1 Kuv hais tseeb rau nej, ntsig txog nej cov kwv tij uas tau raug kev txom nyem, thiab raug tsim txom, thiab raug muab ntiab tawm ntawm thaj av uas yog lawv qub txeeg qub teg—

2 Kuv, tus uas yog tus Tswv, tau cia txoj kev txom nyem los rau lawv, tej uas tau ua rau lawv txom nyem, vim yog lawv tej kev ua txhaum;

3 Tiam sis kuv tseem yuav lawv, thiab lawv yuav yog kuv tug nyob rau hnub uas kuv yuav los xaiv kuv cov pov haum.

4 Yog li ntawd, lawv yeej yuav tsum raug qhuab ntuas thiab raug sim siab, ib yam li Anplaham, tus uas tus Tswv txib kom muab nws tib leeg tub yug txi.

5 Vim tag nrho cov uas yuav tsis nyiaj txoj kev qhuab ntuas mus, tiam sis xyeej kuv, tsis muaj peev xwm hloov ua dawb huv.

6 Saib seb, kuv hais rau nej tias, tau muaj kev tsiv tsaim, thiab kev sib cav, thiab kev sib ceg, thiab kev sib khib, thiab kev siab hlob thiab kev siab ntshaw luag tug nyob hauv lawv; yog li ntawd los ntawm tej yam no lawv tau ua rau lawv qub txeeg qub teg tsis huv.

7 Lawv qeeb hnya mloog tus Tswv lawv tus Vajtswv lub suab; yog li ntawd, tus Tswv lawv tus Vajtswv thiaj qeeb hnya mloog lawv tej lus thov Vajtswv, qeeb hnya teb lawv rau thaum hnub lawv muaj teeb meem.

8 Thaum hnub lawv muaj kev thaj yeeb lawv saib kuv tej lus ntuas yam tsis muaj nqis; tiam sis, thaum lawv muaj teeb meem, vim lawv xav tau kev pab lawv thiaj nrhiav kuv.

9 Kuv hais tseeb rau nej tias, txawm yog lawv muaj kev txhaum los, kuv lub siab muaj kev khuv leej puv npo rau lawv. Kuv yuav tsis muab lawv pov tseg tag nrho, thiab nyob rau hnub npau taws kuv yuav nco ntsoov txoj kev hlub tshua.

10 Kuv tau cog lus, thiab lo lus tshaj tawm tau tawm mus los ntawm ib lo lus txib ua ntej uas kuv tau muab los rau nej, hais tias kuv yuav viag rab ntaj ntawm kuv txoj kev npau taws kom pab kuv cov neeg; thiab ib yam li kuv tau hais, yeej yuav muaj li ntawd.

11 Tsis ntev ces kuv txoj kev npau taws twb yuav raug muab nchuav tawm nplua mias los rau txhua haiv neeg; thiab qhov no kuv yeej yuav ua thaum lub khob ntawm lawv tej kev ua phem puv.

12 Thiab nyob rau hnub ntawd tag nrho cov uas nyob saum tus pej thuam saib xyuas, los yog hais tias, tag nrho kuv cov neeg Ixayees, tus Tswv yuav cawm lawv dim.

13 Thiab tus Tswv yuav muab cov uas tau tawg khiav ri niab sau los ua ke.

14 Thiab tus Tswv yuav nplij tag nrho cov uas tau quaj ntsuag lub siab.

15 Thiab tag nrho cov uas tau muab lawv txoj sia pub rau kuv lub npe yuav tau meej mom ntoo.

16 Yog li ntawd, nej cia li txais kev nplij siab txog Xi-oos; vim txhua tus tib neeg twb nyob hauv kuv txhais tes; cia li ua siab tus thiab paub hais tias kuv yog Vajtswv.

17 Xi-oos yuav tsis raug muab tshem tawm ntawm nws qhov chaw mus, txawm yog nws cov me nyuam twb tawg khiav ri niab.

18 Cov uas tshuav, thiab muaj lub siab dawb, yuav rov qab los, thiab los rau lawv qub txeeg qub teg, lawv thiab lawv cov me nyuam, hu nkauj xyiv fab kav ib txhis, los mus txhim tsa tej chaw puas tsuaj puas ntsoog ntawm Xi-oos—

19 Thiab tag nrho tej no xwv kom yuav muaj raws li cov yaj saub hais.

20 Thiab saib seb, twb tsis tau muab lwm qhov chaw tsuas yog qhov uas kuv tau muab lawm xwb; thiab yeej yuav tsis muab lwm qhov chaw tsuas yog qhov chaw uas kuv tau muab lawm xwb, rau txoj hauj lwm muab kuv haiv neeg ntseeg sau los ua ke—

21 Kom txog hnub uas tsis muaj chaw txaus rau lawv lawm tso; ces thaum ntawd kuv muaj lwm tej chaw uas kuv yuav muab rau lawv, thiab tej chaw ntawd yuav hu ua tej ceg txheem ntseeg, los ua tej daim ntaub los yog lub zog rau Xi-oos.

