv cov tub qhe thiab kuv txoj lus tim khawv uas kuv tau muab ua tshwm sim los rau lawv.

9 Thiab ntxiv, kuv yuav mus xyuas thiab ua rau lawv lub siab mos muag, lawv ntau leej kom zoo rau nej, kom lawv yuav ntseeg nej, kom lawv yuav los rau txoj kev kaj ntawm qhov tseeb, thiab kom Lwm Haiv Neeg los muab Xi-oos tsa nto los sis tsa sawv.

10 Vim hnub uas kuv los rau txim twb yuav los sai sai, nyob rau teev thaum uas nej xav tsis txog; thiab qhov chaw twg thiaj yog qhov chaw nyab xeeb rau kuv cov neeg, thiab yog qhov chaw nkaum rau cov uas seem ntawm cov ntawd?

11 Cia li tsim, auj tej vaj ntxwv ntawm lub ntiaj teb! Nej cia li los, auj, nej cia li los, nrog nej tej kub thiab tej nyiaj dawb, los mus pab kuv cov neeg, los mus rau Xi-oos cov ntxhais lub tsev.

12 Thiab ntxiv, kuv hais tseeb rau koj tias, cia kuv tus tub qhe Robert B. Thompson pab koj sau zaj lus tshaj tawm no, vim kuv txaus siab rau nws, thiab txaus siab kom nws yuav nrog koj;

13 Yog li ntawd, cia nws mloog koj tej lus ntuas, thiab kuv yuav foom koob hmoov rau nws nrog ntau yam koob hmoov; cia nws rau siab ntseeg thiab ruaj nrees rau ntawm txhua yam txij no mus, thiab nws yuav muaj hwj chim rau kuv pom;

14 Tiam sis cia nws nco ntsoov hais tias kuv yuav kom nws ua nws txoj hauj lwm saib xyuas.

15 Thiab ntxiv, kuv hais tseeb rau koj tias, kuv tus tub qhe Hyrum Smith tau koob hmoov; vim kuv, tus uas yog tus Tswv, hlub nws vim txoj kev coj zoo ntawm nws lub siab, thiab vim nws nyiam yam uas kuv pom tias yog qhov yog, tus Tswv hais li.

16 Ntxiv, cia kuv tus tub qhe John C. Bennett pab koj ua koj txoj hauj lwm xa kuv txoj lus mus rau tej vaj ntxwv thiab neeg ntawm lub ntiaj teb, thiab sawv ntawm koj ib sab, twb yog koj kuv tus tub qhe Joseph Smith, thaum lub sij hawm muaj kev txom nyem; thiab nws nqi zog yuav tsis poob yog hais tias nws txais tej lus ntuas.

17 Thiab vim nws txoj kev hlub nws yuav muaj hwj chim, vim nws yuav yog kuv li yog hais tias nws ua qhov no, tus Tswv hais li. Kuv tau pom tej yam uas nws tau ua, uas kuv txais yuav yog hais tias nws ua ntxiv mus, thiab yuav muab meej mom ntawm tej koob hmoov thiab yeeb koob loj rau nws ntoo.

18 Thiab ntxiv, kuv hais rau koj tias yog kuv lub siab nyiam uas kuv tus tub qhe Lyman Wight yuav tshaj tawm txoj moo zoo mus ntxiv rau Xi-oos, los ntawm lub siab mos siab muag, ua tim khawv txog kuv rau neeg ntiaj teb; thiab kuv yuav txhawb nqa nws ib yam li nyob saum dav ob sab tis; thiab nws yuav tau yeeb koob thiab sam xeeb rau nws tus kheej thiab rau kuv lub npe.

19 Xwv kom thaum nws ua nws txoj hauj lwm tag kuv yuav tau txais nws los rau kuv tus kheej, ib yam li kuv tau txais kuv tus tub qhe David Patten, tus uas nrog kuv nyob lub sij hawm no, thiab kuv tus tub qhe Edward Partridge, thiab kuv tus tub qhe muaj hnub nyoog Joseph Smith, tus Laus, tus uas zaum nrog Anplaham nyob ntawm nws sab xis, thiab nws tau koob hmoov thiab dawb huv, vim nws yog kuv li.

20 Thiab ntxiv, kuv hais tseeb rau koj tias, kuv tus tub qhe George Miller tsis muaj kev dag ntxias li; tso siab tau rau nws vim yog txoj kev coj zoo ntawm nws lub siab; thiab vim txoj kev hlub uas nws muaj rau kuv zaj lus tim khawv, kuv, tus uas yog tus Tswv, hlub nws.

21 Yog li ntawd kuv hais rau koj tias, kuv muab lub luag hauj lwm ua ib tug ntawm pawg npisov khi rau saum nws taub hau, zoo li kuv tus tub qhe Edward Partridge, kom nws yuav tau txais tej kev fij siab muab ntawm kuv lub tsev, kom nws yuav mus foom koob hmoov rau cov pluag ntawm kuv cov neeg lub taub hau, tus Tswv hais li. Tsis txhob cia leej twg saib tsis taus kuv tus tub qhe George, vim nws yuav hwm kuv.

22 Cia kuv tus tub qhe George, thiab kuv tus tub qhe Lyman, thiab kuv tus tub qhe John Snider, thiab lwm cov, kom txhim tsa ib lub tsev los rau kuv lub npe, ib lub uas zoo li kuv tus tub qhe Joseph yuav qhia rau lawv, nyob qhov chaw uas nws yuav qhia rau lawv thiab.

23 Thiab yuav siv lub tsev no ua ib lub tsev so, ib lub tsev rau tej qhua tuaj deb tuaj ho tau los so; yog li ntawd cia lub tsev no ua ib lub tsev zoo, tsim nyog txais yuav tag nrho, kom tus neeg taug kev uas nkees yuav txais tau kev noj qab nyob zoo thiab kev nyab xeeb thaum nws xav txog tus Tswv txoj lus; thiab tus ncej zeb tag kuv twb tau tsa rau Xi-oos lawm.

24 Lub tsev no yuav ua ib qho chaw noj qab haus huv yog hais tias yuav txhim tsa lub tsev no rau kuv lub npe, thiab yog hais tias tus tswv kav uas yuav tsa los saib lub tsev yuav tsis pub ib qho vuab tsuab los rau haud. Lub tsev no yuav tsum dawb huv, tsis li ces tus Tswv nej tus Vajtswv yuav tsis nyob haud.

