Tshooj 66
Kev tshwm sim uas tus Yaj Saub Joseph Smith tau txais, nyob hauv Hiram, Ohio, lub Kaum Hli Ntuj hnub tim 29, xyoo 1831. William E. McLellin tau thov tus Tswv ntsiag to kom paub lus teb rau tsib los lus nug los ntawm tus Yaj Saub, tej lus uas Joseph Smith tsis tau paub txog. Raws li McLellin thov, tus Yaj Saub thov tus Tswv thiab txais txoj kev tshwm sim no.
1–4, Txoj kev khi uas lus kav ib txhis yog qhov txhij txhua ntawm txoj moo zoo; 5–8, Cov txwj laug yuav tsum mus tshaj tawm txoj moo zoo, ua tim khawv, thiab piav rau cov neeg; 9–13, Yog rau siab ua hauj lwm txhawb pab ces yeej yuav tau txais txoj sia nyob mus ib txhis los ua qub txeeg qub teg.
1 Saib seb, tus Tswv hais li no rau kuv tus tub qhe William E. McLellin—Koj tau koob hmoov, npaum li uas koj tau tig ntawm koj tej kev ua phem mus, thiab tau txais kuv tej lus tseeb, tus Tswv koj tus Txhiv Dim, tus Cawm Seej ntawm neeg ntiaj teb hais li, tag nrho cov uas ntseeg kuv lub npe.
2 Kuv hais tseeb rau koj tias, koj tau koob hmoov vim koj txais kuv txoj kev khi lus uas kav ib txhis, uas twb yog qhov txhij txhua ntawm kuv txoj moo zoo, uas xa tawm los rau noob neej, kom lawv yuav tau txoj sia thiab tau los ua cov tau txais lub yeeb koob uas yuav muab qhia tshwm sim los thaum hnub nyoog kawg, ib yam li cov yaj saub thiab cov thwj tim thaum ub tau muab sau cia.
3 Kuv hais tseeb rau koj, kuv tus tub qhe William, hais tias koj yeej dawb huv, tiam sis tsis yog tag nrho; yog li ntawd, hloov siab lees txim rau tej yam uas kuv pom tias tsis zoo, tus Tswv hais li, vim tus Tswv yuav muab tej ntawd qhia rau koj.
4 Thiab nim no, tseeb tiag, kuv, tus uas yog tus Tswv, yuav qhia rau koj yam kuv xav qhia ntsig txog koj, los yog saib kuv lub siab nyiam rau koj yog dab tsi.
5 Saib seb, kuv hais tseeb rau koj tias, yog kuv lub siab nyiam uas koj yuav tsum tshaj tawm kuv txoj moo zoo ntawm ib thaj av mus rau ib thaj av, thiab ntawm ib lub nroog mus rau ib lub nroog, muaj tseeb tiag, nyob rau tej thaj tsam ib puag ncig uas tsis tau mus tshaj tawm.
6 Tsis txhob nyob ntau hnub ntawm qhov chaw no; tsis txhob rawm mus lawm pem thaj av Xi-oos; tiam sis npaum li uas koj muaj peev xwm xa tau, ces xa mus; tsis txhob xav txog koj tej teej tug.
7 Mus lawm tim tej av sab hnub tuaj; ua tim khawv hauv txhua qhov chaw, rau txhua tus neeg thiab nyob hauv lawv tej tsev txoos, piav rau cov neeg.
8 Cia kuv tus tub qhe Samuel H. Smith nrog koj mus, thiab txhob muab nws tso tseg, thiab muab koj tej lus qhia rau nws; thiab kuv yuav ua kom tus uas rau siab ntseeg muaj zog nyob hauv txhua qhov chaw; thiab kuv, tus uas yog tus Tswv, yuav nrog koj mus.
9 Tso koj ob txhais tes rau saum cov neeg mob, thiab lawv yuav zoo. Tsis txhob rov qab kom txog thaum kuv, tus uas yog tus Tswv, yuav xa koj tso. Ua siab ntev thaum raug kev txom nyem. Thov, ces koj yuav tau txais; khob ces yuav qhib rau koj.
10 Tsis txhob nrhiav kev kom tau nra hnyav. Tso tag nrho tej kev ua tsis ncaj ncees tseg. Tsis txhob deev luag poj—ib txoj kev ntxias uas tau txob thuam koj.
11 Ua raws li tej lus hais no, vim tej lus no muaj tseeb thiab ncaj; thiab koj yuav tsum rau siab ua koj lub luag hauj lwm, thiab ua kom ntau tus neeg mus rau hauv Xi-oos nrog tej nkauj xyiv fab kav ib txhis nyob saum lawv taub hau.
12 Ua tej yam no mus ntxiv kom txog kiag thaum kawg, ces koj yuav tau ib lub meej mom ntawm txoj sia nyob mus ib txhis nyob ntawm kuv Txiv sab xis, tus uas muaj kev tshav ntuj thiab kev tseeb nplua mias.
13 Tus Tswv uas yog koj tus Vajtswv, koj tus Txhiv Dim, tus uas twb yog Yexus Khetos hais tseeb li no. Amees.