Tshooj 113
Tej lus teb rau ib co lus nug txog cov lus Yaxayas sau, muab los ntawm tus Yaj Saub Joseph Smith, nyob ntawm los sis nyob ze Far West, Missouri, lub Peb Hlis Ntuj xyoo 1838.
1–6, Qhia tias tus Ceg Hlav ntawm Yexais, tus kav los ntawm tus ceg hlav ntawd, thiab Yexais tus cag yog leej twg; 7–10, Xi-oos cov seem tshuav uas tawg khiav ri niab muaj cai tau lub pov thawj hwj thiab Yaxayas hu kom lawv rov qab mus cuag tus Tswv.
1 Leej twg yog tus Ceg Hlav ntawm Yexais uas hais txog nyob hauv nqe 1, 2, 3, 4, thiab 5 ntawm Yaxayas tshooj 11?
2 Tus Tswv hais tseeb li no: Nws yog Khetos.
3 Tus kav uas hais txog nyob hauv thawj nqe ntawm Yaxayas tshooj 11, uas yuav los ntawm tus Ceg Hlav ntawm Yexais los yog dab tsi?
4 Saib seb, tus Tswv hais li no: Yog ib tug tub qhe nyob hauv Khetos txhais tes, tus uas muaj ib feem yog xeeb ntxwv los ntawm Yexais thiab kuj yog los ntawm Efala-is los, los yog los ntawm Yauxej tsev neeg los, tus uas tus Tswv muab hwj chim ntau rau nws.
5 Tus cag los ntawm Yexais uas hais txog nyob hauv nqe 10 ntawm tshooj 11 yog dab tsi?
6 Saib seb, tus Tswv hais li no, yog Yexais ib tug xeeb ntxwv, thiab kuj yog los ntawm Yauxej los, tus muaj cai tau lub pov thawj hwj, thiab cov yawm sij ntawm lub nceeg vaj, los ua ib tug chij, thiab rau txoj kev muab kuv cov neeg sau los ua ke nyob hauv hnub nyoog kawg.
7 Cov lus nug los ntawm Elias Higbee: Lo lus txib hauv Yaxayas, tshooj 52, thawj nqe, txhais li cas uas hais tias: Muab koj lub zog los coj, auj Xi-oos—thiab Yaxayas hais txog cov neeg twg?
8 Nws hais txog cov uas Vajtswv yuav hu hauv hnub nyoog kawg, cov uas yuav tuav lub hwj chim pov thawj hwj los txhim tsa Xi-oos dua, thiab txoj kev txhiv Ixayees dim; thiab qhov hais kom muab nws lub zog los coj yog kom muaj lub hwj chim ntawm lub pov thawj hwj, uas Xi-oos muaj cai tau los ntawm caj ceg; thiab kuj kom rov qab tig mus rau lub hwj chim uas nws tau ua poob lawm.
9 Peb yuav tsum to taub dab tsi txog qhov uas Xi-oos daws nws tus kheej tawm ntawm tej saw hlau khi nws caj dab; ntawm nqe 2?
10 Peb yuav tsum to taub hais tias cov neeg seem tshuav uas tawg khiav ri niab raug ntuas kom tig ntawm qhov chaw lawv tau poob rov qab los cuag tus Tswv; uas yog hais tias lawv ua li ntawd, ces tus Tswv txoj lus cog tseg hais tias nws yuav hais lus rau lawv, los yog muab kev tshwm sim rau lawv. Xyuas nqe 6, 7, thiab 8. Tej saw hlau ntawm nws caj dab yog tej kev foom tsis zoo ntawm Vajtswv rau nws, los yog cov seem tshuav ntawm Ixayees thaum lawv raug tawg khiav ri niab mus rau hauv Lwm Haiv Neeg.