22 Saib seb, yog kuv lub siab nyiam hais tias, tag nrho cov uas hu txog kuv lub npe, thiab teev tiam kuv raws li kuv txoj moo zoo uas kav ib txhis, yuav tsum sib sau los ua ke, thiab sawv hauv tej chaw dawb huv;

23 Thiab npaj rau txoj kev tshwm sim uas yuav los, thaum daim ntaub thaiv npog kuv lub tuam tsev, hauv kuv chaw nyob, uas thaiv lub ntiaj teb, yuav raug muab tshem hlo, thiab txhua tus tib neeg yuav ua ke pom kuv.

24 Thiab txhua yam uas txawj liam, ntawm tib neeg, los yog ntawm tej tsiaj nruab nrag, los yog tej noog saum nruab ntug, los yog tej ntses hauv dej hiav txwv huv tib si, uas nyob tag nrho rau hauv lub ntiaj teb, yuav raug muab hlawv;

25 Thiab tej uas nyob hauv yuav yaj los ntawm tej kua leej faj kub; thiab txhua yam yuav hloov los ua tshiab, kom kuv txoj kev txawj ntse thiab yeeb koob yuav nyob thoob plaws lub ntiaj teb.

26 Thiab hnub ntawd txoj kev ntxub ntxaug ntawm tib neeg, thiab txoj kev ntxub ntxaug ntawm cov tsiaj, muaj tseeb tiag, txoj kev ntxub ntxaug ntawm txhua tus uas muaj cev nqaij, yuav tsis muaj ntxiv rau kuv pom.

27 Thiab hnub ntawd yog leej twg yuav thov yam dab tsi, yeej yuav muab yam ntawd rau nws.

28 Thiab hnub ntawd Dab Ntxwg Nyoog yuav tsis muaj hwj chim ntxias ib tug neeg twg.

29 Thiab yuav tsis muaj kev tu siab vim tsis muaj kev tuag.

30 Hnub ntawd tus mos liab yuav tsis tuag kom txog thaum nws laus tso; thiab nws txoj sia yuav ntev li hnub nyoog ntawm ib tsob ntoo;

31 Thiab thaum nws tuag nws yuav tsis tsaug zog, qhov ntawd yog hais tias pw hauv av, tiam sis tib ntsais muag xwb nws yuav hloov hlo, thiab tus Tswv yuav coj nws mus saum ntuj, thiab nws txoj kev so yuav muaj yeeb koob.

32 Muaj tseeb tiag, kuv hais tseeb rau nej tias, nyob rau hnub ntawd thaum tus Tswv los, nws yuav muab txhua yam ua tshwm sim los—

33 Tej yam uas twb dhau lawm, thiab tej yam nraim nroos uas tsis tau muaj neeg paub, tej yam ntawm lub ntiaj teb, saib tau tsim lub ntiaj teb li cas, thiab lub hom phiaj thiab qhov kawg ntawd—

34 Tej yam muaj nqis heev, tej yam uas nyob sab saud, thiab tej yam uas nyob sab haud, tej yam uas nyob hauv lub ntiaj teb, thiab nyob saum lub ntiaj teb, thiab nyob saum ntuj.

35 Thiab tag nrho cov uas raug tsim txom rau kuv lub npe, thiab nyiaj mus nrog txoj kev ntseeg, txawm hais tias yuav hu lawv los muab lawv txoj sia tuag rau kuv los lawv tseem yuav tau txais tag nrho lub yeeb koob no.

36 Yog li ntawd, tsis txhob ntshai txawm yog kom txog thaum tuag; vim nyob hauv lub neej no nej txoj kev xyiv fab tsis puv npo, tiam sis nrog kuv nej txoj kev xyiv fab twb puv npo.

37 Yog li ntawd, tsis txhob txhawj txog nej lub cev, thiab txoj sia ntawm lub cev; tiam sis txhawj txog tus ntsuj plig, thiab txoj sia ntawm tus ntsuj plig.

