Tshooj 48
Kev tshwm sim uas tus Yaj Saub Joseph Smith tau txais, hauv Kirtland, Ohio, lub Peb Hlis Ntuj hnub tim 10, xyoo 1831. Tus Yaj Saub tau nug tus Tswv txog tus txheej txheem ntawm kev nrhiav tej thaj av rau Haiv Neeg Ntseeg los nyob. Qhov no yog ib yam tseem ceeb ntsig txog txoj kev tsiv teb tsaws chaw ntawm cov mej zeej hauv lub Koom Txoos uas khiav tawm tim sab hnub tuaj hauv lub Teb Chaws Amelikas, ua raws li tus Tswv lo lus txib kom lawv yuav tsum los sib txoos rau hauv Ohio (saib tshooj 37:1–3; 45:64).
1–3, Haiv Neeg Ntseeg hauv Ohio yuav tsum faib lawv tej av rau lawv cov kwv tij; 4–6, Haiv Neeg Ntseeg yuav tsum muas av, txhim tsa ib lub nroog, thiab ua raws li lawv cov thawj tswj hwm tej lus ntuas.
1 Tsim nyog uas nej yuav tsum nyob twj ywm ntawm nej tej chaw nyob lub sij hawm no, yog hais tias zoo rau nej tej xwm txheej.
2 Thiab npaum li uas nej muaj av, nej yuav tsum muab faib rau cov kwv tij uas los sab hnub tuaj los;
3 Thiab npaum li uas nej tsis muaj av, lub sij hawm no cia lawv muas nyob rau tej thaj tsam ntawm ib puag ncig, uas zoo rau lawv, vim lawv yeej yuav tsum muaj tej chaw nyob lub sij hawm no.
4 Yeej tsim nyog uas nej yuav tsum khaws tag nrho tej nyiaj txiag uas nej muaj peev xwm khaws, thiab nej yuav tsum tau tag nrho li nej muaj peev xwm tau los ntawm kev ncaj ncees, kom lwm hnub nej thiaj muaj peev xwm muas av ua qub txeeg qub teg, uas twb yog lub nroog.
5 Tus Tswv tseem yuav tsis muab qhov chaw qhia tshwm sim los; tiam sis tom qab nej cov kwv tij los tim sab hnub tuaj los txog yuav tsum xaiv ib co txiv neej, thiab yuav cia lawv paub qhov chaw, los yog yuav muab qhov chaw ntawd qhia tshwm sim rau lawv.
6 Thiab yuav tsum tsa lawv los muas cov av, thiab los pib pua lub hauv paus ntawm lub nroog; thiab tom qab ntawd nej yuav tsum pib sib sau ua ke nrog nej tsev neeg, txhua tus neeg raws li nws tsev neeg, raws li nws tej xwm txheej, thiab raws li tau xaiv rau nws los ntawm pawg thawj tswj hwm thiab tus npisov ntawm lub koom txoos, raws li tej kev cai thiab tej lus txib uas nej tau txais, thiab tej uas nej yuav tau txais tom qab no mus. Twb yog li ntawd. Amees.