25 Thiab ntxiv, kuv hais tseeb rau koj tias, kom tag nrho kuv haiv neeg ntseeg cia li tuaj deb tuaj.

26 Thiab nej cia li xa ib co tub xa xov mus kev nrawm, muaj tseeb tiag, cov tub xa xov uas tau xaiv, thiab hais rau lawv hais tias: Nej cia li tuaj, nrog tag nrho nej tej kub, thiab nej tej nyiaj dawb, thiab nej tej hlaws zeb muaj nqis, thiab nrog tag nrho nej tej qub txeeg qub teg; thiab tag nrho cov uas paub txog tej qub txeeg qub teg, cov uas yuav tuaj kom tuaj, thiab nqa tej ntoo ciab, tej ntoo npeb, thiab tej ntoo thuv, ua ke nrog tag nrho tej ntoo muaj nqis hauv lub ntiaj teb;

27 Thiab nrog hlau, nrog tooj liab, thiab nrog tooj dag, thiab nrog tooj xiav, thiab nrog rau tag nrho nej tej khoom muaj nqis hauv lub ntiaj teb; thiab ua ib lub tsev rau kuv lub npe, rau tus Siab Tshaj Plaws nyob.

28 Vim twb tsis pom muaj ib qho chaw nyob hauv ntiaj teb no uas nws yuav los rau thiab txum tim dua tej uas tau poob lawm rov qab los rau nej, los sis tej uas nws tau tshem mus lawm, uas twb yog qhov txhij txhua ntawm lub pov thawj hwj.

29 Vim twb tsis muaj ib lub dab ua kev cai raus dej nyob hauv lub ntiaj teb, xwv kom kuv haiv neeg ntseeg, lawv yuav ua tau kev cai raus dej rau cov uas tuag lawm—

30 Vim yuav tsum ua txoj kab ke no nyob hauv kuv lub tsev, thiab tsis tsim nyog kuv txais yuav, tsuas yog lub sij hawm uas nej txom nyem xwb, uas nej thiaj li tsis muaj peev xwm txhim tsa tau ib lub tsev rau kuv.

31 Tiam sis kuv txib nej, tag nrho nej uas yog kuv haiv neeg ntseeg, kom txhim tsa ib lub tsev rau kuv; thiab kuv pub ib lub sij hawm txaus rau nej txhim tsa ib lub tsev rau kuv; thiab nyob rau lub sij hawm no nej tej kev cai raus dej yuav tsim nyog rau kuv txais yuav.

32 Tiam sis saib seb, thaum txoj kev teem caij nyoog no xaus ces nej tej kev cai raus dej rau nej cov neeg uas tuag lawm yuav tsis tsim nyog kuv txais yuav; thiab yog hais tias nej tsis ua tej yam no thaum txoj kev teem caij nyoog xaus ces lub koom txoos yuav raug xyeej, nrog rau nej cov neeg uas tuag lawm, tus Tswv nej tus Vajtswv hais li.

33 Vim kuv hais tseeb rau nej tias, tom qab nej tau muaj sij hawm txaus los txhim tsa ib lub tsev rau kuv, qhov chaw uas tsim nyog muaj txoj kab ke ua kev cai raus dej rau cov neeg tuag, thiab ua rau txoj kab ke ntawd uas tau tsim muaj ua ntej ntuj tsim teb raug, ces nej tej kev cai raus dej rau nej cov neeg uas tuag lawm yuav tsis tsim nyog rau kuv txais yuav;

34 Vim yuav tsa tej yawm sij ntawm lub pov thawj hwj dawb huv nyob rau haud, kom nej yuav tau txais sam xeeb thiab yeeb koob.

35 Thiab tom qab lub sij hawm no, nej tej kev cai raus dej rau cov tuag, los ntawm cov uas raug tawg khiav ri niab mus qhov txhia chaw, yeej tsis tsim nyog rau kuv txais yuav, tus Tswv hais li.

36 Vim tau muab teem tseg lawm hais tias nyob hauv Xi-oos, thiab nyob hauv nws tej ceg txheem ntseeg, thiab nyob hauv Yeluxalees, tej chaw uas kuv tau tsa los ua chaw nkaum, yuav yog tej chaw uas nej ua kev cai raus dej rau nej cov tuag.

37 Thiab ntxiv, kuv hais tseeb rau nej tias, ua li cas nej tej kev cai ntxuav thiaj yuav tsim nyog rau kuv txais yuav, tsuas yog nej ua tej ntawd nyob hauv ib lub tsev uas nej tau txhim tsa rau kuv lub npe xwb?

38 Twb yog, vim li no es kuv thiaj tau txib Mauxes kom nws yuav tsum ua ib lub tuam tsev ntaub, kom lawv yuav tsum nqa lub tsev no nrog lawv nyob tom roob moj sab qhua, thiab kom txhim tsa ib lub tsev nyob hauv thaj av uas cog lus cia, kom yuav muab tej kab ke ntawd tshwm sim los, tej uas tau muab zais ua ntej muaj lub ntiaj teb.

39 Yog li ntawd, kuv hais tseeb rau nej tias, nej tej kev cai pleev roj, thiab nej tej kev cai ntxuav, thiab nej tej kev cai raus dej rau cov tuag, thiab nej tej rooj txoos ua kev cai, thiab nej tej kev nco txog rau nej tej kev txi los ntawm Levis cov tub, thiab rau nej tej kev tshwm sim nyob hauv nej tej chaw dawb huv tshaj plaws uas nej txais tej kev sib txuas lus, thiab nej tej kev cai thiab kev txiav txim, rau txoj kev chiv ntawm tej kev tshwm sim thiab hauv paus ntawm Xi-oos, thiab rau lub yeeb koob, sam xeeb, thiab vaj txiaj ntsim ntawm tag nrho nws tej pej xeem, yog tsa los ntawm txoj kab ke ntawm kuv lub tsev dawb huv, uas tus Tswv yeej ib txwm txib kuv cov neeg kom txhim tsa rau kuv lub npe dawb huv.