38 Thiab nrhiav tus Tswv lub ntsej muag tas mus li, xwv kom los ntawm kev ua siab ntev nej thiaj yuav ceev tau nej tus ntsuj plig, thiab nej yuav tau txoj sia nyob mus ib txhis.

39 Thaum kuv hu neeg los rau kuv txoj moo zoo uas kav ib txhis, thiab khi lus nrog ib txoj kev khi lus uas kav ib txhis, yuav muab lawv suav yam li cov ntsev ntawm lub ntiaj teb thiab txoj kev qab siab rau neeg;

40 Tus Tswv hu lawv los ua txoj kev qab siab rau neeg; yog li ntawd, yog hais tias qhov ntsev ntawm lub ntiaj teb ntawd tsuag lawm, saib seb, txij ntawd mus cov ntsev tsis zoo rau dab tsi lawm tsuas yog muab pov tseg thiab muab tsuj rau hauv neeg qab xib taws xwb.

41 Saib seb, qhov no yog lub tswv yim ntsig txog cov me nyuam ntawm Xi-oos, uas twb coob heev, tiam sis tsis yog tag nrho; tus Tswv pom tias lawv yog tej neeg ua txhaum, yog li ntawd lawv yeej yuav tsum raug qhuab ntuas—

42 Tus uas tsa nws tus kheej kom siab yuav raug muab txo kom qis, thiab tus uas txo nws tus kheej kom qis ces yuav muab tus ntawd tsa kom siab.

43 Thiab nim no, kuv yuav muab ib zaj lus piv txwv los qhia rau nej, kom nej yuav paub kuv lub siab nyiam ntsig txog txoj kev txhiv Xi-oos dim.

44 Muaj ib tug nom muaj ib thaj teb, zoo heev; thiab nws hais rau nws cov tub qhe hais tias: Nej cia li mus lawm nram kuv lub vaj txiv ntoo roj, uas nyob hauv thaj av zoo heev no, thiab cog kaum ob tsob ntoo txiv roj;

45 Thiab tso tej neeg zov nyas puag ncig, thiab tsa ib tug pej thuam, kom ib tug yuav ntsia pom ib puag ncig thaj av, ua tus neeg zov nyas nyob saum tus pej thuam, xwv kom kuv cov ntoo txiv roj yuav tsis lov thaum cov yeeb ncuab tuaj nyiag thiab nqa tej txiv ntoo ntawm kuv lub vaj txiv ntoo roj mus.

46 Nim no, cov tub qhe ntawm tus tswv teb tau mus thiab ua raws li lawv tus tswv txib lawv, thiab cog cov ntoo txiv roj, thiab ua ib tug laj kab thaiv puag ncig, thiab tso neeg zov nyas, thiab pib tsa ib tug pej thuam.

47 Ces thaum lawv tseem tab tom txhos lub hauv paus ntawd, lawv pib hais rau lawv tus kheej hais tias: Es kuv tus tswv xav tau tus pej thuam no ua dab tsi?

48 Thiab tau sib tham ntev loo, hais rau lawv tus kheej hais tias: Kuv tus tswv xav tau tus pej thuam no ua dab tsi, twb pom tias nim no yog lub sij hawm thaj yeeb?

49 Ua cas ho tsis coj qhov nyiaj no mus tso hauv txhab nyiaj? Vim twb tsis tas muaj tej yam no.

50 Ces thaum lawv ib tug hais tsis haum ib tug lawv hloov los ua tub nkeeg heev, thiab lawv tsis mloog lawv tus tswv tej lus txib.

51 Ces hmo ntuj cov yeeb ncuab txawm tuaj, thiab muab tus laj kab ua puas tas; thiab cov tub qhe ntawm tus tswv teb tau sawv los thiab ntshai, thiab txawm khiav lawm; ces cov yeeb ncuab muab tej uas lawv ua ua puas tsuaj tas, thiab muab cov ntoo txiv roj lov.

52 Nim no, saib seb, tus nom, tus tswv ntawm lub vaj txiv ntoo roj, txawm hu nws cov tub qhe los, thiab hais rau lawv tias, Vim li cas! qhov uas ua muaj txoj kev phem loj no yog dab tsi?

53 Puas tsim nyog kom nej ua raws li kuv txib nej ua, thiab—tom qab nej tau cog rau hauv lub vaj txiv ntoo roj, thiab ua laj kab thaiv ncig, thiab tso cov neeg zov nyas rau saum tej ntsa ntawd—thiab tsa tus pej thuam, thiab tso cov neeg zov nyas rau saum tus pej thuam, thiab zov kuv lub vaj txiv ntoo roj, thiab txhob tsaug zog, tsam tus yeeb ncuab tuaj tawm tsam nej?

