Tshooj 95
Txoj kev tshwm sim uas tus Yaj Saub Joseph Smith tau txais, nyob hauv Kirtland, Ohio, lub Rau Hli Ntuj hnub tim 1, xyoo 1833. Txoj kev tshwm sim no yog ib zaj txuas ntxiv rau tus Tswv txoj kev qhia kom ua lub tsev rau kev teev tiam tus Tswv thiab kev qhia, uas yog tus Tswv lub tsev (saib tshooj 88:119–136).
1–6, Haiv Neeg Ntseeg raug qhuab ntuas rau qhov lawv tsis ua tus Tswv lub tsev; 7–10, Tus Tswv xav siv Nws lub tsev los muab hwj chim saum ntuj los ua vaj txiaj ntsim rau Nws cov neeg; 11–17, Yuav tsum muab lub tsev fij tseg ua ib qho chaw teev tiam thiab rau cov Thwj Tim koom haum kawm.
1 Tus Tswv hais tseeb li no rau nej cov uas kuv hlub, thiab cov uas kuv hlub kuv kuj qhuab ntuas kom kuv thiaj yuav zam txim rau lawv tej kev txhaum, vim los ntawm txoj kev qhuab ntuas kuv tau npaj ib txoj kev kom lawv dim ntawm txhua yam kev ntxias, thiab kuv twb tau hlub nej—
2 Yog li ntawd, nej yeej yuav tsum raug qhuab ntuas thiab raug cem rau kuv pom;
3 Vim nej tau ua txhaum rau kuv uas yog ib txoj kev txhaum phem heev, vim nej tsis tau xav txog txhua seem ntawm lo lus txib tseem ceeb, uas kuv tau muab rau nej ntsig txog txoj kev ua kuv lub tsev;
4 Rau txoj kev npaj uas kuv xav npaj kuv cov thwj tim mus yim kuv lub vaj txiv hmab rau zaum kawg, kom kuv yuav ua tau kuv txoj hauj lwm uas txawv, kom kuv yuav pub tau kuv tus Ntsuj Plig nplua mias los rau txhua tus tib neeg—
5 Tiam sis saib seb, kuv hais tseeb rau nej tias, muaj ntau leej nyob hauv nej uas twb muab tsa, cov uas kuv tau hu tiam sis cov uas tus Tswv tau xaiv muaj tsawg.
6 Lawv cov uas tus Tswv tsis xaiv tau ua txhaum ib txoj kev txhaum phem heev, vim lawv taug kev tsaus ntuj thaum nruab hnub nrig tav su.
7 Thiab vim yog qhov no kuv tau muab ib lo lus txib rau nej hais tias nej yuav tsum hu nej lub rooj txoos ua kev cai, kom nej tej kev yoo mov thiab nej tej kev quaj ntsuag yuav nce tuaj txog tus Tswv ntawm Xanpa-aus ob lub pob ntseg, uas txhais hais tias, tus tsim thawj hnub, qhov chiv keeb thiab qhov kawg.
8 Muaj tseeb tiag, kuv hais tseeb rau nej tias, kuv tau muab ib lo lus txib rau nej tias nej yuav tsum ua ib lub tsev, uas yog lub tsev kuv npaj los muab lub hwj chim saum ntuj los ua vaj txiaj ntsim rau cov uas kuv tau xaiv lawm.
9 Vim qhov no yog Leej Txiv txoj kev cog lus los rau nej; yog li ntawd kuv txib kom nej cia li nyob, twb yog ib yam li kuv cov thwj tim hauv Yeluxalees.
10 Txawm li ntawd los, kuv cov tub qhe tau ua txhaum ib txoj kev txhaum phem heev; thiab tau muaj tej kev sib cav sib ceg nyob hauv cov yaj saub lub koom haum kawm; uas yog phem heev rau kuv, tus Tswv hais li; yog li ntawd kuv xa lawv mus raug qhuab ntuas.
11 Kuv hais tseeb rau nej tias, yog kuv lub siab nyiam uas nej yuav tsum ua ib lub tsev. Yog hais tias nej ua raws li kuv tej lus txib nej yuav muaj hwj chim ua lub tsev ntawd.
12 Yog hais tias nej tsis ua raws li kuv tej lus txib, txoj kev hlub ntawm Leej Txiv yuav tsis nrog nej nyob mus ntxiv lawm, yog li ntawd nej yuav taug kev tsaus ntuj.
13 Nim no qhov no yog laj lim tswv yim, thiab yog tus Tswv lub siab xav—cia li ua lub tsev, tsis yog raws li neeg ntiaj teb ua, vim kuv tsis tau kom nej ua neej raws li neeg ntiaj teb ua;
14 Yog li ntawd, cia li ua lub tsev raws li tus qauv uas kuv yuav muab qhia los rau nej peb leeg, cov uas nej yuav tsum hu thiab tsa rau lub hwj chim no.
15 Thiab qhov loj thiab dav ntawd yuav yog tsib caug thiab tsib taws dav, thiab ua lub tsev rau caum tsib taws ntev, nyob rau txheej sab haud.
16 Thiab muab qhov chaw qis zog nyob rau nceeg sab haud fij rau kuv los ua nej qhov chaw tiam tej cim nco txog, thiab rau nej tshaj tawm txoj moo zoo, thiab rau nej yoo mov, thiab rau nej thov Vajtswv, thiab rau nej tiam tej uas nej ntshaw uas dawb huv tshaj rau kuv, tus Tswv hais li.
17 Thiab muab txheej siab zog nyob rau nceeg sab hauv fij rau kuv rau kuv cov thwj tim lub koom haum kawm, tus Tub Omas hais li; los yog hais tias, Alafas; los yog hais tias, Aumenkas; uas twb yog Yexus Khetos nej tus Tswv. Amees.