40 Thiab kuv hais tseeb rau nej tias, cia li txhim tsa lub tsev no rau kuv lub npe, kom kuv yuav tau muab kuv tej kab ke nyob haud ua tshwm sim los rau kuv cov neeg;

41 Vim kuv pom zoo muab tej yam uas tau muab zais txij puag thaum ntuj tsim teb raug los ua tshwm sim rau kuv cov ntseeg, tej yam uas hais txog lub caij nyoog tso txoj cai uas muaj txhij txhua.

42 Thiab kuv yuav muab txhua yam ntsig txog lub tsev no los qhia rau kuv tus tub qhe Joseph, thiab txog lub pov thawj hwj ntawm lub tsev no, thiab qhov chaw uas yuav txhim tsa lub tsev ntawd.

43 Thiab nej yuav tsum txhim tsa lub tsev no rau ntawm qhov chaw uas nej tau xav lawm hais tias yuav txhim tsa rau, vim qhov ntawd yog qhov chaw uas kuv tau xaiv rau nej txhim tsa lub tsev no.

44 Yog hais tias nej ua hauj lwm nrog tag nrho nej lub zog, kuv yuav fij qhov chaw ntawd kom yuav hloov ua dawb huv.

45 Thiab yog hais tias kuv cov neeg yuav mloog kuv lub suab, thiab lub suab ntawm kuv cov tub qhe uas kuv tau tsa los coj kuv cov neeg, saib seb, kuv hais tseeb rau nej tias, lawv yuav tsis raug muab tshem tawm ntawm lawv qhov chaw mus.

46 Tiam sis yog lawv tsis mloog kuv lub suab, los yog tsis mloog cov txiv neej uas kuv tau tsa no lub suab, lawv yuav tsis tau koob hmoov, vim lawv ua rau kuv tej chaw dawb huv vuab tsuab, thiab kuv tej kab ke dawb huv, thiab tej txhooj, thiab kuv tej lus dawb huv uas kuv muab rau lawv.

47 Thiab yuav muaj tias yog nej txhim tsa ib lub tsev rau kuv lub npe, thiab tsis ua tej yam uas kuv hais, kuv yuav tsis ua raws li txoj kev lav lus uas kuv cog rau nej, thiab yuav tsis ua raws li tej kev cog lus uas nej xav tau ntawm kuv txhais tes, tus Tswv hais li.

48 Nej yuav tsis tau koob hmoov, tiam sis nej yuav tau tej kev foom tsis zoo, tej kev npau taws, tej kev chim siab, thiab tej kev txiav txim los rau saum nej tus kheej taub hau, los ntawm nej tus kheej tej hauj lwm, los ntawm nej tej kev ruam, thiab los ntawm tag nrho nej tej kev qias, uas nej ua rau kuv pom, tus Tswv hais li.

49 Kuv hais tseeb tseeb rau nej tias, thaum kuv muab ib lo lus txib rau neeg cov tub ki ib tug twg kom ua ib txoj hauj lwm rau kuv lub npe, thiab cov neeg cov tub ki ntawd nrog tag nrho lawv lub dag zog thiab nrog tag nrho tej uas lawv muaj mus ua txoj hauj lwm ntawd, thiab tsis tsum lawv txoj kev rau siab, thiab lawv cov yeeb ncuab tuaj tawm tsam lawv thiab tab kaum lawv txoj kev ua txoj hauj lwm ntawd, saib seb, yog kuv lub siab xav tau tias tsis tas yuav tseev kom cov neeg cov tub ki ntawd txhais tes ua txoj hauj lwm ntawd ntxiv lawm, tiam sis kom txais yuav lawv tej kev tiam.

50 Thiab txoj kev ua phem thiab kev ua txhaum ntawm kuv tej kev cai dawb huv thiab tej lus txib kuv yuav los muab cov neeg uas tab kaum kuv txoj hauj lwm xyuas, kom txog tiam neeg thib peb thiab thib plaub, ntev npaum li uas lawv yuav tsis hloov siab lees txim, thiab ntxub kuv, tus Tswv uas yog Vajtswv hais li.

51 Yog li ntawd, rau lub hom phiaj no kuv thiaj tau txais tej kev tiam los ntawm cov uas kuv tau txib kom txhim tsa ib lub nroog thiab ib lub tsev rau kuv lub npe, nyob hauv Jackson ciaj ciam av, Missouri, tiam sis raug lawv cov yeeb ncuab tab kaum, tus Tswv nej tus Vajtswv hais li.

52 Thiab kuv yuav tso kev txiav txim, kev npau taws, thiab kev chim siab, kev nyiav, thiab kev ntxhov siab, thiab kev tom hniav qees rau lawv lub taub hau, mus txog tiam neeg thib peb thiab thib plaub, ntev npaum li uas lawv yuav tsis hloov siab lees txim, thiab ntxub kuv, tus Tswv uas yog nej tus Vajtswv hais li.

53 Thiab kuv hais li no kom ua ib tug yam ntwv rau nej, rau nej txoj kev nplij siab ntsig txog tag nrho cov uas tus Tswv txib kom ua ib txoj hauj lwm thiab raug tab kaum los ntawm lawv cov yeeb ncuab txhais tes, thiab los ntawm kev quab yuam, tus Tswv nej tus Vajtswv hais li.

54 Vim kuv yog tus Tswv nej tus Vajtswv, thiab kuv yuav cawm tag nrho nej cov kwv tij uas tau muaj lub siab dawb, thiab tau raug tua tuag nyob hauv thaj av Missouri, tus Tswv hais li.

55 Thiab ntxiv, kuv hais tseeb rau nej tias, kuv rov qab txib nej dua kom txhim tsa ib lub tsev rau kuv lub npe, twb yog nyob qhov chaw no, kom nej yuav ua pov thawj rau kuv hais tias nej rau siab ntseeg rau txhua tsav txhua yam uas kuv txib nej, kom kuv yuav foom koob hmoov rau nej, thiab muab meej mom sam xeeb, kev tsis txawj tuag, thiab txoj sia nyob mus ib txhis rau nej ntoo.

56 Thiab nim no kuv hais rau nej tias, ntsig txog kuv lub tsev so uas kuv tau txib nej kom txhim tsa rau tej qhua tuaj so, cia li tsa lub tsev no rau kuv lub npe, thiab cia li muab kuv lub npe tis rau, thiab cia kuv tus tub qhe Joseph thiab nws tsev neeg muaj chaw nyob rau haud, ntawm ib tiam neeg mus rau ib tiam.