54 Thiab saib seb, tus neeg zov nyas nyob saum tus pej thuam kuj yuav pom tus yeeb ncuab thaum nws tseem nyob deb, ces thaum ntawd nej kuj yuav npaj tau txhij tos thiab thaiv tsis pub cov yeeb ncuab muab tus laj kab ua puas tas, thiab cawm tau kuv lub vaj txiv ntoo roj tawm ntawm tus uas ua kev puas tsuaj txhais tes.

55 Thiab tus tswv ntawm lub vaj txiv ntoo roj hais rau ib tug ntawm nws cov tub qhe hais tias: Mus thiab sau kuv cov tub qhe uas seem tshuav los ua ke, thiab coj tag nrho kuv tsev neeg tej tub dag tub zog, uas yog kuv cov tub rog, kuv cov tub hluas, thiab cov laus ib nrab xyoo nyob hauv tag nrho kuv cov tub qhe thiab, cov uas yog kuv tsev neeg tej tub dag tub zog, tsuas yog cov uas kuv tau txib kom nyob xwb;

56 Thiab nej cia li ncaj nraim mus rau thaj teb ntawm kuv lub vaj txiv ntoo roj, thiab mus txhiv kuv lub vaj txiv ntoo roj; vim yog kuv lub; kuv tau muab nyiaj mus muas kuv lub vaj txiv ntoo roj.

57 Yog li ntawd, nej cia li ncaj nraim lawm tom kuv thaj teb; muab tej ntsa laj kab ntawm kuv cov yeeb ncuab ua kom puas tag; muab lawv tus pej thuam ua kom vau, thiab ua kom lawv tej neeg zov nyas tawg khiav ri niab.

58 Thiab npaum li uas lawv sib sau ua ke los tawm tsam nej, cia li ua pauj kuv cov yeeb ncuab rau kuv, kom tsis ntev no kuv yuav tau los nrog cov seem tshuav ntawm kuv tsev neeg thiab tau thaj teb.

59 Ces tus tub qhe hais rau nws tus tswv tias: Thaum twg mam muaj tej no?

60 Ces nws hais rau nws tus tub qhe tias: Thaum kuv pom zoo; koj cia li ncaj nraim mus, thiab ua txhua tsav txhua yam uas kuv tau txib koj;

61 Thiab qhov no yuav yog kuv lub cim thiab koob hmoov rau koj—ib tug saib xyuas rau siab thiab txawj ntse nyob hauv kuv tsev neeg, ib tug tswv kav nyob hauv kuv lub nceeg vaj.

62 Ces nws tus tub qhe txawm ncaj nraim mus lawm, thiab ua txhua tsav txhua yam uas nws tus tswv txib nws; thiab tom qab ntau hnub tau ua txhua yam tiav.

63 Ntxiv, kuv hais tseeb rau nej tias, kuv yuav muab kuv lub tswv yim qhia rau nej ntsig txog tag nrho tej pawg ntseeg, npaum li uas lawv yuav txaus siab cia tus Tswv coj lawv ua ib txoj kev yog thiab ncaj rau lawv txoj kev cawm seej—

64 Kom txoj hauj lwm muab kuv haiv neeg ntseeg sau los ua ke yuav mus ntxiv, kom kuv yuav tsa lawv sawv rau kuv lub npe rau tej chaw dawb huv; vim lub caij sau qoob loo twb los txog lawm, thiab yeej yuav tsum muaj raws li kuv txoj lus.

65 Yog li ntawd, kuv yuav tsum sau kuv cov neeg los ua ke, raws li zaj lus piv txwv ntawm cov nplej thiab cov txhauv, kom yuav muab cov nplej khaws cia rau hauv txhab thiaj tau txoj sia nyob mus ib txhis, thiab tau yeeb koob xilethi-aus ntoo, thaum kuv los rau hauv kuv Txiv lub nceeg vaj los muab nqi zog rau txhua tus neeg raws li tej yam uas nws tau ua;

66 Hos yuav muab cov txhauv khi ua tej twb teg, thiab tej hlua khi mas ruaj heev, kom yuav muab cov txhauv hlawv hauv cov hluav taws uas tsis txawj tuag.

67 Yog li ntawd, kuv muab ib lo lus txib rau tag nrho tej pawg ntseeg, kom lawv yuav tsum sib sau los ua ke mus ntxiv rau hauv tej chaw uas kuv tau teem tseg lawm.

