Tshooj 8
Kev tshwm sim uas tus Yaj Saub Joseph Smith tau txais kom qhia Oliver Cowdery, nyob hauv Harmony, Pennsylvania, lub Plaub Hlis Ntuj xyoo 1829. Lub sij hawm thaum tseem tab tom txhais Phau Ntawv Maumoos, Oliver, uas pab ua tus teev ntawv mus ntxiv, thaum nws sau tej uas tus Yaj Saub hais tawm los, nws xav tau lub txiaj ntsim txhais lus. Tus Tswv muab txoj kev tshwm sim no los teb nws tej lus thov.
1–5, Kev tshwm sim los ntawm tus Vaj Ntsuj Plig Dawb Huv lub hwj chim; 6–12, Kev paub txog tej txuj ci uas neeg tsis paub txog Vajtswv thiab lub hwj chim txhais tej ceev xwm txheej yav puag thaum ub yog los ntawm txoj kev ntseeg los.
1 Oliver Cowdery, kuv hais tseeb tseeb rau koj tias, tseeb ib yam li tus Tswv muaj txoj sia nyob, tus uas yog koj tus Vajtswv thiab tus Txhiv Dim, twb yog li ntawd koj yeej yuav tau txais txoj kev paub txhua yam uas koj thov nrog txoj kev ntseeg, nrog lub siab ncaj, ntseeg hlo tias koj yuav tau txais txoj kev paub ntsig txog tej ntawv sau ntawm cov ceev xwm txheej thaum ub, uas yog yav puag thaum ub, uas muaj tej feem ntawm kuv cov vaj lug kub uas kuv tus Ntsuj Plig tau hais qhia tawm los.
2 Muaj tseeb tiag, saib seb, kuv yuav qhia rau koj hauv koj lub cim xeeb thiab hauv koj lub siab, los ntawm tus Vaj Ntsuj Plig Dawb Huv, uas yuav los rau koj thiab yuav nyob rau hauv koj lub siab.
3 Nim no, saib seb, qhov no yog lub txiaj ntsim txais tau kev tshwm sim; saib seb, qhov no yog lub hwj chim uas Mauxes tau siv kom coj cov neeg Ixayees hla tus Dej Hiav Txwv Liab los saum tej av qhuav qhawv los.
4 Yog li ntawd qhov no yog koj lub txiaj ntsim; cia li siv qhov no, thiab koj tau koob hmoov, vim koj lub txiaj ntsim yuav tso koj dim ntawm koj cov yeeb ncuab txhais tes, yog thaum uas tsis yog li ntawd, ces koj cov yeeb ncuab yuav muab koj tua thiab coj koj tus ntsuj plig mus rau txoj kev puas tsuaj.
5 Auj, nco ntsoov tej lus no, thiab ua raws li kuv tej lus txib. Nco ntsoov, qhov no yog koj lub txiaj ntsim.
6 Nim no qhov no tsis yog tag nrho koj lub txiaj ntsim; vim koj muaj dua lwm lub txiaj ntsim, uas yog Aloos lub txiaj ntsim; saib seb, lub txiaj ntsim no tau qhia ntau yam rau koj;
7 Saib seb, twb tsis muaj dua lwm lub hwj chim, tsuas yog Vajtswv lub hwj chim xwb, thiaj muaj peev xwm muab tau Aloos lub txiaj ntsim no ua kom nyob tau nrog koj.
8 Yog li ntawd, txhob ua xyem xyav, vim yog lub txiaj ntsim los ntawm Vajtswv; thiab koj yuav tuav lub txiaj ntsim no rau hauv koj txhais tes, thiab ua tej hauj lwm zoo kawg nkaus; thiab yuav tsis muaj ib lub hwj chim muaj peev xwm muab lub txiaj ntsim no tshem tawm ntawm koj txhais tes mus, vim nov yog Vajtswv txoj hauj lwm.
9 Thiab, yog li ntawd, txhua yam uas koj yuav thov kom kuv qhia rau koj los ntawm txoj kev ntawd los, ces kuv yuav muab yam ntawd rau koj, thiab koj yuav paub txog qhov ntawd.
10 Nco ntsoov hais tias yog tsis muaj txoj kev ntseeg ces koj yeej tsis muaj peev xwm ua tau dab tsi li, yog li ntawd cia li thov nrog txoj kev ntseeg. Tsis txhob muab tej yam no suav tsis muaj nqis; tsis txhob thov yam uas tsis tsim nyog koj thov.
11 Cia li thov kom koj paub tej txuj ci uas neeg tsis paub txog Vajtswv, thiab xwv kom koj tau txhais thiab txais tau kev paub txog tag nrho cov ceev xwm txheej puag thaum ub uas cov neeg tau muab zais cia lawm, uas dawb ceev; thiab yuav muaj taus los rau koj raws li koj txoj kev ntseeg.
12 Saib seb, tus uas tau hais li ntawd twb yog kuv; thiab kuv yog tib tug uas tau hais lus rau koj txij thaum chiv thawj los. Amees.