57 Vim txoj kev pleev roj no kuv tau pleev rau saum nws taub hau, kom yuav muab nws txoj koob hmoov tso rau saum nws cov xeeb leej xeeb ntxwv taub hau tom qab nws.

58 Thiab ib yam li kuv tau hais rau Anplaham ntsig txog tej xeem neeg ntawm lub ntiaj teb, tib yam li ntawd kuv hais rau kuv tus tub qhe Joseph: Dhau ntawm koj thiab koj cov tub ki los ces tej xeem neeg ntawm lub ntiaj teb yuav tau koob hmoov.

59 Yog li ntawd, cia kuv tus tub qhe Joseph thiab nws cov tub ki tom qab nws muaj chaw nyob hauv lub tsev ntawd, ntawm ib tiam neeg mus rau ib tiam, mus ib txhiab thiab ib txhis, tus Tswv hais li.

60 Thiab cia li muab lub tsev ntawd lub npe hu ua lub Tsev Nauvoo; thiab cia lub tswv no ua ib qho chaw nyob zoo rau neeg, thiab ib qho chaw so rau tus neeg taug kev uas nkees, kom nws yuav xav txog Xi-oos lub yeeb koob, thiab lub yeeb koob ntawm Xi-oos tus ncej zeb tag no;

61 Kom nws kuj yuav txais tau tej lus ntuas los ntawm cov uas kuv tau tsa los ua zoo li tej nroj nto moo, thiab li cov neeg zov nyas nyob saum Xi-oos tej phab ntsa.

62 Saib seb, kuv hais tseeb rau nej tias, cia kuv tus tub qhe George Miller, thiab kuv tus tub qhe Lyman Wight, thiab kuv tus tub qhe John Snider, thiab kuv tus tub qhe Peter Haws cia li txhim kho lawv tus kheej, thiab tsa lawv ib tug ua tus thawj tswj hwm saib xyuas lawv pawg rau lub hom phiaj txhim tsa lub tsev ntawd.

63 Thiab lawv yuav tsum tsim ib tug txhooj lij choj, lawv thiaj yuav txais tau nyiaj peev los txhim tsa lub tsev ntawd.

64 Thiab lawv yuav tsum tsis txhob txais tsawg dua li tsib caug daulas nyiaj rau ib phuv ua tswv nyob hauv lub tsev ntawd, thiab yuav tso cai rau lawv txais kaum tsib txhiab daulas nyiaj los ntawm ib tug neeg twg ua tswv nyob hauv lub tsev ntawd.

65 Tiam sis yuav tsum tsis txhob tso cai rau lawv txais tshaj kaum tsib txhiab daulas nyiaj ua tswv los ntawm ib tug neeg twg.

66 Thiab yuav tsum tsis txhob tso cai rau lawv txais tsawg dua li tsib caug daulas nyiaj rau ib phuv ua tswv los ntawm ib tug neeg twg nyob hauv lub tsev ntawd.

67 Thiab yuav tsum tsis txhob tso cai rau lawv txais ib tug neeg twg, los ua ib tug tswv phuv nyob hauv lub tsev no, tsuas yog nws them nws li nyiaj peev mus rau hauv lawv txhais tes thaum lub sij hawm nws txais phuv ua tswv;

68 Thiab npaum li qhov nyiaj peev nws them mus rau hauv lawv txhais tes ces nws yuav tau txais phuv ua tswv npaum li ntawd nyob hauv lub tsev ntawd; tiam sis yog hais tias nws tsis them dab tsi mus rau hauv lawv txhais tes li ces nws yuav tsis tau txais ib phuv li ua tswv nyob hauv lub tsev ntawd.

69 Thiab yog leej twg them nyiaj peev mus rau hauv lawv txhais tes ces yog nws them rau phuv ua tswv nyob hauv lub tsev ntawd, rau nws tus kheej, thiab rau nws tiam neeg tom qab nws, ntawm ib tiam neeg mus rau ib tiam, ntev npaum li nws thiab nws cov xeeb ntxwv yuav tuav phuv ua tswv ntawd, thiab txhob muab muag los yog tshem phuv ua tswv tawm ntawm lawv tes los ntawm lawv tus kheej txoj kev xaiv thiab ua, yog nej yuav ua li kuv lub siab nyiam, tus Tswv nej tus Vajtswv hais li.

70 Thiab ntxiv, kuv hais tseeb rau nej tias, yog hais tias kuv tus tub qhe George Miller, thiab kuv tus tub qhe Lyman Wight, thiab kuv tus tub qhe John Snider, thiab kuv tus tub qhe Peter Haws tau txais ib phuv twg ua tswv los rau hauv lawv txhais tes, uas yog nyiaj, los yog tej khoom uas lawv tau txais qhov nqi sib npaug li nyiaj, lawv yuav tsum tsis txhob muab ib qho ntawm cov nyiaj peev ntawd coj mus ua lwm yam, tsuas yog rau lub tsev ntawd xwb.

71 Thiab yog hais tias lawv muab ib qho twg ntawm cov nyiaj peev coj mus ua lwm yam, uas tsis yog rau lub tsev ntawd, es tsis tau lus pom yeem los ntawm tus muaj phuv ua tswv, thiab tsis them plaub npaug ntawm qhov nyiaj lawv coj mus ua lwm yam, uas tsis yog rau lub tsev ntawd, lawv yuav raug foom tsis zoo, thiab yuav raug rho tawm ntawm lawv qhov chaw mus, tus Tswv uas yog Vajtswv hais li; vim kuv, tus uas yog tus Tswv, yog Vajtswv, thiab yuav tsis pub lawv thuam rau ib qho twg ntawm tej yam no.

72 Kuv hais tseeb rau nej tias, cia kuv tus tub qhe Joseph them nyiaj peev mus rau hauv lawv txhais tes rau txoj kev txhim tsa lub tsev ntawd, raws li nws pom zoo; tiam sis kuv tus tub qhe Joseph them tsis tau tshaj kaum tsib txhiab daulas nyiaj ua tswv nyob hauv lub tsev ntawd, los sis tsawg dua tsib caug daulas nyiaj; thiab lwm tus neeg twg los tsis tau ib yam, tus Tswv hais li.