68 Txawm li ntawd los, ib yam li kuv tau hais rau nej nyob hauv ib lo lus txib ua ntej tias, tsis txhob maj maj thaum nej sib sau ua ke, los yog ua nrawm nroos; tiam sis nej cia li npaj txhua yam ua ntej tso.

69 Thiab yuav kom nej npaj tau txhua yam, ua tib zoo coj lo lus txib uas kuv tau muab ntsig txog tej yam no—

70 Uas hais tias, los sis qhia kom, muab nyiaj mus muas tag nrho tej av, uas muab nyiaj mus muas tau, nyob hauv tej thaj tsam ib puag ncig thaj av uas kuv tau teem tseg ua thaj av Xi-oos, rau txoj kev pib muab kuv haiv neeg ntseeg sau los ua ke;

71 Tag nrho tej av uas muaj peev xwm muas tau nyob hauv Jackson ciaj ciam av, thiab tej ciaj ciam av nyob ib puag ncig, thiab tseg tej seem tshuav rau hauv kuv txhais tes.

72 Nim no, kuv hais tseeb rau nej tias, kom tag nrho tej pawg ntseeg muab tag nrho lawv cov nyiaj sau tuaj ua ke; kom ua tej yam no thaum txog lub sij hawm ua tej no, tiam sis txhob ua maj maj; thiab ua tib zoo xyuas kom nej yuav npaj tau txhua yam ua ntej tso.

73 Thiab kom tsa cov neeg tsim txiaj, uas twb yog neeg uas muaj tswv yim, thiab xa lawv mus muas tej av no.

74 Thiab tej pawg ntseeg nyob sab teb chaws hnub tuaj, thaum txhim tsa lawv, yog hais tias lawv mloog lo lus ntuas no ces lawv muas tau tej av thiab sib sau ua ke mus nyob rau haud; thiab yog ua li no lawv yuav tsa tau Xi-oos.

75 Nim no twb tau tseg khoom muaj txaus siv lawm, muaj tseeb tiag, twb muaj ntau heev li, kom txhiv tau Xi-oos dim, thiab tsa nws tej chaw puas tsuaj puas ntsoog, yuav tsis raug ua kom vau ntxiv lawm, yog hais tias tej pawg ntseeg, uas hu lawv tus kheej raws kuv lub npe, txaus siab mloog kuv lub suab.

76 Thiab kuv hais ntxiv rau nej tias, cov uas lawv cov yeeb ncuab ua rau lawv tawg khiav ri niab, yog kuv lub siab nyiam uas lawv yuav tsum taij thov mus ntxiv kom muab khoom them pauj tej kev raug mob uas tsis ncaj ncees, thiab kev txum tim kom zoo li qub, los ntawm cov uas tau tsa ua cov tswv kav thiab muaj hwj chim rau nej—

77 Raws li tej kev cai thiab txhooj lij choj ntawm cov neeg, uas kuv tau cia kom tsa, thiab yuav tsum txhawb nqa rau tej cai thiab kev pov hwm ntawm txhua tus tib neeg, raws li tej ntsiab cai ncaj ncees thiab dawb huv;

78 Kom txhua tus neeg yuav coj raws tej lus qhuab qhia thiab ntsiab cai thaum yav tom ntej, raws li txoj kev ywj siab xaiv uas kuv tau muab rau nws, kom txhua tus neeg yuav lav ris nws tus kheej tej kev txhaum nyob rau hnub txiav txim.

79 Yog li ntawd, qhov uas ib tug neeg yuav ua cev qhev rau lwm tus tsis yog kev ncaj ncees.

80 Thiab yog rau lub hom phiaj no kuv thiaj tau tsa tus Txhooj Lij Choj ntawm lub teb chaws no, los ntawm cov neeg muaj tswv yim uas kuv tsa sawv los rau lub hom phiaj no txhais tes los, thiab txhiv thaj av los ntawm kev ua nqaij ntuag ntshav nrog.

81 Nim no, kuv yuav muab cov me nyuam ntawm Xi-oos piv rau dab tsi? Kuv yuav muab lawv piv rau zaj lus piv txwv ntawm tus poj niam thiab tus txiav txim tsis ncaj ncees, vim neeg yuav tsum tau thov Vajtswv tas mus li thiab tsis txhob nkees, uas hais li no—

82 Nyob hauv ib lub nroog tau muaj ib tug txiav txim uas tsis hwm Vajtswv, thiab saib tsis taus neeg li.

83 Thiab muaj ib tug poj ntsuam nyob hauv lub nroog ntawd, thiab nws tuaj cuag tus txiav txim thiab hais tias: Thov ua pauj kuv tus yeeb ncuab rau kuv.

