Tshooj 89
Kev tshwm sim uas tus Yaj Saub Joseph Smith tau txais, nyob hauv Kirtland, Ohio, lub Ob Hlis Ntuj hnub tim 27, xyoo 1833. Vim cov kwv tij thaud siv luam yeeb nyob hauv lawv tej kev sib ntsib, thiaj ua rau tus Yaj Saub los xav txog qhov ntawd, ces yog li ntawd, nws thiaj tau nug tus Tswv txog qhov ntawd. Txoj kev tshwm sim no, uas hu ua Txoj Lus Txawj Ntse, thiaj tau los.
1–9, Txwv tsis pub siv cawv txiv hmab, dej cawv, luam yeeb, thiab dej haus kub; 10–17, Zaub nroj tsuag, txiv hmab txiv ntoo, nqaij, thiab noob txhu yog muab rau neeg thiab tej tsiaj txhu siv; 18–21, Kev ua raws li txoj moo zoo tej kev cai, nrog rau Txoj Lus Txawj Ntse, yuav coj tej koob hmoov ntawm sab nqaij daim tawv thiab sab ntsuj plig los.
1 Ib Txoj Lus Txawj Ntse, rau txoj kev pab pawg sab laj uas yog pov thawj hlob, uas txoos nyob hauv Kirtland, thiab lub koom txoos, thiab kuj yog rau haiv neeg ntseeg nyob hauv Xi-oos thiab—
2 Yog xa tawm mus tos txais sawv daws; tsis yog los ntawm kev txib los yog kev txhib, tiam sis los ntawm kev tshwm sim thiab txoj lus txawj ntse, qhia loo Vajtswv tus txheej txheem thiab lub siab nyiam nyob hauv txoj kev cawm seej ntawm sab nqaij daim tawv rau tag nrho haiv neeg ntseeg hauv hnub nyoog kawg—
3 Muab ua ib lub ntsiab cai nrog kev cog lus, muab kho kom haum lub peev xwm ntawm cov qaug zog thiab cov qaug zog tshaj plaws ntawm tag nrho haiv neeg ntseeg, cov uas yog los sis hu tau tias yog haiv neeg ntseeg.
4 Saib seb, tus Tswv hais tseeb li no rau nej tias: Vim yog tej kev phem thiab tej tom txwv uas muaj thiab yuav nyob hauv tej neeg tuav hauv lub siab hauv hnub nyoog kawg, kuv tau ceeb toom nej, thiab ceeb toom nej ua ntej, los ntawm kev muab txoj lus txawj ntse los ntawm kev tshwm sim no rau nej—
5 Hais tias npaum li uas ib tug neeg haus cawv txiv hmab los yog dej cawv nyob hauv nej, saib seb qhov ntawd tsis zoo, kuj tsis zoo rau nej Leej Txiv pom, tsuas yog thaum nej mus txoos ua ke mus ua lub cim nco txog rau nws xwb.
6 Thiab, saib seb, tsim nyog siv cawv txiv hmab, muaj tseeb tiag, tseem cawv ntawm cov txiv hmab, uas nej ua nej.
7 Thiab, ntxiv, tej dej cawv tsis yog rau lub plab, tiam sis yog muab ntxuav nej lub cev.
8 Thiab ntxiv, luam yeeb tsis yog rau lub cev, thiab tsis yog rau lub plab, thiab tsis zoo rau neeg, tiam sis yog tshuaj ntsuab rau tej nqaij doog ntshav thiab rau tag nrho tej nyuj twm muaj mob, uas yuav tsum siv nrog txoj kev ua zoo xav thiab kev muaj peev xwm.
9 Thiab ntxiv, dej haus kub tsis yog rau lub cev los sis lub plab.
10 Thiab ntxiv, kuv hais tseeb rau nej tias, tag nrho tej tshuaj ntsuab zoo noj Vajtswv tau muab los txhawb lub dag lub zog, rau sab nqaij daim tawv, thiab rau neeg siv—
11 Txhua yam tshuaj ntsuab uas nyias tuaj hauv nyias lub caij, thiab txhua yam txiv hmab txiv ntoo uas nyias txi hauv nyias lub caij; tag nrho tej no yuav tsum siv nrog kev txawj ntse thiab kev ua tsaug.
12 Muaj tseeb tiag, thiab cov nqaij ntawm tej tsiaj thiab tej noog saum nruab ntug, kuv, tus uas yog tus Tswv, tau muab rau neeg siv nrog kev ua tsaug; txawm li ntawd los yuav tsum txuag siv tej ntawd;
13 Thiab ua rau kuv zoo siab hais tias tsis siv tej ntawd, tsuas yog thaum caij ntuj no xwb; los sis thaum txias txias, los yog thaum tshaib nqhis.
14 Txhua yam noob txhu yog muab rau neeg thiab tej tsiaj siv, los ua qhov txheem txoj sia, tsis yog rau neeg xwb tiam sis rau tej tsiaj nruab nrag, thiab tej noog saum nruab ntug, thiab txhua yam tsiaj qus uas mus kev los yog nkag hauv av;
15 Thiab tej no Vajtswv tau tsim rau neeg siv tsuas yog rau tej sij hawm tsis muaj noj thiab tshaib plab heev xwb.
16 Txhua yam noob txhu yeej zoo ua khoom noj rau neeg; thiab tib yam rau tej txiv hmab; tej uas txi txiv, txawm yog nyob hauv av los yog nyob saum qaum av—
17 Txawm li ntawd los, nplej rau neeg, thiab pob kws rau nyuj, thiab noob tauj rau nees, thiab noob nqeeb rau tej noog thiab tej npua, thiab rau txhua tus tsiaj nruab nrag, thiab pias rau txhua tus tsiaj uas zoo siv, thiab muab tov dej so haus, thiab siv lwm yam noob qoob noob loo zoo li no thiab.
18 Thiab tag nrho haiv neeg ntseeg uas nco ntsoov coj thiab ua raws li tej lus hais no, taug kev raws li tej lus txib, ces yuav tau txais kev noj qab nyob zoo rau hauv lawv lub ntaws thiab hlwb rau hauv lawv pob txha;
19 Thiab yuav nrhiav tau laj lim tswv yim thiab kev txawj ntse uas muaj nqis ntau, uas twb yog tej yam muaj nqis uas raug muab zais lawm;
20 Thiab thaum khiav yuav tsis nkees, thiab thaum mus kev yuav tsis qaug zog.
21 Thiab kuv, tus uas yog tus Tswv, muab txoj kev cog lus rau lawv tias, tus tim tswv ua kev puas tsuaj yuav hla dhau lawv mus, ib yam li tau hla dhau cov neeg Ixayees, thiab tsis tua lawv. Amees.