73 Thiab kuj muaj lwm cov thiab uas xav paub txog kuv lub siab nyiam ntsig txog lawv, vim lawv tau thov kom tau txais los ntawm kuv.

74 Yog li ntawd, kuv hais rau nej ntsig txog kuv tus tub qhe Vinson Knight, yog hais tias nws yuav ua raws kuv lub siab nyiam ces cia nws muab nyiaj peev mus rau hauv lub tsev ntawd rau nws tus kheej, thiab rau nws tiam neeg tom qab nws, ntawm ib tiam neeg mus rau ib tiam.

75 Thiab cia nws tsa nws lub suab kom ntev thiab nrov, nyob hauv cov neeg, mus thov pub rau cov pluag thiab cov txom nyem; thiab cia nws tsis txhob tso tseg, thiab cia nws lub siab tsis txhob poob; thiab kuv yuav txais yuav nws tej kev tiam, vim tej ntawd yuav tsis zoo li Kayees tej kev tiam rau kuv, vim nws yuav yog kuv li, tus Tswv hais li.

76 Cia nws tsev neeg xyiv fab thiab tig lawv lub siab ntawm txoj kev txom nyem mus; vim kuv tau xaiv nws thiab pleev roj rau nws lawm, thiab yuav hwm nws nyob hauv nws tsev neeg, vim kuv yuav zam txim rau tag nrho nws tej kev txhaum, tus Tswv hais li. Amees.

77 Kuv hais tseeb rau nej tias, cia kuv tus tub qhe Hyrum muab nyiaj peev mus rau hauv lub tsev ntawd raws li nws pom zoo, rau nws tus kheej thiab rau nws tiam neeg tom qab nws, ntawm ib tiam neeg mus rau ib tiam.

78 Cia kuv tus tub qhe Isaac Galland muab nyiaj peev mus rau hauv lub tsev ntawd; vim kuv, tus uas yog tus Tswv, hlub nws vim txoj hauj lwm nws tau ua tiav, thiab yuav zam txim rau tag nrho nws tej kev txhaum; yog li ntawd, cia li nco ntsoov nws rau ib phuv nyob hauv lub tsev ntawd ntawm ib tiam neeg mus rau ib tiam.

79 Cia li hu kuv tus tub qhe Isaac Galland nyob hauv nej, thiab cia kuv tus tub qhe William Marks tsa nws, thiab foom koob hmoov rau nws, kom mus nrog kuv tus tub qhe Hyrum mus ua kom tiav rau txoj hauj lwm uas kuv tus tub qhe Joseph yuav qhia rau nkawd ua, thiab nkawd yuav tau koob hmoov heev.

80 Cia kuv tus tub qhe William Marks them nyiaj peev mus rau hauv lub tsev ntawd, raws li nws pom zoo, rau nws tus kheej thiab nws tiam neeg, ntawm ib tiam neeg mus rau ib tiam.

81 Cia kuv tus tub qhe Henry G. Sherwood them nyiaj peev mus rau lub tsev ntawd, raws li nws pom zoo, rau nws tus kheej thiab nws cov tub ki tom qab nws, ntawm ib tiam neeg mus rau ib tiam.

82 Cia kuv tus tub qhe William Law them nyiaj peev mus rau hauv lub tsev ntawd, rau nws tus kheej thiab nws cov tub ki tom qab nws, ntawm ib tiam neeg mus rau ib tiam.

83 Yog hais tias nws yuav ua raws li kuv lub siab nyiam kom nws tsis txhob coj nws tsev neeg mus rau tim tej av sab hnub tuaj, uas yog mus rau hauv Kirtland; txawm li ntawd los, kuv, tus uas yog tus Tswv, yuav txhim tsa Kirtland, tiam sis kuv, tus uas yog tus Tswv, tau npaj ib txoj kev nplawm rau cov neeg tid.

84 Thiab hais txog kuv tus tub qhe Almon Babbitt, muaj ntau yam uas ua rau kuv tsis txaus siab; saib seb, nws pheej nrhiav kev txhim tsa nws tej lus ntuas es tsis txhim tsa tej lus ntuas uas kuv tau muab, uas twb yog Pawg Thawj Tswj Hwm ntawm kuv lub Koom Txoos; thiab nws tau tsim ib tug mlom nyuj muab kub ua rau kuv cov neeg teev tiam.

85 Tus uas tuaj ntawm no muaj siab xav ua raws li kuv tej lus txib tsis txhob cia tus ntawd tawm ntawm qhov chaw no mus.

86 Yog hais tias lawv nyob ntawm no cia lawv nyob rau kuv; thiab yog hais tias lawv tuag cia lawv tuag rau kuv; vim nyob ntawm no lawv yuav so ntawm tag nrho lawv tej kev khwv, thiab yuav ua lawv tej hauj lwm mus ntxiv.

87 Yog li ntawd, cia kuv tus tub qhe William tso siab rau kuv, thiab tsum txoj kev ntshai txog nws tsev neeg, vim txoj kev mob nkeeg ntawm thaj av. Yog hais tias nej hlub kuv, cia li ua raws li kuv tej lus txib; thiab txoj kev mob nkeeg ntawm thaj av yuav tig los ua yeeb koob rau nej.

88 Cia kuv tus tub qhe William mus thiab tshaj tawm kuv txoj moo zoo uas kav ib txhis nrog ib lub suab nrov, thiab nrog kev xyiv fab heev, raws li kuv tus Ntsuj Plig yuav tshoov nws, mus rau cov neeg hauv Warsaw, thiab kuj mus rau cov neeg hauv Carthage, thiab kuj mus rau cov neeg hauv Burlington, thiab kuj mus rau cov neeg hauv Madison, thiab ua siab ntev thiab rau siab tos rau kev qhia ntxiv nyob hauv kuv lub tuam rooj sab laj, tus Tswv hais li.

89 Yog hais tias nws yuav ua raws li kuv lub siab nyiam txij no mus cia nws mloog kuv tus tub qhe Joseph tej lus ntuas, thiab muab nws tej txuj ci thiab nyiaj txiag txhawb rau cov pluag, thiab muab kuv txoj lus dawb huv uas tau muab txhais tshiab luam tawm mus rau tej neeg hauv ntiaj teb.