84 Thiab nws tsis ua li tau ib ntus, tiam sis tom qab ntawd nws hais rau nws tus kheej tias: Txawm hais tias kuv tsis hwm Vajtswv thiab saib tsis taus neeg los, vim tus poj ntsuam no pheej txob kuv kom kuv mus ua pauj rau nws, tsam nws pheej tuaj tas li ces nws yuav ua rau kuv nkees.

85 Kuv yuav muab cov me nyuam ntawm Xi-oos piv zoo li no.

86 Kom lawv taij thov nyob ntawm tus txiav txim ob txhais ko taw;

87 Thiab yog hais tias nws tsis mloog lawv, kom lawv taij thov ntawm tus tswv xeev ob txhais ko taw;

88 Thiab yog hais tias tus tswv xeev tsis mloog lawv, kom lawv taij thov ntawm tus thawj tswj hwm ob txhais ko taw;

89 Thiab yog hais tias tus thawj tswj hwm tsis quav ntsej lawv, tom qab ntawd tus Tswv yuav sawv los thiab tawm hauv nws qhov chaw nkaum los, thiab los ntawm nws txoj kev npau taws heev, nws yuav txob haiv neeg no;

90 Thiab nrog nws txoj kev meem txom kub lug, thiab nrog nws txoj kev npau taws, nyob rau nws lub sij hawm, nws yuav muab cov saib xyuas uas phem, tsis rau siab, thiab tsis ncaj ncees ntawd txiav tawm, thiab muab lawv nqi zog rau lawv mus nyob xyaw cov neeg siab dag, thiab cov neeg tsis ntseeg;

91 Uas twb yog nyob hauv qhov chaw tsaus ntuj nti, qhov chaw uas muaj kev quaj, thiab kev nyiav, thiab kev tom hniav qees.

92 Yog li ntawd, cia li thov Vajtswv, kom lawv lub pob ntseg yuav qhib rau nej tej lus thov, kom kuv yuav hlub tshua lawv, kom tej yam no tsis txhob muaj los rau lawv.

93 Yeej yuav tsum muaj raws li kuv tau hais rau nej, kom txhua tus neeg yuav tsis muaj lus daws;

94 Kom cov neeg txawj ntse thiab cov neeg kav teb kav chaw yuav hnov thiab paub tej uas lawv tsis tau xav txog dua li;

95 Kom kuv yuav ua tau mus ntxiv rau qhov uas kuv ua, qhov kuv ua uas txawv, thiab ua kuv txoj hauj lwm, kuv txoj hauj lwm uas txawv, kom neeg yuav paub tau cov ncaj ncees thiab cov phem, nej tus Vajtswv hais li.

96 Thiab ntxiv, kuv hais rau nej tias, tsis yog raws li kuv lo lus txib thiab kuv lub siab nyiam uas kuv tus tub qhe Sidney Gilbert yuav muag kuv lub tsev rau khoom, uas kuv tau tsa los rau kuv cov neeg, mus rau kuv cov yeeb ncuab txhais tes.

97 Tsis txhob pub kuv cov yeeb ncuab ua rau tej uas kuv tau tsa kom qias, los ntawm kev pom yeem ntawm cov neeg uas hu lawv tus kheej raws kuv lub npe;

98 Vim qhov no yog ib txoj kev txhaum mob thiab phem heev rau kuv, thiab rau kuv cov neeg, vim yog tej yam uas kuv tau tshaj tawm thiab tej uas yuav raug tej teb chaws sai sai no.

99 Yog li ntawd, yog kuv lub siab nyiam uas kuv cov neeg yuav tsum aws, thiab aws twj rau tej uas kuv tau muab rau lawv lawm, txawm hais tias yuav tsis pub lawv mus nyob rau haud.

100 Txawm li ntawd los, kuv tsis tau hais tias kom lawv tsis txhob mus nyob rau haud; vim npaum li uas lawv txi tau txiv thiab ua tej hauj lwm phim rau kuv lub nceeg vaj ces lawv yuav tau nyob rau haud.

101 Lawv yuav txhim tsa, thiab lwm tus yuav tsis tau txais los ua lawv tug; lawv yuav cog txiv hmab, thiab lawv yuav noj tej txiv ntawd. Twb yog li ntawd. Amees.