90 Thiab yog hais tias nws ua li no ces kuv yuav foom koob hmoov rau nws nrog ntau yam koob hmoov, kom nws yuav tsis raug tso tseg, thiab yuav tsis pom nws cov tub ki mus thov khawv mov.

91 Thiab ntxiv, kuv hais tseeb rau nej tias, cia li hu, tsa thiab pleev roj rau kuv tus tub qhe William, ua tus pab cuam rau kuv tus tub qhe Joseph, nyob rau kuv tus tub qhe Hyrum qhov chaw, kom kuv tus tub qhe Hyrum yuav tuav lub luag hauj lwm ntawm Pov Thawj Hwj thiab Yawg Suab, uas tau tsa rau nws los ntawm nws txiv, los ntawm koob hmoov thiab kuj yog los ntawm txoj cai;

92 Kom txij no mus nws yuav tuav cov yawm sij ntawm yawg suab tej koob hmoov rau saum tag nrho kuv cov neeg lub taub hau,

93 Kom tus uas nws foom koob hmoov rau ces yuav tau koob hmoov, thiab tus uas nws foom tsis zoo rau ces yuav raug foom tsis zoo; kom txhua yam uas nws muab khi ua ke nyob hauv ntiaj teb ces yuav muab khi ua ke nyob saum ntuj ceeb tsheej; thiab txhua yam uas nws muab daws nyob hauv ntiaj teb ces yuav muab daws nyob saum ntuj ceeb tsheej.

94 Thiab txij lub sij hawm no mus kuv tsa nws kom nws yuav ua ib tug yaj saub, thiab ib tug pom tau, thiab ib tug txais kev tshwm sim rau kuv lub koom txoos, ib yam li kuv tus tub qhe Joseph;

95 Kom nws yuav coj kom haum xeeb nrog rau kuv tus tub qhe Joseph; thiab kom nws yuav tau txais tej lus ntuas los ntawm kuv tus tub qhe Joseph, tus uas yuav qhia rau nws txog tej yawm sij uas nws yuav siv kom thov thiab txais tau, thiab tau tib txoj koob hmoov ntawd, thiab yeeb koob, thiab sam xeeb, thiab pov thawj hwj, thiab tej txiaj ntsim ntawm lub pov thawj hwj ntoo, uas muaj ib zaug tau muab rau tus uas yog kuv tus tub qhe tas los Oliver Cowdery;

96 Kom kuv tus tub qhe Hyrum yuav ua pov thawj rau tej yam uas kuv yuav muab qhia rau nws, kom yuav nco ntsoov txog nws lub npe ntawm ib tiam neeg mus rau ib tiam, mus ib txhiab thiab ib txhis.

97 Thiab cia kuv tus tub qhe William Law txais cov yawm sij kom nws thiaj yuav thov tau thiab txais tau tej koob hmoov; cia nws txo hwj chim rau kuv, thiab tsis txhob muaj kev dag ntxias, ces nws yuav tau txais kuv tus Ntsuj Plig, uas twb yog tus Nplij Siab, uas yuav muab qhov tseeb ntawm txhua yam qhia rau nws, thiab yuav muab rau nws tej uas nws yuav hais thaum lub sij hawm ntawd kiag.

98 Thiab yuav muaj tej cim no nrog nws mus—nws yuav kho tej neeg mob zoo, nws yuav ntiab tej dab phem tawm, thiab yuav dim ntawm cov uas yuav muab tej tshuaj noj tuag lom nws;

99 Thiab tus Tswv yuav coj nws mus tej kev uas tus nab muaj taug yuav tom tsis tau nws lub pob luj taws, thiab nws yuav sawv mus siab nyob hauv lub zeem muag ntawm nws tej kev xav yam li caij saum tus dav ob sab tis.

100 Thiab yog hais tias kuv ho pom zoo kom nws tsa tau neeg tuag sawv rov los, cia nws tsis txhob ceev nws lub suab tseg.

101 Yog li ntawd, cia kuv tus tub qhe William hais lus kom nrov thiab txhob tseg, nrog kev xyiv fab thiab xyiv fab hlo, thiab nrog hauxanas rau tus uas zaum saum nws lub rooj theej kiab mus ib txhiab thiab ib txhis, tus Tswv nej tus Vajtswv hais li.

102 Saib seb, kuv hais rau nej tias, kuv muaj ntiag tug hauj lwm tos rawv rau kuv tus tub qhe William, thiab kuv tus tub qhe Hyrum, thiab rau nkawd nkaus xwb; thiab cia kuv tus tub qhe Joseph nyob tom tsev, vim yuav tsum muaj nws nyob ntawd. Cov tseem tshuav kuv mam qhia rau nej tom qab no mus. Twb yog li ntawd. Amees.

103 Thiab ntxiv, kuv hais tseeb rau nej tias, yog hais tias kuv tus tub qhe Sidney yuav ua hauj lwm rau kuv thiab ua tus pab cuam rau kuv tus tub qhe Joseph, cia nws sawv tsees thiab tuaj thiab ua lub luag hauj lwm uas hu nws ua, thiab txo nws lub hwj chim rau kuv.

104 Thiab yog hais tias nws yuav muab ib txoj kev tiam tsim nyog txais, thiab tej kev lees paub pub rau kuv, thiab nyob twj ywm nrog kuv cov neeg, saib seb, kuv, tus Tswv uas yog nej tus Vajtswv, yuav kho nws kom nws yuav zoo; thiab nws yuav tsa dua nws lub suab nyob saum roob, thiab ua ib tug cev lus rau kuv pom.

105 Cia nws tuaj thiab nrhiav chaw nyob rau nws tsev neeg nyob ze ib cheeb tsam uas kuv tus tub qhe Joseph nyob.

106 Thiab nyob hauv tag nrho nws tej kev mus rau ub rau no cia nws tsa nws lub suab zoo li lub suab raj hlau nrov, thiab ceeb toom cov neeg hauv ntiaj teb kom khiav txoj kev npau taws uas yuav los.

107 Cia nws pab kuv tus tub qhe Joseph, thiab cia kuv tus tub qhe William pab kuv tus tub qhe Joseph thiab, ntawm kev ua tiag mus tshaj tawm rau tej vaj ntxwv hauv lub ntiaj teb, twb ib yam li kuv tau hais rau nej ua ntej.

108 Yog hais tias kuv tus tub qhe Sidney yuav ua raws li kuv lub siab nyiam, cia nws tsis txhob coj nws tsev neeg mus rau tim tej av sab hnub tuaj, tiam sis cia nws hloov lawv qhov chaw nyob, twb ib yam li kuv tau hais.

109 Saib seb, twb tsis yog kuv lub siab nyiam uas nws yuav tsum nrhiav kev nyab xeeb thiab chaw nkaum tawm hauv lub nroog uas kuv tau muab rau koj, uas twb yog lub nroog Nauvoo.

110 Kuv hais tseeb rau nej tias, tam sim no kiag, yog hais tias nws mloog kuv lub suab, ces yuav zoo rau nws. Twb yog li ntawd. Amees.

111 Thiab ntxiv, kuv hais tseeb rau nej tias, cia kuv tus tub qhe Amos Davies them nyiaj peev mus rau cov uas kuv tau tsa txhais tes coj mus txhim tsa ib lub tsev rau neeg tuaj so, uas yog lub Tsev Nauvoo.

112 Cia nws ua li no yog hais tias nws xav tau ib phuv tswv, thiab kom nws mloog kuv tus tub qhe Joseph tej lus ntuas, thiab ua hauj lwm nrog nws tus kheej ob txhais tes kom nws yuav tau txoj kev ntseeg siab ntawm tej neeg.

113 Thiab thaum nws ua pov thawj tias nws rau siab ntseeg ua txhua yam uas yuav muab tso rau nws saib xyuas, muaj tseeb tiag, uas twb yog ob peb yam, ces yuav muab nws tsa los kav ntau yam;

114 Yog li ntawd cia nws txo nws tus kheej kom qis thiaj li yuav muab nws tsa kom siab. Twb yog li ntawd. Amees.

115 Thiab ntxiv, kuv hais tseeb rau nej tias, yog hais tias kuv tus tub qhe Robert D. Foster yuav mloog kuv lub suab, cia nws ua ib lub tsev rau kuv tus tub qhe Joseph, raws li txoj kev sib yeem lus uas Joseph tau yeem nrog nws lawm, ib yam li tej lub sij hawm lub qhov rooj yuav qhib rau nws.

116 Thiab cia nws hloov siab lees txim ntawm tag nrho nws tej kev ruam, thiab muab nws tus kheej coj txoj kev siab hlub; thiab tsum txoj kev ua phem, thiab tso tag nrho nws tej lus nchav tseg;

117 Thiab them nyiaj mus rau hauv pawg neeg ua lub Tsev Nauvoo txhais tes, rau nws tus kheej thiab rau nws tiam neeg tom qab nws, ntawm ib tiam neeg mus rau ib tiam;

118 Thiab mloog tej lus ntuas ntawm kuv cov tub qhe Joseph, thiab Hyrum, thiab William Law, thiab rau cov thawj coj uas kuv tau hu los mus teeb lub hauv paus ntawm Xi-oos; thiab yuav zoo rau nws mus ib txhiab thiab ib txhis. Twb yog li ntawd. Amees.

119 Thiab ntxiv, kuv hais tseeb rau nej tias, tsis txhob cia ib tug neeg them nyiaj rau pawg neeg ua lub Tsev Nauvoo yog hais tias nws tsis ntseeg Phau Ntawv Maumoos, thiab tej kev tshwm sim kuv tau muab los rau nej, tus Tswv nej tus Vajtswv hais li;

120 Vim qhov uas tshaj dua los yog tsawg dua ces yog los ntawm kev phem los, thiab yuav txais kev foom tsis zoo thiab tsis txais tej koob hmoov, tus Tswv nej tus Vajtswv hais li. Twb yog li ntawd. Amees.

121 Thiab ntxiv, kuv hais tseeb rau nej tias, cia pawg neeg ua lub Tsev Nauvoo tau nyiaj them ua hauj lwm kom ncaj rau tag nrho lawv tej hauj lwm uas lawv ua ntawm kev txhim tsa lub Tsev Nauvoo; thiab cia lawv tej nyiaj yog raws li sib pom zoo los ntawm lawv tus kheej, raws li tus nqi ntawd.

122 Thiab cia txhua tus neeg uas them nyiaj yuav phuv them nws feem ntawm cov ua hauj lwm tej nyiaj nqi zog, yog hais tias yeej yuav tsum ua li ntawd, los txhawb lawv, tus Tswv hais li; yog tsis li ces, yuav muab lawv tej hauj lwm suav los them rau lawv phuv ua tswv nyob hauv lub tsev ntawd. Twb yog li ntawd. Amees.

123 Kuv hais tseeb rau nej tias, nim no kuv muab cov thawj coj uas zwm rau kuv lub Pov Thawj Hwj rau nej, kom nej yuav tuav cov yawm sij ntawd, uas twb yog lub Pov Thawj Hwj raws li Mekhixedes tus txheej txheem, uas yog raws li tus txheej txheem ntawm kuv Tib Leeg Tub.

124 Thib ib, kuv muab Hyrum Smith rau nej los ua ib tug yawg suab rau nej, los tuav tej koob hmoov sib khi ntawm kuv lub koom txoos, uas twb yog tus Ntsuj Plig Dawb Huv ntawm kev cog lus, tus Tswv thiaj muab nej khi rau hnub uas txhiv dim, kom nej tsis txhob poob txawm hais tias yuav muaj lub caij dag ntxias los raug nej.

125 Kuv muab kuv tus tub qhe Joseph los ua ib tug thawj tswj txwj laug saib tag nrho kuv lub koom txoos rau nej, los ua ib tug txhais lus, ib tug txais kev tshwm sim, ib tug pom tau, thiab ib tug yaj saub.

126 Kuv muab kuv tus tub qhe Sidney Rigdon thiab kuv tus tub qhe William Law ua ob tug pab cuam rau nws, kom peb tug no yuav ua tau ib pawg thiab Thawj Pawg Thawj Tswj Hwm, los txais tej kev tshwm sim rau tag nrho lub koom txoos.

127 Kuv muab kuv tus tub qhe Brigham Young rau nej los ua ib tug thawj tswj hwm saib xyuas Kaum Ob tug Thwj Tim uas ncig mus ua hauj lwm;

128 Kaum Ob tug uas tuav cov yawm sij qhib txoj cai ntawm kuv lub nceeg vaj mus rau plaub ceg kaum ntuj, thiab tom qab ntawd yuav xa kuv txoj lus mus rau txhua tus neeg.

129 Lawv yog Heber C. Kimball, Parley P. Pratt, Orson Pratt, Orson Hyde, William Smith, John Taylor, John E. Page, Wilford Woodruff, Willard Richards, George A. Smith;

130 Kuv tau coj David Patten los rau kuv tus kheej lawm; saib seb, nws lub pov thawj hwj tsis muaj neeg tshem tau ntawm nws mus; tiam sis, kuv hais tseeb rau nej tias, muab dua ib tug tsa los rau tib txoj kev hu ntawd los tau.

131 Thiab ntxiv, kuv hais rau nej tias, kuv muab pawg sab laj hlob rau nej, los ua tus ncej zeb tag ntawm Xi-oos—

132 Lawv lub npe yog, Samuel Bent, Henry G. Sherwood, George W. Harris, Charles C. Rich, Thomas Grover, Newel Knight, David Dort, Dunbar Wilson—kuv tau coj Seymour Brunson mus rau kuv tus kheej lawm; tsis muaj neeg tshem tau nws lub pov thawj hwj mus, tiam sis muab dua ib tug tsa los rau tib lub pov thawj hwj ntawd los nyob nws chaw los tau; thiab kuv hais tseeb rau nej tias, cia li muab kuv tus tub qhe Aaron Johnson tsa los rau txoj kev hu no nyob nws chaw—David Fullmer, Alpheus Cutler, William Huntington.

133 Thiab ntxiv, kuv muab Don C. Smith rau nej los ua ib tug thawj tswj hwm saib xyuas ib pawg pov thawj hlob;

134 Txoj kab ke uas tsa rau lub hom phiaj ntawm kev pom zoo txais cov uas tus Tswv muab tsa los ua cov thawj tswj hwm los yog cov tub qhe saib xyuas tej ceg txheem ntseeg txawv uas nyob rau ub rau no.

135 Thiab lawv kuj ncig tau mus ua hauj lwm thiab yog hais tias lawv xav mus, tiam sis tus Tswv muab lawv tsa mus ua cov thawj tswj hwm nyob mus li; nov yog lub luag hauj lwm ntawm qhov uas Vajtswv hu lawv ua, tus Tswv nej tus Vajtswv hais li.

136 Kuv muab Amasa Lyman thiab Noah Packard ua ob tug pab cuam rau nws, kom lawv yuav tswj hwm pawg pov thawj hlob ntawm kuv lub koom txoos, tus Tswv hais li.

137 Thiab ntxiv, kuv hais rau nej tias, kuv muab John A. Hicks, Samuel Williams, thiab Jesse Baker rau nej, lawv lub pov thawj hwj yog los tswj hwm pawg txwj laug, pawg uas tsim los ua cov xib hwb nyob mus li; txawm li ntawd los lawv ncig tau mus ua hauj lwm, tiam sis tus Tswv muab lawv tsa los ua cov xib hwb nyob mus li rau kuv lub koom txoos, tus Tswv hais li.

138 Thiab ntxiv, kuv muab Joseph Young, Josiah Butterfield, Daniel Miles, Henry Herriman, Zera Pulsipher, Levi Hancock, James Foster rau nej, los mus tswj hwm pawg xya caum;

139 Pawg uas tsim los rau cov txwj laug uas ncig mus ua hauj lwm mus ua pov thawj txog kuv lub npe nyob thoob ntiaj teb, txhua qhov chaw uas pawg sab laj hlob, uas ncig mus ua hauj lwm, uas yog kuv cov thwj tim, yuav xa lawv mus npaj ib txoj kev rau kuv.

140 Qhov sib txawv ntawm pawg no thiab pawg txwj laug ces yog qhov uas ib pawg yuav tsum ncig mus ua hauj lwm tsis tu ncua, thiab ib pawg yuav tsum tswj hwm tej pawg ntseeg tej lub sij hawm; ib pawg muaj kev lav ris tswj hwm tej lub sij hawm, thiab ib pawg tsis muaj kev lav ris tswj hwm, tus Tswv nej tus Vajtswv hais li.

141 Thiab ntxiv, kuv hais rau nej tias, kuv muab Vinson Knight, Samuel H. Smith, thiab Shadrach Roundy rau nej, yog hais tias nws yuav txais txoj hauj lwm no, los tswj hwm pawg npisov; ib txoj kev paub txog pawg npisov uas tau hais no twb muab rau nej nyob hauv phau Lus Qhuab Qhia thiab Kev Khi Lus.

142 Thiab ntxiv, kuv hais rau nej, Samuel Rolfe thiab nws ob tug pab cuam rau cov pov thawj, thiab tus thawj tswj hwm ntawm cov xib hwb thiab nws ob tug pab cuam, thiab tus thawj tswj hwm ntawm cov diskas thiab nws ob tug pab cuam thiab, thiab tus thawj tswj hwm ntawm ceg txheem ntseeg thiab nws ob tug pab cuam thiab.

143 Tej luag hauj lwm hais los saum toj no kuv tau muab rau nej, thiab tej yawm sij ntawd, rau tej kev pab thiab tej kev tswj kev kav, rau txoj hauj lwm qhuab qhia thiab ua kom kuv haiv neeg ntseeg zoo tag nrho.

144 Thiab kuv muab ib lo lus txib rau nej tias, nej yuav tsum muaj kom txhij rau tag nrho tej lub luag hauj lwm no thiab pom zoo rau tej lub npe uas kuv tau hais los no, los sis yog tsis li no ces tsis pom zoo rau lawv nyob hauv kuv lub tuam rooj sab laj;

145 Thiab hais tias nej yuav tsum npaj tej chav rau tag nrho tej luag hauj lwm no nyob hauv kuv lub tsev thaum nej txhim tsa lub tsev no rau kuv lub npe, tus Tswv nej tus Vajtswv hais li. Twb yog li ntawd. Amees.